على الراضي على الزعلان واللي خاطره مقهور *** أخذنا بيرق المليون وبعض الناس مقهوره

[التـميمي المـضري]

بسم الله الرحمن الرحيم

السلام عليكم ورحمة الله وبركاته


أهنئكم جميعا بحصول بني تميم على بيرق الشعر والحمد لله من حين أخذنا البيرق والأمطار والخير جانا بالرياض

وهذه الكلمات إهداء إلى شاعرنا

خليل الشبرمي التميمي

وإلى جميع محبيه من قبيلتنا العظيمة و باقي القبائل الكريمة

سلام الله على اللابه سلام الله على الجمهور=سلام الله على شاطيك يالراحه وجمهوره
سلام الله على الشبرم خليل اقول له مشكور=وبعد الشكر للفرد الصمد تميم مشكوره
سلامٍ من ضميرٍ لا سرا بالقاف شد الكور=يسوق القاف سوق الذود والجمّال في كوره
فرحنا فيك يا البيرق وجابك شاعرٍ دكتور=هذاك القرم لا قالوا طبيب القاف دكتوره
بعون الله يا عبدالله يصير المتكل منصور=الى منّه على ربه توكل جات منصوره
تصوت له تميم العز غايبها بعد واحضور=تمنى كل واحد حاضر المسرح مع احضوره
تصوت له جزيرتنا على مدة ثلاث شهور=ومن فضل الولي ما خابت الأيام واشهوره
ومن نجد العزيزه صوت الداعي وهو مسرور=ومن دوحة قطر يا صاحبي والنفس مسروره
مع الشعّار دار القاف ودور القافيات يدور=على هذا ومن هذا اخذ شاعر مضر دوره
على الراضي على الزعلان واللي خاطره مقهور=أخذنا بيرق المليون وبعض الناس مقهوره
من محمد ولد زايد أخذها والصقور صقور=أخذها يوم حامت في سما الراحه مع اصقوره
ترا هذي تميم العز ماضينا عليه النور=وحاضرنا بعون الله يزيد النور من نوره
على الإسلام تجمعنا تميمي والوطن معمور=تميمي في قلوب أهل الوفاء والعز معموره
ترى حب الوطن يا صاحبي بقلوبنا محفور=على مر الزمن ما يختلف بالحب محفوره
ومن يقرا تواريخ العرب يلقابها منشور=عن أبطال العرب في صفحة التاريخ منشوره
يكفّينا من التاريخ حديثٍ بالذهب مسطور=على الدجال سطرها ترى مسلم على سطوره
وابن عيسى وابن خلدون وغيره والعلوم ابحور=ومن ينشد عن التاريخ يركب غبّة بحوره
ويكفينا شهادة نجد على مر الدهر واعصور=ويكفينا على مران قبرٍ طافت عصوره
ويكفينا من الصمّان مناخٍ فيك ذيك القور=على مر الزمن تشهد له الصمّان مع قوره
وان ماني على بعض الاوادم حبها مجبور=ليا صارت ترا نفسه بكِره الناس مجبوره
ترى عين الحسد يا صاحبي مثل العيون العور=وعالجها مثل ما قيل حط الملح في عوره
وعسى ساق الحسد يا صاحبي من جانبه مكسور=وعسى رجله وحد الساق والرجلين مكسوره
ولا يا حامل البيرق تكرم واقبل الميسور=من اللي يوم نادى للقوافي جات ميسوره

عبدالله القزلان



تحياتي