الشاعر الكبير محمد بن حويل العصيمي

[صامل الميقاف]

بسم الله الرحمن الرحيم

قصيدة للشاعر الكبير محمد بن حويل العصيمي يمدح فيهاالشيخ الشاعر مطلق الجرد المليحي السبيعي رحمةالله عليه


ياابوفهد جيتك مسير وناصيك منصى الرجال اللي تنصى الرجالي

انا نصيتك طامع بالوفا فيك وانته تحل معقدات الحبالي

لاتحسب اني طول الايام ناسيك تراك ياكساب الامجاد غالي

يالجرد ريف اللي من الوقت ناخيك تصبح ذرا له عن هبوب الشمالي

واقول يامطلق عسى الله يقديك على طريق الطايله والعدالي

ابوك في كسب الجمايل مربيك مرقيك في روس الهضاب العوالي

انت الحصان اللي طوال مداليك نفخر بذكرك يوم حل المجالي

دنيا ودين وثابتات مواطيك وانت الحكيم اللي تحل الشكالي

وانت الفهيم اللي تحل الشرابيك يوم المضاهي ماكسب راس مالي

جدك على طول الليالي يناديك مجنى جدودك من طوال المدالي

انااشهد انه بالجمايل موصيك بالجود والمدات ماله مثالي

يا كاسب الطالات نفخر بطاريك ياما عطت يمناك من كل غالي

مدتك جزله حيثها من هقاويك وهذي فعايل طيبين الرجالي

انت الذي تكرم شوارب عوانيك وريف لمن يشكي صدوف الليالي

وجهك طليق وواضحات دعاويك وانته لربعك مثل شرب الزلالي

الله من اسباب المقاديرينجيك ينجيك ياراع الشحم والدلالي

عساك يا مطلق تنور لياليك عز من الله ياكريم السبالي

ولانستمع للصايع اللي هرج فيك ما يفهم اهل الطيب ياهملالي

وانته طويل ذراع مافيه تشكيك طيبك يعبرلك جنوب وشمالي

الخلق تشهد لك بمدات اياديك ياما عطت من دقها والجلالي

فعايلك بالجود تحمي قوافيك تعرف حبالك في المراجل طوالي

تم الكلام وزبدة الهرج تكفيك وصلاة ربي عد وبل الخيالي

على الذي مافيه ريب وتشكيك شفيع الامة يوم ميل وعدالي

وانتم سالمين وغانمين والسلام