رجم الجود

[عايض التوم]

الجود رجم وقمة الرجم نايفه=مايعتلي في وسقه الا ولايفه
ماكل من هازه يعدي بقمته=ولاحصله راعيه بهروج زايفه
سهلن على الطيَب صعيبن على الردي=اللاش مايقدر يواجه كلايفه
حيث الردي دايم تخذله روابعه=من خلقته مثل الحصاة المهايفه
من يعتزي باللاش ماهوب فايده=والله لتكثر في زمانه كسايفه
والنعم كايد له رجالن تحصله=واليوم بالمجان تصرف صرايفه
يستاهله من يكسب الحمد والثنا=بحر الوفا اللي مانقصته غرايفه
غير الشجاعه والكرم من خصايله=تقي نقي نفسه من الله خايفه
يأمن به الاصحاب من طيب امانته=نزيه والماجوب ماهوب طايفه
يحفظ حقوق الجار من طيب جيرته=ماهوب عن جاره يلفف لفايفه
راضي بما يكتب له الله ويقسمه=عنده قناعه مايكثر حسايفه
ماغرته دنياه هو داري إنها=ايامها ماهيب دايم مسايفه