هذا ما حصل بين المسرّي وماجد

[المسرّي]

هذه محاورة رائعه بيني وبين الشاعر ماجد الهذيلي دارت رحاها في احدى ساحات الانترنت الشرسه , اترككم تستمتعوووووووون بقراءتها :

ماجد الهذيلي/

يالمسري عشت وتعيش فالظل الظليل= ظلّنا دافي يظلّل عليكم بالظلال
أسمع العلم أسمعه وأفطن وخلك ثقيل= ما يفكك من يدين الرجال ألا رجال

المسرّي /

من متى وانتم ظلال القبايل يا هذيل=يا عراد الخبت لانتم قصور ولا جبال
من على جدّاننا ما نخاف الا الجليل=ومن يعادينا يلاقي المذله لا محال

ماجد الهذيلي/

أنت مثل العامل اللي تحت عم وكفيل = لوّ طال لسانه يشدّ ويشد الرحال
من يعاديكم لقى السيف منا يالهبيل = قول لأجدادك والأجداد تدري بالفعال

المسرّي /

يالهذيلي باقي الليل والمسرا طويل=مير طعني واعتض اعْن الخفيفات الثقال
انت في ضلعان مكه ولا ادري وش تكيل=ما دريتوا عن معارك ولا خضتوا قتال

ماجد الهذيلي/

انت في ذا الدار ضيف ٍ على عمك نزيل = شلت له رمحه وهو يقول لك روح وتعال
انت لو ماني معك كان يمديك القتيل = تنقتل ما ياخذ بدمْك عم ولا خوال

المسرّي /

كل ما خيّلتها غرب لا الشام المخيل=والله اني احترت في شوفتك يا ذا الخيال
كيف يحصل يا ولد شيّ من هذا القبيل=وانته اللي ما درينا بك الا ذا الليال

ماجد الهذيلي/

اللوح فعيونك تغيّر لعقلك بديل = منت عارف وش يمينك يصير ولا شمال
يجرف الوادي بسيله ويجرفك المسيل = خطوتك فالجرف والوادي الممطور سال

المسرّي /

كان تبغى الصدق خذها بدل قال(ن)وقيل=والله انك احقّ مني بهذاه المقال
انت ورع(ن)عارفك لا تحط ولا تشيل=والا كان من اول الملعبه جاك الزوال

ماجد الهذيلي/

كيف الألوح يحكم الحكم شي ٍ مستحيل = حكمه اللي يحكمه ياعرب شي ٍ محال
شيل حملك يابيض الوجه خضينا الصميل = أرتويت الما وذايق من العذب الزلال