تراحب القحطاني
البارحة كني على العين مخبوط = جالي على فراش المنام اختبطاطي
المعذرة يانوم ماني بمظبوط = كني من حبوب النشاط متعاطي
والراس من كثر الهوادف ظرب شوط = فكره من كبار التفاكير شاطي
وارسلت للي له تجاريب مخطوط = مجول ولد جلال زيد المقاطي
حيثه سلايل من يصوط العرب صوط =لاجاء نهارن فيه شيل وحطاطي
ياجعل والله فدوته كل خربوط = اللي يدور فالرخاء للهياطي
اللي ليا حميت وجاء للرمك شوط = راحت علومه كلبوها خراطي
اشكي له من اللي به القلب مربوط = لوكان مالي فيه اي ارتباطي
ابوعيونن كحلها غير محطوط = باسهامها جرح المعاليق ساطي
شمحوطن معزل ماهوب اي شمحوط = ماكنه الا من بنات الرباطي
اليا خرج في كنف سواق مشروط = ويبقى عليه من الحماة احتياطي
واليا دخل في قصر محمي ومحيوط = بمحنك الحراس فالانظباطي
ان كان عنده حل مرضي ومصفوط = فانا برجاء حله يعود انبساطي
وان كان لا فالحال ماهوب مغبوط = من بعد حال الطيب حال انحطاطي
لاباس يامن صابه من الهوى ضغوط = وفي بحره اللي مال مده شواطي
اصبح غريق بغبة البحر مقطوط = ومن دون مشهاه ازرق الموج خاطي
وجاء يشتكي فكره من الضيم ملعوط = وسط الظفيره غاديا له شياطي
ويقول يامجول ترا القلب مشحوط = من هجر خلن لاكمل الوصف حاطي
والعلم بين وجه ماهوب مغطوط =مثل النعايم في ليالي شباطي
مع ابومحمد دون معذار وشروط =ناقف وناضع للحروف النقاطي
ميقافن ابيض وجه ماهوب مغلوط =بجاه ووجاه ولا نحب التواطي
لاجل الخوي نقدم ولو طول الشوط= لو بالقدم ناطا بجمر الاراطي
ياما لبس خوينا من الفخر نوط =وياما بدا في كايدات المعاطي
لن كان ياتراحيب ماقلت مشروط = عليك خلك قد شرطها اشتراطي
ابشر بخلك ياقحطاني على نوط =اهل السلوم موثقات التعاطي
ابشر ببو عنقن على المتن ممطوط = اللي منه صايبك مثل المغاطي
وكان الهوى عندك بالاوهام منقوط = وسهمه يابن قحطان عالي وواطي
هالنوع ياما لاط بعض العرب لوط = ورجالهم عود سوات الشراطي
في وسط سوقن بالبظاعات مخلوط =متخالطن ريحانها بالحماطي
ماني معك قالط على ربع مقلوط = انا حريص وقد خذيت احتياطي
صوت وصدى
العرض الشجري