وحتى يصير الوقت ... ما هوب مقلوب = على الذيابة ... لا تهوش البساسا

[عبدالله الفرهود]

ياللي تبث السم ... من كل حاسوب = و تحط .. في كل الأمور ... إلتباسا
حنّا .. كما غيثٍ من المزن ... مسكوب = يسق الثرى ... و أنته عروقك .. يباسا
و أنا .. صبرت .. وقمة الصبر لا .. أيوب = اعطي ذهب ... و أخذ بدله .. النحاسا
و أطى على جمرٍ .. من السمر مشبوب = من خوف .. لا .. تفرح علينا الهلاسا
لكن .. ليا طالت .. فلا نيب مسلوب = سويت فنجان .... يزيل العماسا
هواجسي .. ماهيب تشرب من الكوب = إن .. طالة الشّطّة .. و زاد الحماسا
ولا نيب .. أوردها على كل .. مشروب = آرد .. على الجمّة .. و اكب الرساسا
بنيت .. بيت العزّ .. طوبٍ على طوب = بيتٍ .. بفضل الله .. جويد الأساسا
و الهاجس .. اللي نحلته .. تنتج الذوب = من قرصته .. يقمز .. ثقيل النعاسا
ياخذ و يعطي .. مع هل العقل .. باسلوب = و الجهل .. غابة شرعها .. الافتراسا
لي نظرتي .. و الناس .. غالب و مغلوب = ون جيت .. أناقش .. معدمين الحواسا
قالوا .. سواد الليل .. ماهو مرغوب = قلنا .. جعله الله ... لخلقه .. لباسا
لو كان .. لبس .. البشت و الكوت .. و الثوب = ما يستر .. أصحاب الفتن .. و الخساسا
اللي بهم .. ميّة و تسعين ... عذروب = أقلّها .. هرج القفا ... و الدساسا
محصولهم .. ذمّ من الناس ... و ذنوب = و أفكارهم .. فيها الردى ... و النجاسا
ولا منهم .. اللي يندعى .. حزة النوب = يدعون .. لا صارت .. بطول الحساسا
تحزن ..إذا شافت من الناس .. محبوب = و تفرح .. إذا جاء بالسلوك ... إلتماسا
و لسانها .. ما بين شاذب و مشذوب = و أخلاقها .. فيها .. بلا ... و إنتكاسا
ياليتها .. ترجع عن .. الكذب .. و اتوب = و الغدر .. و التدليس ... و الاختلاسا
و تدرك .. بأن الوقت .. حاسب .. و محسوب = ونّ .. الذنيب ذنيب .. و الراس راسا
و العدل ... و الإنصاف ... و الحق .. مطلوب = و إلا ... تساوت روسها ... بالمداسا
و اللي .. قسمه الله .. مقدّر و مكتوب = و النور .. يظهر .. لو يطول .. الدماسا
وحتى يصير الوقت ... ما هوب مقلوب = على الذيابة ... لا تهوش البساسا