ديوان الشاعر والفارس : شليويح العطاوي ..!!!

[سيف النير]

السلام عليكم ورحمة الله وبركاته

هذه بعض قصائد الشاعر الفارس / شليويح العطاوي جمعته لكم

إذا فيه بعض الأخطاء أتمنى تصححونها معي .

قبيلته :ذوو عطية أحد فروع المزاحمة من جذم روق أحد جذمي قبيلة عتيبة .
وهم أهل شجاعة وفروسية منقطعة النظير..
يتفرعون إلى بطون ومنها :
المهادلة : ومنهم الفارس المشهور شليويح العطاوي
القساسمة : ومنهم الشاعر المشهور بندر بن سرور

يا ناشد عني تراني شليويح =قلبي على قطع الخرايم عزومي
لارحم ابو من صد عن محرفها= يوم انجلاع الستر عن مضاوي
نطعن لعين اللي تهل دموعها = تبكي وفي تالي البكا نخاوي
قلت ابشري بالفلك ياحم الذرى = دام الطعن بفك والاهاوي

وهذة احدى القصائد المشهورة للشاعر والفارس شليويح العطاوي وتدور قصتها في حادثة غزوة الامام سعود بن فيصل آل سعود عندما جمع معظم القبائل ليقصد الخطر الاكبر وهي عتيبه وهدفه كان مكان عتيبه على "طلال" الماء المعروف بوسط نجد وقد قال الشيخ تركي بن حميد قصيدته الشاذليه عن هذه المعركة ايضا كانت هناك معركتان على هذا المكان المسمى طلال لان الفارس شليويح قد ذكر ان الموجودين فقط هم من الروقة اما المعركة التي حضرها تركي فكانت تجمع عموم عتيبه ، وقد تجمعت قبائل مطير وقحطان وسبيع وعلى رأسهم الامام سعود بن فيصل آل سعود ، وكانوا الروقة نازلين على هذا المكان في طلال وكانوا معقلين أبلهم 3 ايام استعداد للرحيل لمكان اخر ، وفي اليوم الثالث هجمت عليهم قوة الامام سعود ودارت المعركة ببساله وكان من شجاعة شليويح في المعركة انه أسر كبير شيوخ مطير وهو سلطان البعَـير وألقاه من على ظهر فرسه ، فهذا الرجل يعتبر من كبار مطير من علوه ، وبالاخير ردوهم خاسرين ولم يستطعوا هزيمة فرسان عتيبه والتي قدرت خيل عتيبة التي صدت الهجوم بي 1500 فـرس من غير المشاة الذين ليسوا بخياله ، وقد كان هذا الرقم كبير جدا في ذلك الوقت ، مما يدل على انه كان هنالك استعداد ومعرفه مسبقة بالهجوم لوجود السبر ( والسبر هم الجواسيس الذين يكونون على بعد كبير عن مكان قبيلتهم ليشاهدوا أي تحركات ضدهم فينذروا قبيلتهم قبل اقتراب الاعداء منهم ) ، وقد انشد الفارس شليويح العطاوي قصيدته المشهورة بهذا المناسبة بعد الهجوم:

أول كلامي ذا بالهـدى ذكـر الله =ماني أبا تشجع فالبنـي هـواوي
يامكيف الفنجا ل عـده لمـدوخ =وأ ثنه لابن صـلال والجـلاوي
وانا زبون الحرد ابو ضيـف الله =لكشف البرطـم عـن الشفـاوي
رديت سلطـان ال بعيـر بينهـم =والشيـوخ مردولـة النـحـاوي
ورويت مذلوق القنا مـن دمهـم =يوم ادبحـوا شرابـة القهـاوي
ياطيبهـم لا قـرب الله دارهــم =وحنا عليهم كمـا نجـم هـاوي
تلا قـوا بريـه وطلحـا يمينـا =تعاقبوا دهـم الرمـاح هـداوي
كن جضع الز لم في نحور طلحه =جضع الخشب في الوادي السناوي
يا لعنبو من صد مـن محرافهـا =من يوم طار الستر عن مضاوي
كله لعينا شقحـا تجـر حنينهـا =تحـن تبـا صيفيـة المطـاوي
نخيت مزحم عز من هـم ربعـه =يوم اللقا زادوا علـى الهقـاوي
وانـا اذكـر الله ويمنـا سابقـي =والله ينجيهـا مـن كـل هـاوي
ألد روق ال لي صليبـن رايهـم =لجاء مـن الحكـام رد بـراوي
ألد روق اللـي عريـب جدهـم =لافيهـم لا اجنبـي ولا برقـاوي
تكفون ياظفـران مـن عاداتكـم =هوشو أظـن يبقيلكـم شـلاوي

كما ايضا ذكرت نفس القصيدة بترتيب اخر ويقال ان مناسبتها كانت في وقعه طلال الثانيه سنه 1290هـ وكان النصر فيها حليف الروقه بقياده شيخهم سلطان بن محمد بن ربيعان وهي كالتالي :

اول كلامـي طلبـت ذكـر الله =ماني عن الرب الكريم غنـاوي
لا نيب من يمدح بقوله لسانـه =ولا نيب في عشق البني هواوي
على طلال الصبح خيل مخيلـه =وصلت سناويها الى المطـاوي
تمطر بعطشان المحبـب والقنـا =ورعودها البـارود والعـزاوي
جانا سعود مسير بجنوده معـه =معه الدويـش ولمـة البـداوي
ثمانيـة الاف عـداد جموعهـم =بلوى وربـي يدفـع البـلاوي
وحنا ثمانمائة عـداد جموعنـا =ماش اجنبي فينـا ولا برقـاوي
وارخيت فيهم حد كـل مصلـة =يحير فيها طـب كـلا مـداوي
وارخيت فيهم حد كـل مجـرب =توحي له بروس الخيرين تعاوي
وارخيت مذلوق العريني فيهـم =لين ادبحـوا شرابـة القهـاوي
ورديت سلطـان البعيـر فيهـم =وشيوخ ما ردوا لهـا النحـاوي
يارب تنجـي وتنجـي سابقـي =يـارب تمنعنـا مـن الاهـاوي
ياظفرهـم لاقـرب الله دارهـم =وحنا عليهم مثل نجـم هـاوي
ذوي ثبيت أهل المناخ شيوخنـا =أهل العطف والمنزل المتسـاوي
نبب علينا شيخنا ابـن محمـد =أهل الربعه والمنزل المتسـاوي
صحنا عليهـم ثـم عاونـا الله =لين انها صـارت لنـا منـاوي
لكن سربتهم الي اوجهـت بنـا =زمول مخزمة علـى الكـراوي
لكن شليل الخيل قـدم ربوعنـا =مثل الجراد اللي انتحى متهـاوي
وطلحة نحوا عنا بريه يسارهـم =من بينهم دهم العروق هـداوي
تعيني بالبيض فـي مركاضنـا =وصلت كسايرهم الى الحجناوي
تزبنـوا عنـا قصـور عنيـزة =لين احتماهم بيرق القصمـاوي
لا رحم ابو من صد عن محرافها =يوم طار الستر عـن مضـاوي
نطعن لعين اللي تهل دموعهـا =تبكي وفي تالي البكـا نخـاوي
تقول يا الظفران مـن عاداتكـم =هوشوا عسى يبقي لنا شـلاوي
الاد روق اللي عريـب جدهـم =لاجا مـن الحكـام رد بـراوي
ونطعن لعين اللي تجر حنينهـا =عفرا تبـا صيفيـة المطـاوي
قلت ابشري بالفك ياحـم الـذرا =دام الطعـن يفـك والاهــاوي
ترعى بنا عوج الركاب وتنثنـي =ماحدرت حسلة الى الحجنـاوي
وانا احمد الله يوم انا من لابـه =ماهم بقطمان اليديـن شـواوي
الاد روق سعد من هـم ربعـه =يوم اللقا زادوا علـى الهقـاوي
يا مسوي الفنجال عده لمـدوخ =وعده لابن صـلال والجـلاوي
وانا زبون الحرد ابو ضيـف الله =لا قصر البرطم عـن الشفـاوي
والمدح لله ثـم نسـل محصـن =عسى لهم عند الالـه عـراوي
سواقة المغتر علـى الحريبـة =يوم الحريب عن الحريب يلاوي
واغفر ذنوبي يا محـل ذنوبـي =ان كنت في بدعي كلامي غاوي

يقول / الفارس (شليويح العطاوي الروقي) واصفا هذه المعركه /

جينا مع الطارف سرايا(ن) تقادي=خيالـة فيهـم سراويـل تومـان
وكنا على بوش(ن) يشوق المعادي=ومن دونها ثور عسـام ودخـان
غرنا ونرنـا واعتلانـا شـرادي=ولا عاد تلقى من هل الخيل فتـان
و(الطر)خلـي طايح(ن)للحنـادي=خلو شداد (الطر)ذربيـن الايمـان
الله لا يسـقـي جوانـبـك وادي=وادي(ن) حما جاله محمد وقطنان
من رمح محمد يركب(ن) السنادي=واللي يعديهـا الزماميـل قطنـان
اصقه ويدجر في نهـار الطـرادي=ومن لا يعرفه ما يصدق بما كـان
راحن ياطن الدعـث والشـدادي=ومكثرن قطنـان فيهـن الاكـوان
من غب كونـه والقلايـع تقـادي=بين الحشاش وبين فية رامـادان

اتى شليويح العطاوي فتاه لا تعرفه وهي ترعى الغنم فطلب منها شربه ماء من صميلها فقالت متكبره((والله لونك شليويح العطاوي ماتشرب من صميلي .بس افتح يدك))...ففتح يده وشرب وابتعد عنها وغنى هذه الابيات بحيث كانت تسمع قوله:

ان قلت الوزنه وربعي مشافيح= اخلي الوزنه لربعي واشومي
واليا رزقنا الله بذود المصاليح= اخذت قسمي من خيار القسومي
اضوي لو صكت علي النوابيح = واللي قعد عند الركاب محشومي
وان كان لحقوا مبعدين المصابيح = معهم من الحاضر سوات الغيومي
اليا ضربت السابق ام اللواليح = كلن رفع يمناه للمنع يومي
يامل قلب عانق الفطر الفيح = كنه على كيرانهن محزومي
ماخلف وعدهن كود ماتخلف الريح = و الا يشد الضلع ضلع البقومي
ياناشد عني تراني شليويح= نفسي على قطع الخرايم عزومي

وفي روايه: وذات مرة كان شليويح ورفاقه في إحدى الغزوات اصابهم العطش وشح عليهم الماء وكانوا بالصيف شديد الحرارة وأخذوا يبحثون عن الماء حتى عثروا على غار صغير فيه صخرة صماء تجمع بها الماء بعد المطر فتسابقوا إليه الكل يريد أن يشرب فقد أدركهم الهلاك . . . وخافوا أن يشربه أحدهم ويترك الآخرين . . . فاتفقوا على أن يزنوا الماء بالوزنه وكل واحد منهم يشرب بالوزنه ولا يزيد عليها . . . فكان شليويح لشدة عفته ومروءته وشهامته ورغم أن العطش بلغ منه ما بلغ إلا أنه كان يترك وزنته لرفاقه ويصبر على الظمأ حتى فرج الله لهم . . . وبهذه يفاخر فيقول

يا مـل قلبـن عانـق الفطـر الفيـح=كنـه علـى كيـرانهـن محـزومـي
ما أخلف وعدهن كود ما تخلف الريـح=وإلا يشـد الضلـع ضلـع البقومـي
يـا ناشـدن عنـي ترانـي شليويـح=نفسي على قطـع الخرايـم عزومـي
إن قلَّـت الوزنـه وربعـي مشافيـح=أخلـي الوزنـه لربعـي واشـومـي
واليـا رزقنـا الله بـذود المصاليـح=يصير قسمـي مـن خيـار القسومـي
واضـوي اليا صكـت على النوابيـح=واللي قعـد عنـد الركـاب نخدومـي
وإن كان لحقـوا مبعديـن المصابيـح=معهم من الحاضـر سـواة الغيومـي
اليـا ضربـت السابـق أم اللواليـح=كلـن رفـع يمنـاه للمنـع يـومـي

فيه هذه المناسبة حيث انشد في فتاة وقع في حبها:

يا فدى عشيري من عظامه تقلّه=البدو اللي يلبسون الجزارا
وابن رشيد الشمّري فدوة(ن) له=مغدي فراقين البوادي وقارا
ومن عرض ما يفداه غوج(ن) تتلّه=وقطعاننا ومثنديات الصدارا
والشيخ يدمح لي ثمانين زله=والاش ماني عن زراياه دارا

ولما وصلت هذه الابيات لسمع الامير محمد العبدالله الرشيد((المهاد)) امير حائل المشهور ، قال أفراد حاشيته:

كيف يفدا بك شليويح العطاوي مرأة وأنت حاكم!!؟ ،

فأجابهم ابن رشيد:
أخو نوره ، شلويح علي زلّه وحده وطلب مني ثمانين وانا ماني لاش!!
وقصده ما قاله شليويح في بيته الأخير .

ثم تمثل ابن رشيد بهذه الابيات لشليويح العطاوي:

يا واصل مني شليويح قل له=في سد وجهي من جميع المزارا
لاعاد شيخ وكل عقد(ن) يحله=بالقيظ يتعب حافيات السمارا
والله ما ألومه لا فداني بخله=حيث ان جار(ن) له من الود جارا
قبله لطيف الروح حالي يتلّه=تل السلوك المبهمات الابارا

قصيدة للشاعر الفارس/ شليويح العطاوي العتيــبـي متغزلا في احدى النساء وخلط ذلك بمواصفات الفروسية التي يتحلى بها:

ياليتني جنبت مناك مناك=ولاجيتهم مستردف لي رديفي
ولاجيتهم من فوق دمثات الأوراك=شيب الغوارب مبعدات الوليفي
لاوالله الا علقوني بشباك=شبك الدلي من فوق قامت عفيفي
ان كان مقبل كل ماقلت يفداك=ماحدت البصره لدار الخليفي
وان كان مقفي قلت يابكرة الراك=مايتبع المقفي ياكود الضعيفي
يابوهدب عين الى طرفت افكاك=يضفي الى حد الحدق بالرفيفي
ياحمود سق في شمعة الدار حمراك=لو كان بي تهفي بشان الشريفي
دوك اللقوح وبنت خرمان تقفاك=صفر صفوق اذيالهن بالخليفي
ويش الحول في بنت ذباح الأتراك=مرخي على ارقاب السبايا الرهيفي

من كثرت مغازيه اخذ قومه يلومونه على ذلك فقال شليويح :

زاري علي اللي عسى ابوه للنار = متبجح في مال ابوه المياتي
ما قط يوم فيهوا له بمعبــــــــــار = وانا الشتا والقيظ هذي سواتي

وكانت بنات البادية يعشقن الفارس ذائع الصيت ويتمنون ان يروا ذلك الفارس عن قرب وهذا ماحدث للفتاة نيلة التي كانت تواقه للنظر للفارس شليويح والتي غطت سمعته براري نجد ، وفي ذات يوم سنحت الفرصه للفتاة نيله عندما قدم الفارس شليويح من احد المغازي فجلست مع النسوة خلف ظهور الرجال وكان شليويح في المجلس فسأئلت من هو من هولاء الرجال فأشرت احدى النساء عليه ، فقالت نيله لها وجهه اسمر وقامته قصيرة وياليته مثل شكل فلان وطوله ، لان ذلك الرجل الذي ذكرته طويل القامه ابيض الوجه ، فسمع كلامها شليويح فقال :

نيله تطالعني بوسط الجماعه=و اظن نيله لامستني بمنقود
ياما تعرضنا الفني والمجاعه=ولامسك الملهاب يا لين العود
وفي الليل يسهر مثل راعي زراعه=وفا الصبح تصلانا السمايم على القود
وميرادنا عد تعاوى سباعه=خاشرت فيه ذياب نمور واسود
وياليتها معنا على الهجن ساعه=حتى تعذر وجيهنا لو غدت سود
وتشوف فينا من فعول الشجاعه=وتشوف فعل اللي كما السدو ممدود
وتشوف شغموم طويل ذراعه=صبار في الشدات نطاح للكود
وتشوف حمال بتوع بتاعه=مثل الفهد يلفي من الصيد بفهود
وتشوف خبل همته في متاعه=لانافع ربعه ولا هوب مفقود
ولاهوب طماع يجيب الطماعه=ولايقضي اللازم ولا كاسب فود

وايضا لسمعته التي غطت الجزيرة والقبائل العربيه كلها ، احبت فتاه ان تشوفه لانها عشقته وعشقت شجاعته وعندما رأته تغيرت نظرتها له ، فلم يكن طويل القامه وابيض الوجه كما تمنت ، فقال شليويح لها :

ياعيد دونك شوشت بي هلاله=شافت بوجهي ياعضيدي سهومي
وجهي مسويته لواهيب لا له=من كثر ما ننطح لهيب السمومي
ان قيلوا ربعي بخطو السلاله=انا رقيبهم بعالي الرجومي
وإليا قضا منا توالي البلاله=اخلي التالي لربعي وشومي
وليا حصل عند الركايب ظلاله=انا نطيح للعيال القـــــرومي
كم شيخ قوم ناثرين دلاله=غنايمه بايمان ربعي قسومي

ذهب هو وبعض شيوخ قبيلة عتيبة ، زمدوخ وبن صلال والجلاوي ، كلهم لأحد الشيوخ أيضا ومن نفس القبيلة لخطبة إبنته أو بالأحرى انهم اجتمعوا عنده بالصدفة وكلهم يقصد الخطبة


شليويح بيعرف بنفسه عند البنت ....
يوم ابوها قام يصب القهوة للضيوف قال شليويح هالبيوتات :ـ

يامسوي الفنجال خز زمدوخ=واثنه لبن صلال والجلاوي
وأنا زبون الحرد أبو ضيف الله=إن قصر الشارب عن الشفاوي
أنا أحمد الله يوم أنا من لابه=ماهمب قصار البتوع شواوي

يفهم من القصيدة ان ترتيب الضيوف كان زمدوخ ثم بن صلال ثم الجلاوي ثم شليويح يعني هو اقرب واحد للشق ...

قال المضيف لضيوفه وش حاجتكم قالوا خطاب ونبي بنتك ..

الضيوف عند مضيفهم مثل الواحد كلهم شيوخ ويملون العين ويعجبون أي واحد بيزوج بنته ...
ولكن خروجا من الإحراج قال بسئلها ولا انتم كلكم واحد عندي ...

صوت للبنت وقال :ـ
يابنت هالشيوخ كلهم يبيك وش رايك ..
عاد البنت بيني وبينكم تبي شليويح لأنه يمكن اصغرهم أو لأنه اطيبهم عندها ـ المهم ـ قالت يابوي كلهم شيوخ عطني أقربهم لي ما يصير اتعداه لغيره ...فتزوجها شليويح...

شاع صيته وذاع اسمه وسمع به من لا يعرفه وعرفه من لا يراه . . . ومن طريف ما حصل لشليويح أن إحدى بنات البادية أحبته دون أن تراه ولكن كعادتهن يعشقن الطيب والشجاعة على ما يسمعن عنه
المهم أن الفتاة وضعت جائزة لمن يريها شليويح أو يكون سبباً لرؤيتها له جملاً تعطيه له . . . وحصل أن رأته . . . فقالت له : ذكرك جاني وشوفك ما هجاني , بمعنى ليتني لم أرك . . . وكان وجهه أسود من لفح السموم كما أن هيئته صارت شعثة من كثرة التعب والمغازي . . . لما سمع شليويح كلامها أجابها بقوله

يا بنـت ياللـي عن حوالـي تساليـن=وجهـي غدت حامي السمايـم بزينـه
أسهـر طـوال الليـل وانتي تناميـن=وان طـاح عنك غطـاك تستلحفينـه
أنـا زهابـي بالشهـر قيـس مديـن=ما يشبعـك يـا بنـت لـو تلهمينـه
مـرة تضحـي والمضحـا لنا زيـن=ومـرة نشيلـه بالجـواعـد عجينـه

ان الفارس شليويح العطاوي لايتغزل ابدا بدون اي سبب ، فالفارس لايهمه الغزل بقدر المكاسب والمغزى ويقول :

من فضل ربي ماعشقت الرعابيب=مدري طبع او مبعدتني قلاعه
خاويت شبان على الفطر الشيب=كم ماردن جيته تعاوا سباعه
يا ما لمسنا قرصنا بالمشاعيب=وياما دفعناهن ورا الشمس ساعه
كم ليلة عقلتها تضرس النيب=وانا اتوحى نبح كلب الجماعه
رحت اتخطى كنهم لي معازيب=اليا رمى عذب الثنا قــناعــه
اهدي الحامي واخطر الاطانيب=واندس مهاوية الجمل باندفاعه

وحفظكم الله من كل مكروه


والسلام عليكم ورحمة الله وبركاته


أخـوكـم / سـيـف الـنـيـر .

[ربوع نجد]

لاهنت يا الغالي على الموضوع الرااائع

شليويح جمع الفروسية والشعر

رحمه الله ورحم جميع اموات المسلمين

[راع الدوليه]

الله يرحمه كان شجاعا وشاعرا مبدع وشكرا لك علي الموضوع بس تري قصيدة يوم طلال ناقصة لانها كانت ملحمه شعريه رائعة ياليت احد يزودنا بها مرتبه وكامله

[الرتوعي]

انا اشهد يا سيف النير كفيت ووفيت
وشليويح من اعلام قبيلة عتيبه المشهوره
والله يرحم اموات المسلمين

[سيف النير]

المشاركة الأصلية كتبت بواسطة ربوع نجد

لاهنت يا الغالي على الموضوع الرااائع

شليويح جمع الفروسية والشعر

رحمه الله ورحم جميع اموات المسلمين

الأخ القدير / ربوع نجد

حياك الله

وشاكر لك على مرورك الرائع لمتصفحي

وحفظك الله من كل مكروه

والسلام عليكم ورحمة الله وبركاته


أخـوك / سـيـف الـعز .

[زياد المغيري]

بيض الله وجهـــــــــــــك

شاعر معروف رحمه الله عليه

[محب الهيلا]

مشكور وماقصرت على ماقدمت

[عاشق السر]

الله يرحمه وموات المسلمين

[عبدالله هادي ناشي الفليت.]

لاهنت وصح لسااااان شلويح فارسناااااااااااااا

[سيف النير]

الله يعافيكم

وشاكر لكم مروركم الرائع لمتصفحي

ودمتم في حفظ الرحمن

والسلام عليكم ورحمة الله وبركاته


أخـوكـم / سـيـف الـنـيـر .