أنا الرفيق الي لاطحت شالك

[عمر بن مطلق الرويس]

قصيدة رائعه تتحدث عن الخوة والصداقة

انا الرفيق اللي لا طحت شالك
لاضامتك دنياك والوقت بك مال..

انا يمينك شدني في شمالك
يمنى بلا يسرى ترى حالها حال..

انا عزاك وعزوتك لاجرالك
من تاعس الدنيا هواجيس واهوال..

ماني من اللي لاغتنى ما وفالك
لو لك عليه من الجمايل والأفضال..

وماني رفيقك كان وقتك صفالك
انا رفيقك لادبرت فيك الأحوال..

خذني عصى موسى إذا كنت هالك
لمسح لك بحور القهر قول وافعال..

فالك عسى الله يسعد اليوم فالك
فالك عقب صوم الدهر عيد شوال..

وبالك يجي في خاطرك يوم بالك
انك تغيب ولا تجي لي على بال..

لأ .. لا تفكر انت في مثل ذلك
ان اتخلى عنك لو الزمن طال..

ما اقول انا ياعم مالي ومالك
ماترخص العشرة ولا تغني اموال..

اسمع جوابي قبل ما اسمع سؤالك ؟؟
خارج حدود التغطيه وارسل ارسال..

على محيط السالفة حط دالك
اجيك رجلي كان ما جيت خيال..

انا ليا شح الزمن في وصالك
تشدني النخوهـ على وصلك حبال..

انا عمى عين العدو لانوالك
انول روحه قبل ماروحك تنال..

بينك وبين الشمس شجرة ظلالك
مالشجر قيمة إذا ماله ظلال..

والليل لو الليل مظلم وحالك
ترسمني الظلمى على صدره هلال..

ماني ولد عمك ولا اغلى عيالك
خطوى الخوي تسوى بني عم وعيال..