الــــراتـــب نــــــزل

[عبدالرحمن العقيلي]

بسم الله الرحمن الرحيم



غلاء الاسعار

قالو لي(الراتب نزل)قلت وش عاد=ينفد خلال اربع وعشرين ساعه
فوق السماء رازق وفالارض حساد= وللسعر طب وللاوادم اشاعة
تبغون معنى راتب الشخص لازاد= معناه باب(ن) فك لاهل الطماعه
اهل الطمع تسرق على روس الاشهاد=وكلن يقّّّيم سلعته من ذراعه
الكون واسع حسب تقرير الارصاد=هذا خبر بثوه عبرالاذاعه
قلت اللهم تجعل الوسع يزداد= لو؟ان مالي حاجة(ن) فاتساعه
يضيق فينا الكون لاجات الاعياد=ويضيق لاشفنا وجيه الجماعه
شحت مواجيب الكرم عند الاجواد=يوم الغلا ميّل عليهم قناعه
ان طق باب البيت زاير ونشّاد=مانفتحه وليا فتحنا له؟؟؟؟ براعه
حل الايجار وجاك راعيه سرداد=يبغاه لاحلت عليه الشفاعه
اعطيه والا اعطي هوامير الاقصاد=والكهرب الملعون خطر انقطاعه
لاجيت ابرقد بين تفكير وجهاد=اسمع صياح الورع قاض(ن)رضاعه
تكفا يا(بومتعب)ترا حيلنا باد=حنا بدجا ليل(ن)كلتنا سباعه
تجارنا للحسد والكذب رواد=لو ودهم؟ كان اقلبوها مجاعه
حقوقنا توخذ على غش وعناد=ونقول للطماع سمع(ن)وطاعه
شكيت للغش التجاري ولافاد=ولانفع حتى وزير الصناعه
نبغى امر مرسوم في لهجته حاد=يهدف الى تحديد سعر البضاعه
تكتب عليها السعر من قبل الامداد= اسعارها تطبع عليها طباعه
نبغى انتهنا بعيشنا قبل الالحاد=وراع الطمع يغنيه كنز القناعه
ومثلك (يابومتعب) زعيم امة الضاد=عالي وشعبه يفتخر بارتفاعه
ابوك ضل اجدادنا وقت الاجداد=واليوم حنا في ذراكم وداعه

بقلم الشاعر /عبدالرحمن العقيلي

[شاعر وادي عبقر]

مبدع يالعقبلي مبدع

وانا من متابعينك

قصيده جزله وواقعيه

تسلم يمينك

[عبدالرحمن العقيلي]

المشاركة الأصلية كتبت بواسطة شاعر وادي عبقر

مبدع يالعقبلي مبدع

وانا من متابعينك

قصيده جزله وواقعيه

تسلم يمينك

ياهلا والله ويامرحبا اخوي محمد

الابدااااااع من صفاتك ومرورك اسعدني

وتقبل تحياتي

[فهيد الايدا المورقي]

عبدالرحمن العقيلي صح لسانك على القصيده الجزله

وهي تحاكي واقعنا المرير مع ارتفاع الاسعار والطمع اللي حل علي التاجر وعلى راعي الحلال وعلى راعي


العقار هذا مرض فر في الناس الله يقانا


تحيتي

التوقيع

حسابي في تويتر faheed_1234

[عبدالرحمن العقيلي]

المشاركة الأصلية كتبت بواسطة بناخي الايداء

عبدالرحمن العقيلي صح لسانك على القصيده الجزله

وهي تحاكي واقعنا المرير مع ارتفاع الاسعار والطمع اللي حل علي التاجر وعلى راعي الحلال وعلى راعي


العقار هذا مرض فر في الناس الله يقانا


تحيتي

بناخي الايداء

ياهلا والله ويامرحبا


صح بدنك وشهادتك غالية الثمن والشعر دائما رسالة :ورب المصحف انه مرض ويحتاج علاج

سريع واملنا فالله سبحانه ثم ولاة امرنا

الف شكر على مرورك وتقبل تحياتي

[ابومشعل البلوى]

يضيق فينا الكون لاجـات الاعيـاد ×××ويضيق لاشفنـا وجيـه الجماعـه
شحت مواجيب الكرم عنـد الاجـواد ××××يـوم الغـلا ميّـل عليهـم قناعـه
ان طق باب البيـت زايـر ونشّـاد ×××مانفتحه وليا فتحنا لـه؟؟؟؟ براعـه
هههههههههههههههههههه
انشهد على الله بس يالعقيلى

[عبدالرحمن العقيلي]

المشاركة الأصلية كتبت بواسطة ابومشعل البلوى

يضيق فينا الكون لاجـات الاعيـاد ×××ويضيق لاشفنـا وجيـه الجماعـه
شحت مواجيب الكرم عنـد الاجـواد ××××يـوم الغـلا ميّـل عليهـم قناعـه
ان طق باب البيـت زايـر ونشّـاد ×××مانفتحه وليا فتحنا لـه؟؟؟؟ براعـه
هههههههههههههههههههه
انشهد على الله بس يالعقيلى

اللي يضحكك هو المبارك يابو مشعل

وعساها ضحكة دائمه والنعم بالله

وتقبل تحياتي

[محمد ابن رووق]

ابداع والله يرزقنا من عنده




البيت الاخير انت تبي ظل من الظلال وليس ضل من الضلاله ليتك تنتبه لهاقبل تنتشر بالمنتديات


النطق واحد لكن عند الكتابه يوضح القصد

[عبدالرحمن العقيلي]

المشاركة الأصلية كتبت بواسطة محمد ابن رووق

ابداع والله يرزقنا من عنده




البيت الاخير انت تبي ظل من الظلال وليس ضل من الضلاله ليتك تنتبه لهاقبل تنتشر بالمنتديات


النطق واحد لكن عند الكتابه يوضح القصد

ارحب ياولد روق


اللهم امين فعلا هي من المفترض ان تكون بـ ظ وليس بـ ض وارجو من اخواني في المراقبه

تبديل الحرف اللي اشار اليه اخوي محمد

تقبل تحياتي

[خلف الروقي]

صح لسانك واعتلى شانك


كل الشكر لك يابطل