الجنيه الإسترليني

[أبو زيد]

الجنيه الإسترليني
الجنيه الإسترليني كل ماله في إزدياد.. لكن المشكلة ماهي فيه..! المشكله القطن الإنجليزي الناعم والساطع البياض اللي ذبحني ألا بليّه... والأبيات التالية تشرح نفسها...

هذي هي الدنيا تدربى وتدَحدَر = والبوند مايثبت على سبعة ريال
هذي هي الدنيا على اللي تكبّـر = غزال تكفى لاتحدّن على الجال
الغالي الحالي مع الوقت يخسر = والعم لاتامن ينادى ولد خال
والزين في عج الليالي تغبّر = ثم شان فاله بعدما طاب له فال
ياقيس ليلى وينك أنته وعنتر = لو شفتوا اللي شفت في حالكم حال
شفت الحديقة بين مسك(ن) وعنبر = لو كان يسقيها من المزن همال
أقطف وأشم الورد وأقول سكر = لو كان ماوسط الردى حظهم مال
يالبوند علمها علينا تصبّـر = يالبوند علمها عن الحال بالحال
يالبوند حنن قلبها لو تـكدر = تبشر ترى منزالها غير منزال
لو هي على عهد الجواري تحرّر = عهد الجواري زال يامسندي زال
الخاطر اللي من غثاهم تكسّر = مايجبره ياكود شبابة الال
الله يعيد المجد والعهد الأخضر = وأملك يمين عداد مالا على البال
واختامها يالزين لا لاتبختر = المشكلة وإلها ثمانين حلال

وسلامتكم

ملاحظة:
البوند = هو الجنيه الإسترليني باللغة الإنجليزية