حتى السرور من اسمها سموه والاسم الثمين

[حميد السجايا]

السلام عليكم ورحمة الله وبركاته
اليكم هذه الابيات وهي احدث قصائدي بتاريخ 5/12/1430هـ
والقصيده تعبر عن نفسها

البارحة وانا اتذكـر فرحتـي جالـس حزيـن=اتذكر ايام الفـرح واقـول صبـرك ياحـزن
واقول كم لي فالحزن مرت علي اربـع سنيـن=ابوك ياحـزن الجفـا ابـوك ياحـزن الفتـن
فجأة وانا في موضعي وايدي من فوق الجبيـن=هلت علي بروق مزنة وارعـدن ثـم ابرقـن
سحابـةٍ تمطـر علـي ونوهـا عـم البطيـن=ودانها يسقي الحشا واسيولهـا ترطـن رطـن
سميتها نبع الوفا والمـال والحصـن الحصيـن=ياطيبهـا ياطيبهـا وشلـون احـط الهـا ثمـن
يـادرةٍ باوصافهـا تكمـل بـكـل الحالتـيـن=ياشبة وضحىً ربعة في نجد والا فـي حضـن
ياقيصرية شيخ يسوى لـه ميـة شيـخٍ فطيـن=عندي اخير من اليمن واخير عندي مـن عـدن
لو خيرونـي فالـدول قالـو تخيـر دولتيـن=واترك لنا الـدرة وروح لا نشوفـك تطحـن
قلت ابعدوا كل الدول ماهي تساوي خصلتيـن=مـن درةٍ ضميتهـا داخـل عيونـي واسعـدن
حتى السرور من اسمها سموه والاسم الثميـن=تستاهله واتمثله والهـا معـه سـاس وحصـن
لبى العيـون الـي تشابـه للبـرد فالمزنتيـن=الي قريبه من بعض واللون صافـي كالسمـن
ولبى الجبين الي كما برق الحيا نوضـه يبيـن=للي ورى سيهات وبروقه تقـادح فـي دخـن
ولبى الخصر يشبه لقوس للربابه مـع ذهيـن=وزنة تقاسيمه على الوضـع الطبيعـي متـزن
ولبى الصدر صدر اشقحٍ فالوكر مربوط وسمين=واللون لونٍ للذهب يصقل على اللمعـه يجـن
ولبى ولبى كل مافيهـا علـى بعضـه يزيـن=مثل العسل مثل العسل, مثل العسل والا الجبن

اخوكم
متعب العالي

آخر تعديل حميد السجايا يوم 23-Nov-2009 في 09:54 AM.