ذكاء السناني.. للامانه منقووول

[فهد الظاهري]

هنا أضع ما اراه من ضــوء قد يحتمل الصواب وقد لا

بسم الله

يتسم شاعرنا الكبير وملك المحاورة ابو تركي محمد السناني بفنون النقض وابداع الفتل وجديده فكل محاورة تجده يحبك فن المحاورة ويسبك البيت بذهب لا يصدأ يمكن تسميت وتعريف المحاورة
بقوة الحجه وسرعة البديه ومخزن المعرفة وشجاعه الموقف واحسان التصرف ؛ فالمحاورة عمق لا قاع له وسمو لا افق له وفي المحاورة دهاليز ودحول وغيوم ودروب كثيرة .. لذا يتلذذ من يعرف ويستطيع ان يجاري الشعراء الكبار في فهم المحاورة بينهما اما من يطربه الصوت والموال والعنصريه والابيات المكشوفه فمتعته ستكون مؤقته


الضـــوء (الاول)

يقول الشاعرالكبير وعلم المحاورة وتاريخها مستور العصيمي العتيبي
)(- مســـتور العصيـــمي)(
انا ليا حولت في سوق الغلا بعت وشريت // ويمـــيني اطول منك يا محمد ليا مديــتها

فرد الشاعر الكبير جنيه الذهب وملك المحاورة محمد السناني الجهني

)(- محـــمد الســــناني)(
انت منــاوي مدت اليمـــنى لكــنك ما قويت // يا ليتـــها تسلم على ما حصــلت يا ليتها


الضوء : اقتنص محمد كلمة ( ويميني اطول ) في بيت مستور وحولها الى صفة للشحاذ من يقف ويمد يده لطلب المال وهذا اقتنص ذكي من الشاعر في المحاورة ودهاء ومكر ودقة وحكمه وهو ما يميز قوة وجزاله شاعر المحاورة



الضـــوء (الثاني)

يقول الشاعر الكبير وشبح المحاورة حبيّب العازمي العتيبي

)(- حبيّب العازمي )(
يا حظ العزوة اللي ما يبى تمجيدها تفكير // يغيثون الغنائم والضعيّف مـع وأخياتـه

رد الشاعر الكبير وملك المحاورة جنيه الذهب محمد السناني الجهني
)(- محمد السناني )(
كــفو العزوه اللي تستحق المجد والتشهير // يا طيب العازمي لا قام يهديكم تحياتـه

الضوء: اقتنص السناني كلمة حبيب يوم يقول ما يبي مجدها تفكير .. ومن اللي ما يفكر! المجنون اللي ماله عقل ويهذري في كل شيء لذا قال السناني كفو بهذا المجد اللي يمجده المجنون . ثم وجه كلمه للجمهور حبيب : يا طيب العازمي يهديكم تحياته .. يعني انكم بلا تفكير ..


الضـــوء (الثالث)
يقول الشاعر المبدع تركي 2000 شاعر الوطن تركي الميزاني المطيري

)(- تركي الميزاني )(
يدوم ألك البقاء والريشه ألي في جناح الطير // عليها ياولد متروك حرف أسمـي وعنوانـي


رد الشاعر الكبير ملك المحاورة جنيه الذهب محمد السناني المطيري
)(-محمد السناني)(
طيورٍ غاليه وطيور في جنح الظلام تطير // لكن الله يعافي صاحبي وأنا مـا يبلانـي

الضوء : اقتنص السناني كلمة الميزاني الريشه وان تركي يقول ان على هالريشه اسمي وعنواني فقال له الطيور انواع لكن مشكله ليا كان اسمك وعنوانك فقط على ريشه طير والطيور انواع فيها الغالي و الحر واللي يطير في جناح الليل كالبومه يعني انت محددة طيرك ولماذا فقط اسمك على ريشه طير! وهنا يقول السناني الله يشفي الميزاني ولا يبلاني في طريقة مدح الشاعر نفسه بمثل طريقة تركي ...



ونستمر ان شاء الله

[فهد الظاهري]

الله يارضى عليك انا اتكلم عن جمال البيوت ما اتكلم عن شخصيته لاكن وش الي رافع ضغطك وبعدين انا ماني في بيتك انا في منتدى ارجال ويقدرون .. والدعوووه ما تصل انك حتى تتطاول علي اقل شي حشم ضيوفك وحسن لافاضك

[فهد الظاهري]

للامانه مثل ماقلت الموضوع منقول ومن شين الحض اني ما انبهت لبعض الكلمات مثل التطبيل وشاعر مدري ايش بس الله اعلم اني كنت ابشارك في اي شي ونسخة ولصقة من دون انتبه ولا اعدل فيه واسف

[مرزوق الجعيد]

لو استفردنا لكل شاعر على بين وبيتين لاصبح كل شعراء المحاوره مبدعين

من وجهة نظري ان البحث عن جماليات بعض البيوت لدى الشاعر ليست بالشي الصعب

وكل شاعر محاوره بل اسواء شعراء المحاوره لديهم بيوت قد لا ياتي بها افضل الشعراء

يعني بالعربي تقدر تقول شطحات

وطبعا ليس معنى كلامي السابق تقليل من الشاعر العلم محمد السناني فهو شاعر غني عن شهادتي او شهادة غيري فرض نفسه بقوة ادائه وشعره الفريد والحانه الرائعه والاهم حب الناس له فقد كون قاعده جماهيرية كبيره من انحاء الخليج العربي

[سيف شامان]

يعطيك العافيه

لكن واضح ان كاتب الموضوع تعمد أنت يمتدح خصوم السناني ( ليس لأنهم يستحقون ذلك ) ولكن حتى يبين أن السناني تفوق على شعراء كبار في هذا البيت

وهذي حيله غير لا ئقه في أنك تقتنص من كل محاوره بيت وتحطه للناس وتقعد تطبل لشاعر غني عن تطبيلك ..

عوافي يا ناقل الموضوع

[فيصل بن فهد الجهني]

السناني شاعر علم .. و شهادتي فيه مجروحه .. بحكم اني من جهينه


و لكن شهادة كل اللي ردوا .. تكفي .. و ما قصرتوا جميعا .. وما عليكم زود



,,, تحيتي

[فهد الظاهري]

اشكركم ع المروور وسعة الصدر تحياتي للجميع