سلام الله على ربعي عتيبه متعبين الخيل = رجالٍ لو يدور الوقت يبطي ما يفرقها

[حومل]

سلام الله على ربعي عتيبه متعبين الخيل=رجالٍ لو يدور الوقت يبطي ما يفرقها
يقوم الشاعر اللي يفهم التوصيف والتحليل=ويقعد واحدٍ لا كبرت الدعوى يصلفقها

[رفيع المنزل]

انا برد عليك لكن ارجع بعد ساعة اذا تسمح كتبت ردي

[حومل]

ما فيه اشكال

[رفيع المنزل]

اجل استلم

هلا يامرحبا بك ياالعتيبي ياقوي الحيل = من رجال ٍ نقول الله يوفقك ويوفقها
وصلتك مار هات العلم بالجمله وبالتفصيل= لكن خل الدعاوي هينه والناس رافقها

[حومل]

أنا أشوف البروق اللي تلوح ولا لقيت السيل=حسافه يامزونٍ هيّض البدوان بارقها
لو أنا نتبع الموضوع بالتفصيل والتمثيل=حمينا الناس وأعمينا الحراميّه لا تسرقها

[رفيع المنزل]

يبي يطغى عليك السيل ياللي للبروق تخيل = علامك متعب ٍ نفسك على القسمه ومرهقها
ترى العربان كل ٍ دون حلقه والجمل للشيل = وكل الناس بحماية ولي العرش خالقها

[حومل]

يقولون الشواوي هددّ أهل الجيش وأهل الخيل=وأنا أقول البشر يا الله دخيلك من مطفـّقها
ليا رد البرى يا صاحبي والصبح عودّ ليل=ترى للناس روسٍ للمعالي دوم تسبقها

[رفيع المنزل]

يقولون البشر للي زعل يشرب مياه النيل = ياراع الهقوه اللي دونها مانته بلاحقها
ليا رد البرا تلقا رجال ٍ مارضت بالميل = تسل سيوفها اللي روس بعض القوم تحلقها

ترى الاتصال عندي شوي تعبان

[حومل]

ترى بعض الائمة ما يجيد الجهر بالترتيل=يا راع الكلمه اللي تحرجك قدام تنطقها
أنا بنشدك عن بنتٍ تكف الدمع بالمنديل=تبا النادر يفوز ابها تبا الخايب يطلقها

[رفيع المنزل]

ترانا مانناظر بالنجوم الا الجدي وسهيل = ليا جت للعلوم اللي موثقة ٍ حقايقها
هذيك البنت عندي وانت ماتملك لها توكيل = انا اللي فزت فيها وانت يارجال فارقها