زئير اسد قصيده لشاعر : فارس بن مقبل العصيمي

[مزيد العصيمي]

أٍ زئـٍـر اســٌٍـدِ }~

وقت العلوم الصايبات الهرج أخير من السكوت = وإن عودت للفعل أخير من التكلّم والسكات
ولاينقل الحمل الثقيل إلا بعارين التخوت = اللي من العصر القديم لها المواقف شاهدات
رجلٍ على ربعه ليا جار الزمان يصير كوت = ورجلٍ ليا منّه تعرّض له صقيع البرد مات
دام المبادي ثابته والرب حي ٍ لايموت = فأنا على درب الوفا وأعلن على الحق الثبات
وصوتي ليا من عدت الأصوات عن تسعين صوت = زئير أسد ماهو إنباح كلاب ومخافت بنات
وأنا أشهد إنك ياقصيدي من عظيمات البيوت = ريحك مكاسر عود جاوي والطعم سكر نبات
ما أبغاك مشرب من ظمى الدنيا ولا ابغى منك قوت = أبغاك منبر لأجل نصرالحق تسهر ماتبات
قم قام حظك وإحتزم وارفع شراع الجيلبوت = واغطس بغبات البحر واشرب من الشط الفرات
وليا تعرّضك السمك جوف المحيط أبغاك حوت = ولا أبغاك تبقي من زعانيف السمك غيرالرّفات
ليا تعرّضك العنيد اللي من الغيظة يحوت = ما يستمع من طيشته لمفاهمة ومشاورات
يشرب غميقات البحور ويدعي عرف الكفوت = ولاباقي إلا يفرض لشعره على العالم زكاة
هذاك شوته فوق وجهه ياقوي الباس شوت = وأرسل على راسه من الميراج عشر مقاتلات
افتل له بيوت القصيد اللي قويات البتوت = واحكم مغاليق القوافي بالقفول المبهمات
ادمغ كلامه بالوقايع والدلايل والثبوت = وإستشهد بما سطّر التاريخ وأقوال الرواة
واصعد وخلك فالعلالي تاج لين يصير بوت = وادعس على خده وخله من حروره مايبات
وليا تعرّض لك غشيم ٍ يعجن الهرج ويلوت = تعذّره جزل القصيد وقام يجمع فالحتات
جنّب طريقه وابتعد خلّك عن الزلة متوت = ولاعاد تنشد كيف راحت بالعلوم وكيف جات
حذرى تجاري من هذا طبعه وتنزل للخبوت = مهوب كفو ٍ للعلوم الصاملة والكايدات
احشم جنابك لاتشربك في خيوط العنكبوت = أوهن بيوت ٍ قالها الخالق على مر الحياة
وليا جلب حظك رسالة من كبيرين البخوت = اللي مكانتهم بحجم طويق وجبال السراة
إزرع لها صدرك حدايق خوخ مكتظة وتوت = واغرس من خلاص الحسا واقطف لها حلو النبات
وأكتب لهم صادق مشاعر قلبك اللي ماتموت = قل هات ياصدق المشاعر من صميم القلب هات
وأرسل بها قرم ٍ مجرّب من قويين السموت = ذيبٍ مناويه السرى والناس في حلو السبات
دليلة ٍ ما احتاج رسم ٍ بالخرايط والكروت = مبرمج ٍ ربي بمخّه بوصلة كل الجهات
وأنا أشهد إنك ياقصيدي ما أنت للعالم شموت = ويرفعك عن درب السفالة عز نفس وطيب ذات

آٍُلـٍـٍشٌـآعـٍـٍـر : فآٍُرسٌ بٍـٍـٍنٌ مقُبٍلٌ }~


مزيد

آخر تعديل مزيد العصيمي يوم 19-Dec-2008 في 09:32 PM.