شايب هوواي وبنيه لعوب ......

[ابـن نـعـيـس]

السلام عليكم ورحمة الله وبركاته



بدايه القصه عن شايب اسمه( حمدان ) وهواوي قلبه خضر ما يشوف بنت الا ينفتن ومشهور بانه حبيب

فيه بنت ملكعه وصاحبة مقالب قالت في نفسها انا ليه ما اروح للشايب وامزح معه واضحكه شوي واشوف ردة فعله كيف تكون

راحت له وردت عليه السلام كيف حالك يا شايب رد السلام والله بخير الله يعافيس

وفجأه عطته ظهرها ومشت ولا استإذانت ولا شي :

ولع الشايب من حركتها وقال فيها كم بيت يستعطفها فيها ويقول انها ذكرته الماضي و اذا ما عطيتيني وجه لحقت باخوي حمود اللي في قبره ويذكر التاريخ واليوم اللي قابلها فيه

قام قال

يا بنت خوذي خاطري وارحميني=لا تجرحين العـود بعيونك الســــود
غضي نظرك وغطي الوجنتيني=لعل يومٍ جدد الجرح مـا يعـــــــود
يوم انتهى مع مرمسات السنينـي=جتني صواديفه على غير مقصود
باول شهر عشره نهار الثنينــــي=حمدان مروا به على جنازة حمود

البنت كانت تقصد من استفزازه انها تجاريه في الشعر وترد عليه والمسكين ما كان يدري انها شاعره وعلى باله ما خذ راحته في التغزل

فردت عليه

يا شايب الرحمن وينـك ووينـــي=عزي لحالك قدامـــك الباب مسـدود
قلبك عطوف وجاه قلـبٍ متينــي=والبنت ما تشفق على مغازل العود
حبل الرجا مقطوع بينـك وبينـــي=مثل الغليث اللي رعا قلبه الــــدود
اقفى شبابـك والعـرب مقبلينـي=يا عود ما يرجع من العمر مفقـــــود

حطمته يوم قالت له انك عود وان الشباب ما يرجع وان ما فيه امل تعطيه وجه
حس العود انه تورط وقال كم بيت يقول لها صدي عني انه ما يبي الغزل بعد ما وصل عمره ثمانين سنه

يا بنت صدي بالعيـون الظليلـــه=لا صد عنك الله نهـار القيامـــــــه
مالي ومالك يالفـروع الطويلـــه=لو فيك من رسم البـداوه علامـــه
يابنت ما لـي بالثمانيـن حيلـــــه=اهدف كما تهدف على البير قامه
اقفى شبابي والدهر شفت ميله=يالله حسـن الخاتمـه والسلامــه
اعطيك موجز والبضاعـه قليلـــه=واخذت لك من صافي الماء سنامه

راحت الايام والشايب مسكين سنه خذله معها شايب وهي بنت وتقول له كيف اعطي شايب وجه


بعد فتره مرته مره ثانيه وردت عليه السلام واستفزته وراحت وخلته ولع الشايب وقال ليه ما ابين لها في كم بيت انها بتشيب مثلي واني رجال طيب وان الناس تنصاني ومعروف بالكرم واني ما ابي منها غير التحيه والترحيب


فقال حمدان

يا بنت ما جاس الكبر والخشونـه=وعادت شباب اليوم يجفل من الشيب
ياسرع ما وبلـك تمـزع مزونـــــــه=يالفاتنه يـا ام الثمـان الرعابيـــــــب
يا بنت ما بينـي وبينـك مهونـــــه=كلمة شرف نبي تحيـه وترحيـــــب
الله مـن عـودٍ ثقيلـه طنـونــــــــه=ينصاه راع المشكلـه والمواجيـــــب
على الكرم والديـن نفسـه حنونـه=تلقاه بالاجـواد شـرق وتغاريــــــــب

جهز الابيات وارسلها مع عجوز ووعد العجوز بهديه اذا وصلت الرساله لها

راحت العجوز وعطت البنت الابيات شافتها البنت وقفلت على العجوز في غرفه وقالت مثل ما جيتي بابياته ترجعني بابياتي

المهم العجوز مسكينه أبلشت وأنتشبت وقامت تصايح طلعيني ولا ابي منكم شي الله لا يعودكم انتم واوراقكم ( مسيكينه وش دراها وش بينهم ووشهو أللي بهالأوراق )

ردت البنت ابيات اقوى من الاولى واكثر تحطيم مسكين الشايب ما احد رحمه حتى لو حاول يستعطف

وقالت هالبنت بالرد

العود عود وطايحـاتٍ سنونــــه=من كثر ما يرقد على جرة الذيـب
عودٍ مهرقل والعرب ما يبونــــه=ياعود ما لك في طويل المراقيب
اقفى شباب العود راحت حتونه=مثل اليتيم اللي بكا ما له مجيب
جداه ينثر دمعـة ٍ مـن عيونــــه=غريق موجٍ ما لقا له مقاضيـــــب

أتمنى أني قدرت أوسع صدوركم بالقصه والأبيات أللي قدمتها وأنها نالت على رضاكم ,, وأن ما أعجبتكم علموني وأنا أدور لكم غيرها

التوقيع