ختام السالفه :: سعد بن جدلان

[خالدالعصيمي]

الا ياالله ياللي تحت هيبة سلطنتك اسلمت

لك المسلم يسبح لك بحمدك ولك الاسلامي

احمدك واشكرك واثني عليك بما علي انعمت

تزودني وفا قدر العشير ووصل الارحامي

ولجك الفجر ياليل الذهول اللي علي اضلمت

يعرضك واقع الماضي بعيني عرض الافلامي

ولهتك يالنديم اللي على صافي وفاك اضرمت

بصفحة ذكريات العام واللي من ورا العامي

بعد تقرير مشوار التجارب نجحك واجرمت

بان السيف يبقى والعصا والمحزم احزامي

عطتني عزلة اخلاصي معك نسيان من نادمت

كتبتك وانطوت صحفي عليك ورفعت اقلامي

ابـــاهي لا ابالي واتبيسط كل ماقدمت

اشــــب النار قدام العرب واشيد اخيـــامي

نهاري حر شمسه يستحي منها لسان الشمت

وليلي ترقب نجومه ملامة كل من لامـــــــي

على ضو الكلام اللي كشف عنا ستار الصمت

عرفت اني تحت برق الامل في روض الاحلامي

احسب انك تيمم يا اتجاهــي وين ما يمـــمت

واثــر ما انت بورايه في الطريق ولانت قدامي

مصيبه لاتدنت قيمتك في عين من قيمـــــــت

يشوفك بالسهل وانته تشوفه بالسما السامي

كثر ماحـــن قلبي للونيس وكثر مـــا درهمت

فجر صدري حنيني واتعب الاقدام درهامي

عيون الصد وعيون التجافي حول مهما اكرمت

تشوف المجتهد كســـلان والبناي هدامي

مدام ان جانبك شام لجنابي وانت عني شمت

كثر خيرك وانا مانيب لاجايع ولاضـــــامي

اشــوف انه علي واجب ليــــامريتك وسلمت

مرور اكرام تربطه الكرامه عند الاكرامـــي

على شان الخفوق اللي على عرشه قعدت وقمت

حجب عنك الدجى لين اشرقت لك بيض الايامي

ختام السالفه ياطيب العشره كرمت ودمت

هذا حقك علي وحق شرهاتي على اوهامي

مصير الوقت يشرح لك دروسه وان غفلت ونمت

يصحيك الزمـــان اللي يصحي كل من نامي

تذكرني لامنها خابت اوهامك فمن وهمت

وشفت الفرق في حب الخشوم وحب الاقدامي



سعد بن جدلان الاكلبي