هات الدلال ولع النار ياجداع ( للشاعر الكبير / سهل الكسر)

[ذيب كميت]

هات الدلال ولع النار ياجداع=عجل عليه ياعدو الرخامه
هات الحطب ياجداع من جبر وولاع=جبره خشب وولاع ناره ثمامه
ولاجاء لصلوا النار ياجداع شلاع=وشفت الخشب فيها تدانى صرامه
أحمس من الخولان ياطيب الناع=لآن النجاض يبين فيها وشامه
ودقه بشامين يجيله تلعلاع=يصح النيام أليا أرتهج من منامه
ثم هاتلي صهبن يداون الأوجاع=اللي من الصالي عليها سحامه
قفز الغوارب والمقاضب والاكواع=وجنوبها ياجداع فيها هيامه
لا وقفن ياصاح فيهن ترفاع=وفيهن مثل حد السيوف أستقامه
صهبن مثاعبها مهاديف ووساع=وفيهن على جبر الحديده ضخامه
سميتهن ياجداع والأسم ماضاع=هيفا وهيفيه وشيمه وشامه
لا شافها اللي للبغاديد مولاع=شوك شعر راسه وطش العمامه
لقم وبهر ونتبه للتسراع=واحذر يجيبك يالبناخي غشامه
خل المبهر تهتوش فيه الأنواع=بين الشقاره والحمر والدهامه
أذن هاجوس القصايد أليا طاع=يقرب أليا فك المهيل أبلامه
ويحضر عيون الشعر موجدت الابداع=ومعانين فيها طراه وجسامه
تذكر الماضي وتصحيح الأوضاع=وحب البداوه والبداوه شهامه
ياماحلا لاشيف لسهيل مطلاع=وشافوه تال الليل يلمع زمامه
من نجد يزمي فوق نجران لماع=وشافوه أهل تثليث وأهل تهامه
وجاء للهبوب من أيمن الشرق ذعذاع=والعد عقب سهيل راعت جمامه
وفزر هجير القيض وأضفاله قناع=على السلم والسمر مثل البجامه
والبل تلافت للجمل وبرد القاع=وقاموا هل البل ينزلون العدامه
والنار شفت ألها مع الفجر شعشاع=وقاموا يحزمون الحطب في حزامه
ومن عقبها خمسين ليلاً لها أتباع=لا بكر الوسمي ودلى غمامه
وجاله على ساقان من غرب ميقاع=ويجنب ولا يملك عريق الثمامه
ويشمل على القرعا وبير ابن هزاع=وعلى رجم بذال يرخي خطامه
وأليا أنهمل ودقه ومزنه ضفى وماع=على قرى الصمان يبخت سنامه
وضاقت مع المشقر زهازيم الأقطاع=لا جاك راعي نجد يدفع جهامه
بدوٍ تبى المرباع ثم جتك نجاع=وكلاً عصب في سلة السقس خامه
قامة عطايا الله تضيق أبها الارواع=شولن يازين مع الحماد ادحامه
أول معاشيهم مشابيع وجياع=وراحوا على ماقيل شده وقامه
وشفت العسوس جيوبهم تقرع قراع=اللي مدح واللي قصر في كلامه
مالوا على داراً للأبواش مرتاع=فيها يجي لأهل الحلال التمامه
كلاً معه وآيت وصندوق وشراع=ونارٍ رمادتها سوات الردامه
وذبايحٍ تشرى من البدو وتباع=وكلاً تجهد ماتردى مقامه
أخذو لهم قامات ثم قيل الراع=على ظهر الركبي يحذف المسامه
قروا أليا قامة تمريع تمرياع=سوالهم راع الكرامه كرامه
ثلاثة أشهر كلها وقت مرباع=وقامه يالين العشب يدني صرامه
ولاقيل صيفين على نجد تنداع=كلاً صفط عفشه وقشع خيامه
وتمزعوا مع كل جوٍ تمزاع=بطرافهم يكفى المدور يدامه
وراع الغنم مع دربهم شد ثم ضاع=يطو الشبوك وقام يجمع رمامه
ماعاد يلحق لاذراعٍ ولاكراع=الشاوي اللي در شاته طعامه
لاخذت لي مع سلة البدو مذواع=فنا ماعاد الحقت نفسي ملامه
هذي طراة العمر والوقت خداع=وغارات بقعا ماش منها سلامه
وصلوا عدد ماغرهد الورق سجاع=على النبي وزكى الصلاه الختامه