من سوالف الأولين>> لاتفوتكم رررهيبه..!!

[ابن محماس العصيمي]

من سوالف الأولين>> لاتفوتكم رررهيبه..!!

--------------------------------------------------------------------------------

* *



هذا ياطويلين العمر

واحدن قال لاهله اخطبولي ودي اعرس المهم ان اهله خطبو له وحدتن ماشاء الله تقول للزين وخر واجلس متسانك..




واعرسو وحطو هاك العرس الحنان الرنان وماشاء الله

دخل على حرمته هو شافها والا ماشافها انقلب وجهه ما يدري وش جاه

المهم من شافها قال ..

الله واكبر تسنه الموت جاني ** يرجس بحجوله مدخلينه عليّا

ومعطرينه بالزباد العماني ** تسنه جيفة في ( جيوبي ) منيب متأكد من اخر كلمه

بس يعني من شافها وهو كن فيه الموت ماحبها ابدن ابد..

وانها مشخصه له وحاطه من هالعطر الزين اللي يقاله زباد عماني وهو كنه شامن ريحه شينه يعني من شده كرهه لها ..

عاد هي يوم قال هالحتسوه ردت عليه وقالت

الستر يا ابن حمود واعطيك مالي ** واربع ليالي لا تظهر عليه

يعني استر علي جعلك للجنه يا ابن حمود واعطيك كل مالي واللي تبي

وش بيقولون الناس طلقها في ليلتها لو اربع ليالي

عاد بعض الاولين الله يصلحه مافيه رحمتن ابد

قال ..

والله لو تعطيني مال فردوس مع أباعر غزيه ما استر عليتس

يعني منيب مقعدتس لو ليله عندي روحي الله يستر عليتس

الاباعر .. هي البعارين ..


***************************************

هذي بعد وحدتن وش حليلها غنيه وعندها حلال ومال ومعرسه ورجلها يعزها ويحبها وهي تموت فيه

دخل عليها يوم وهي تقرص على المقرصه بتزين له غداه ..

قال يا ام فلان طالبتس وماترديني ..

قال انت ماتطلب تام امر

قال ابي بعض صوغتس واللي عندتس ودي اروح اترزق الله

قال سم وابشر وهذا صوغي كله وتعطيه اياه ...

ويروح الرجل بقوله يترزق الله

هالحريمه وهي جالسه في يوم من الايام وتجيها حرمه قالت تدرين رجلتس وينهو؟؟
قالت ايه رايحن يترزق الله..

قالت الله يرحم حالتس رجلتس اعرس وانتي تقولين رايحن يترزق الله ..

بعض الحريم الله يصلحهن ياحبهن للشر طيب دريتي عظي على شحمه ونطمي ..

ماعلينا هالحريمه من ضيقتن جتها ياربي وش تسوي والقطي عبيتها وروحي في البر عند شجره وتقعد تبتسي وتبتسي

وقالت ..

صوغي غدا وابو عيالي تنكر ** ومافيكم يالنشاما من يجيبه

طلع عليها واحدن من اهل الارض بسم الله العظيم الاعظم >> يعني جني

وقالها ..

روحي عليتس الله وامان الله ان ينكس صوغتس ورجلتس

راحت لبيتها وهي متروعه ..

ويروح هالجني بسم الله ويلاطف الرجل وحرمته الحريمه غدت مهبوله وعجز هالرجل يقرا عليها

ويعالجها بس ما من فود ..

راح الرجل لحرمته قال سويتيها يابنت اللذينا قالت ..

ما سويت شي هذا ربي راحمن ضعفي ...


هنا نشوف وشلون الحريمه ربي رزقها على حسن نيتها جعلها للجنه البارده .. واموات المسلمين

*************************

كانت حرمته طيبتن بالحيل وماجاه منها الا بنيه وحده ...

المهم جاها مرض ومرضت ياعمري وتوفت ..

وخلت بنيتن وحده

هالرجل قال ورا ما اعرس غدي ربي يرزقني حريمه سنعه تداري بنيتي

وتعاملها مثل بنتها

المهم المره تعامل البنيه في حظرته معاملتن الله انها ولا راح الله يهديها

دخل مره ولا شوشه بنيته طايره

ويوم شافها ضاق صدره وقال ..

يالجوهره راستس مشوش ومحتاس ** راح العميل اللي يعمله ويسويه

والله لولا الحيا والخوف واداري الناس ** لاقعد على حيلي واعمله واسويه





وهاذي قصص من بعض سواليف جدانا الله يرحمهم ويبيحهم
يازين زمان اول بس..!!

(( منقول ))

آخر تعديل ابن محماس العصيمي يوم 03-May-2008 في 03:24 PM.

[محب الهيلا]

مشكور ويعطيك العافية

على هالقصص الرائعة

[فالح الهاجري]

يعطيك العافيه على القصص الرائعه

[/عبد العزيز الجذع/]

الف شكر يابن محماس..

[عبدالله الجـــذع]

والله قصص حلوه مره
لاهنت يالغالي ابن محماس

محبك

,’

التوقيع

قال الرسول صلى الله عليه وسلم [مَنْ قَالَ أَسْتَغْفِرُ اللَّهَ الْعَظِيمَ الَّذِي لَا إِلَهَ إِلَّا هُوَ الْحَيَّ الْقَيُّومَ وَأَتُوبُ إِلَيْهِ غُفِرَ لَهُ وَإِنْ كَانَ فَرَّ مِنْ الزَّحْفِ ]( سنن الترمذي ) . . قال صلى الله عليه وسلم : ( إن الشيطان قال : وعزتك يارب ! لا أبرح اغوي عبادك ما دامت أرواحهم في أجسادهم ! فقال الرب تبارك وتعالى : ( وعزتي وجلالي , لا أزال اغفر لهم ما استغفروني ) ... ( السلسله الصحيحه ) . موقع يضم جميع القراء هنا

[القادم بقوة]

مشكور يالقرم
لك
ولله اني رحمت راعية القصة الاوله

[فهد النفيعي]

مشكور والله يعافيك

[ابن محماس العصيمي]

الله يعطيكم العافية ومشكورين على المرور ..