قصيدة شاعر الوطن في الملك عبدالله ظهر امس في قصر منى 10/12/1429هـ

[ابن بريم المقاطي]

ألقى الشاعر خلف بن هذال العتيبي هذه القصيدة ظهر أمس في قصر منى خلال استقبال خادم الحرمين الشريفين أصحاب السمو الملكي الأمراء وأصحاب الفضيلة العلماء والمشايخ وأصحاب السمو والمعالي وضيوف خادم الحرمين الشريفين من دول مجلس التعاون لدول الخليج العربية الشقيقة وأصحاب المعالي الوزراء وقادة وضباط ومنسوبي أمن الحج

من فيافي ديرتي جيت أحث الرجل جيت =ممتطي مطية ما تخالطها الوسوم
في شداد الراحلة كم سرحت وكم سريت =أطرد الأيام طرد النعام مع الحزوم
وكم رضيت وكم زعلت وزعلت وكم رضيت =طاويٍ بطني وأسج عن الوجبة وأصوم
وكم بكيت وكم ضحكت وضحكت وكم بكيت =تقزر الدنيا بعض النواجذ فالبهوم
الزمان اللي كواني بناره واكتويت =ما حجبت الوجه بالقيظ عن لفح السموم
الولد دون الوطن والمعيشة يستميت =ما يخلي الواجب الي تخليه الرخوم
اقتلب وادور الرزق وبحظي رضيت =واقتطع مناكب الأرض ما اسمع من يلوم
اطلب الخيرة ليا اخترت فرجة وانتويت =ما يرد المنتوي صوت ذيب وحس بوم
كان ماجاك الولد يجتلد لو حي ميت =من حساب اللي رمي فالمقابر من لحوم
عيب اردد ليت وانا ولد واقول ليت =منوة من قبلنا ما قضت لحدن لزوم
غبت عن داري مغرّب وعنها ما سليت =جيتها يوم الفرج لاح من روس الرجوم
والسلام مبارك العيد وانا لك فديت =ياحبيب الشعب وابرك من الايام يوم
يوم سقت القافية فيك والله ما غديت =مثل سوق القافلة للجدي بين النجوم
فيك يالقطب الشمالي بمسراي اهتديت =كل ما يممت يمك تعرفت اليموم
فيك يابن اليعربية وانا منك ابتديت =رايم العليا ولا غير عبد الله يروم
المواقف غالية كم عطيت وكم خذيت =الحياة لها ضريبة وتتبعها رسوم
اشهد انك نخوة المجد للمجد انتخيت =نخوة ماتارد ألا مواريد السهوم
واشهد انك في مسيرتك ولشعبك وفيت =منك واصلنا المسيرة وحققنا الحلوم
واشهد انك يوم خضت المناصب ثم وليت =كرسي التدبير بالفعل شتت الوهوم
واشهد انك صايب الراي بأفكارك سعيت =للتآلف والتكاتف وتسكيت الخصوم
في ميادين الديانات حاورت ومضيت =ومن يعارض في مساعيك جعله ما يقوم
ثور النايم وقله علامك ما صحيت =الأفاعي تدخل الناس من تحت الهدوم
ناس ما تدري عن اللي يدور وكيت كيت =خوض حوض ورجد خيل على الفارغ تعوم
المخاطر واردة وأنت عنها قد دريت =كل طلعة شمس منها يبينن الثلوم
ياعمر في رحلتك ماهدمت إلا بنيت =ما تعرضت الكنيسة ولا روعت قوم
معدلك فاروق وأعظم أخطاك اللي خطيت =كل من ودعك مستقبلك عند القدوم
وانت يا قايد وطنا مشينا اللي مشيت =المثابر بالصبر والغنايم بالعزوم
ارفع الراية وسل السلاح ليا غزيت =بالأمان يتم قطع الايادي والخشوم
يستتب الامن وليا اهتنى الشعب اهتنيت =يسهر القبطان واللي على المركب ينوم
شاهرً سيف العدالة وللمصحف قريت =تنقذ المظلوم من تحت لحيان الظلوم
انجبك صقر الجزيرة وفي حضنه ربيت =فيصليٍ مر كبده على كبده يزوم
حنكك حنكة بطل للمواجيب ارتكيت =من نصيبك يكبر القسم من بين القسوم
يا عريب الأصل والفصل للجوزا سميت =عن سلوك الغدر والشك والشرك امعصوم
بالمغارب والمشارق لك السمعة وصيت =جلجلت بالكون تحت السماء فوق الغيوم
يابعيد الحوم ياللي على الرجم اعتليت =الطيور موقعة لا تطير ولا تحوم
شامخ الهامة حشا ما خضعت ولا انحنيت =يا صميدع من يعاندك مفلس ومهزوم
من تدخل في عقيدتك للحق اعتزيت =عزوة العوجا ولا زال للعوجا قروم
سطوة الجبار في المعتدي لا من سطيت =ورحمة الغفار جاتك من الرب الرحوم
يا زعيم العرب للعرب بالنية صفيت =الزعامة يازعيم العروبة لك تشوم
يا عزيز الجاه يا كثر ما صنت وحميت =من يذود بجانبك يرقد آمن ومخدوم
يا كثر ما أصلحت من حال وأحوال ورعيت =من مشاريع تخليك مكرم ومحشوم
السياسة يا سياسي بها بعت وشريت =وين يالشراي في سوقها محد يسوم
وانت يا تاريخ سجل بعينك ما رأيت =زف عصر الملحمة يعلم العالم عموم
في ولي العهد ابمدح وللمدح اهتويت =راعي الفزعات ضافي الشمايل والكموم
مبتسم وقت الشدايد ويسعدك ان نصيت =في عيونه يصغرن الكبار من العلوم
في المهمة يابو خالد على القمة رقيت =للدفاع مدافعي مستعد للهجوم
ردك الله بالسلامة ومن قلبي دعيت =مرتجي عودتك رجوى الصحاري للوسوم
والقصيدة تمت ابياتها خمسين بيت =والسموحة ياملكنا عسى عزك يدوم

آخر تعديل ابن بريم المقاطي يوم 09-Dec-2008 في 12:59 PM.