ديوان الشاعر / غازي بن مهنا الشيباني

[عابـــــر]

أخواني أضع بين أيديكم بعض من قصائد الشاعر غازي مهنا الشيباني آمل أن تحوز على رضاكم ودمتم سالمين وياليت الاخوان ينسقونها .....
-----------------------------

جندت نفسـي لنفسـي عـن معاثرهـا=اخـاف مـن عثـرة تصعـب تواليهـا
لعل ربـي علـى الاصـلاح يامرهـا=النفس تجهل وأخـاف ابليـس يغويهـا
اخـاف تسـرح مـع الدنيـا تغيرهـا=اهـدي النفـس لـو كثـرة طواريهـا
اتعب علـى السمعـة العليـا وادورهـا=وليا بغـت مسلـك الـزلات عاصيهـا
ابـي لهـا المرجلـه مانـي بعاذرهـا=لـو المـراجـل تعيـبـات مراقيـهـا
اقص الأمجاد وأمشـي مـع جرايرهـا=اتبع طريقـة رجـال الجـود وامشيهـا
اغلي هل الطيب ماضيهـا وحاضرهـا=احـب عاداتـهـم مـانـي مخليـهـا
واصبر ليا ضقـت ليـن الله اييسرهـا=لو خصني حاجـة للنـاس مـا بديهـا
والهرجـة اللـي تعدانـي مـا فسرهـا=ولا شفق على كشفها مـن دون راعيهـا
واتـرك سبيـل العـرب لله يدبـرهـا=تجينـي السالفـة ماكـنـي أوحيـهـا
أقول مدري بهـا لـو كنـت خابرهـا=واللـي سألنـي يبيهـا قلـت ناسيـهـا
وش لي وراء الناس يوم اجرح مشاعرها=الفتنـة الميـتـة مـانـي بمحييـهـا

**********

كريـم يابـرق بعيـد سحـابـه=جعله على هاك المشاريف صباب
جعله على المشقوق يسقي ترابـه=ويسقي سحيله والينوفي وعبـاب
والهضب من سيله تدفق شعابـه=دار يحن القلب يمه ولـو غـاب
دار بها تسمـع تعـاوى الذيابـه=فيها النبشتي ما يوقف على الباب
منزال ربع كـل ابوهـم قرابـه=ما بين عم وخال ما فيهم اجنـاب
قلبي كمـا دلـو تجـدد خرابـه=يقفي ويقبل بين غارف وجـذاب
دلـي علـى عـد قليـل شرابـه=لاروى الهليك ولا لقا عنه مجناب
شفي بمشقـوق جديـد خصابـه=فيه البيوت اللي تبنـا بالاطنـاب
اخير من قصر الا صـك بابـه=اليا لفاه مسير مـن هلـه هـاب
سلم الحضارة خاطري مارضابه=لكن اطيع الوقت والوقت غصاب
كل على ما قيـل وقتـه مشابـه=وانا بوقتي سرت والكيف ما طاب
قلب ذكر ما ضيه جـدد عذابـه=والراس من كثر التفاكير قد شاب

**********

ملبوس غيرك لـو لبستـه يعيبـك=وهرج بلا معنـا يعـود سماجـه
ان كان حملك ما تشيلـه مناكبـك=اطلب جزيل المد وادعـه وناجـه
لا ترتجي من واحد مـا يوجبـك=لو كان من دنياك مستـك حاجـه
ترا كثير الناس لو كـان يعجبـك=سحاب صيـف مقتفيتـه عجاجـه
ان شاف عندك شي حبك وقربـك=وان قل ما بيدك كثيـر احتجاجـه
ان جدت له وده من الخير ينهبـك=واليا نصيته صد واخـلا مداجـه
اليـا بدالـك لازم فيـه جنـبـك=وقدم عـذاره ليـن يلقـا خراجـه
خل الردي من رفقته ويش مكسبك=خلـه بحالـه لا تعكـر مـزاجـه
وقت السعه لا غبت مـره يعاتبـك=والا بوقت اللازمـه مـا يواجـه
انصى الرفيق اللي ليا ضاق حاجبك=لا جيت يمه قام يضحـك حجاجـه
يفرح من افراحك ويجزع لصايبك=وعلاج ضيمك لا تصعب اعلاجه

**********

ياللي على الماضي توجد من اليـاس=تبكي على الماضي وبالصدر ضيقـه
انس الزمان اللي عليـه الدهـر داس=مـن يرجـع ايـا الشبـاب العتيقـه
وان هب لك من صاف الوقت نسناس=خلك بدرب الجـود رجلـك طليقـه
وان شفت ناقل شيخة مالهـا سـاس=سـراب صبخـا لا يغـرك بريقـه
عزك من الله ماش عز ورا النـاس=مكن ايدينـك مـن عـراه الوثيقـه
وارفع مقام النفس عن درب الادناس=والا تـرا ضلـع الندامـه تويـقـه
ترا دروب الهون ماترفـع الـراس=اسـأل مجـرب يخبـرك بالحقيقـه
واختر لنفسك مع هل الجود مجـلاس=وراع الردا والخبث جنـب طريقـه
ترا دروب الهـون مافيـه نومـاس=والطيب حملـه كايـد مـن يطيقـه
ومن طاوع الشيطان يبشر بالافلاس=من طاوع الشيطان يصبـح رفيقـه
ابليس لايغويك فـي كـل وسـواس=ويرميك في موج البحـور العميقـه

***************

البارحه في منامي هـاض هوجاسـي=من ضيقة في الضمير أخفي مرامسها
تحز في خاطري واخفيت الارماسـي=من عام الاول وانا في بالي ادرسهـا
اتعب علـى بنيهـا واجـود الساسـي=واخـاف وادرا الليالـي لا تنكسـهـا
واكن في ضامري لاتـدري الناسـي=واهدي النفـس والاسـرار حابسهـا
ابصر بحالي واكيل العلم من راسـي=وهدوم غيري من العـازات مالبسهـا
والرجل أجنب بها عن بهض الاجناسي=واسكـر الاذن لاتسمـع وساوسـهـا
ما كني اوحي خبر لو كـان حساسـي=بعض السوالف ترا السمعـه تدنسهـا
وان شفت ماعفت ما طول بمجلاسـي=وسراقت الهرج ما جلس في مجالسهـا
تمضي الليالـي جديـدات ومراسـي=محمد كشف غيب الايـام ودسايسهـا
دنيـا تبـذ الخفـا وتليـن القـاسـي=لو ربحة نـاس ابـه نـاس تفلسهـا
صار الحصيني بها والذيب متواسـي=نفسـه تهقويـه ويحـاول ينومسهـا
وابوحقب في زمانه صـار قرناسـي=يشره على ذبحة الصيـده ويفرسهـا

****************

طال الزمان وشيب الراس ما رتحت=توميبـي الأيــام مـنـا ومـنـا
وأن مسني حاجه بالأسرار ما بحت=ويـم الوجيـه الهابيـه مـا تعنـا
أثر العرب ما تلتفت فيك لو صحت=ألا كريـم (ن) مـد جـوده شملنـا
أمسيت في ديره وفي ديره أصبحت=وعيا الزمن ما طاع غـازي مهنـا

******************

أمشي بحكم الوقت والله عويني=نوب غني ونوب مخباي خالي
ما تصفي الدنيا على كل حيني=ولا حدن من الدنيا سليم وسالي
بالحظ والمقسوم عندي يقينـي=الوقت حكمه ما يطيع الرجالي
ولو بالتمني ما طلبته يجينـي=بنيت قصرا على الدرب عالي
وما دام ما تعطي شمالي يميني=ما فادني عمي وفزعة خوالي
رزقي من الله كاتبه في جبيني=لو اشتكي للناس ما حدن بكالي
أصبر ولا بد المخفى يبينـي=ما ني ببين للعرب ما جرالـي

******************

فكرت في دنياي بالعرض والطول=وأصبح خطاها ما يساوي نصفهـا
لو طاب لي في عيشها كل ماكـول=كيف أهتني في تمرها من حشفهـا
تضحك لنا الايام والغيب مجهـول=واتعبت نفسي مـا تحقـق هدفهـا
نفسي لها هومات وتصول وتجـول=ولا بـد دورات الزمـان تعسفهـا
لو أشرب الصافي قراح ومزلـول=كـم شربـة للكبـد تنكـر عدفهـا
أسمع وانا قلبي عن الهرج مقفـول=وفي صدري الأسرار ما احد كشفها
لو تعجبك يمناك والزنـد مفتـول=لا بد مـا الايـام تثبـت ضعفهـا
تصفي لك الايام ساعـات وتـزول=لو مهلت لك منك تخلـي طرفهـا
كم واحد كنه عن المـوت مكفـول=واقفا وباقي عملتـه مـا صرفهـا
وش عاد لو عمرك يكمل مية حول=من شاف تاليـة النهايـة عرفهـا
أعرض عن الزلات وابعد عن القول=وخالف هوا نفسك ونـزه شرفهـا
وترا الطريق اللي عن العدل معزول=أمـا يهيـن النفـس ولا حرفـهـا

*******************

القلب له غفلات في بعض الاوقات=واليا انتبه نطيت روس الشواهيـق
يجيه هاجوس الضحى عشر مرات=من كثر ما يبدي على الرجم ويويق
عليـك ياساكـن ديـار بعيـدات=اللي عطاني عهد منـه ومواثيـق
ودي بقربـه والليالـي معـيـات=يا ما عصن قبلي رجال مطاليـق
اخذت لي في ماضي العمر سجات=سجات عني تبعد الهـم والضيـق
واليوم طاروق الهواء بيننا مـات=باقـي هوانـا نتركـه للعشاشيـق
عايش على ذكرى الزمان الذي فات=وضاق الضمير اللي سدوده مغاليق

*****************