استمع في قصة يمكن تزيد جروحك الملتاعه

[نواف بن منصور]

الشاعر /سفر الدغيلبي

الله اكبر يالنفاعي مادريت بموقف حاصلي=لليلة البارح حصلي موقف نفسي منه مرتاعه
جاني المرسول شين القول من ديرت حسين الدلي=قال انا جاين بعلم الصدق مافي هالمجال اشاعه
اول المبدا تلقيته وقمت مرحباً ومهلي=قلت يالمرسول خبرني عن المجمول كيف اوضاعه
ارتبك ثم قال والدمع الغزير من النظير يهلي=ياقوي القلب قلبك صلب لكني بأزيد اوجاعه
ياسفر خابرك مسلم وابن مسلم صايم ومصلي=تدري ان الموت سنه والجزع ماينفع الجزاعه
ياسفر وجه الله الدايم وكل اللي سواه مولي=قبلنا وين الرسل والانبياء اللي للبشر شفاعه
قلت ذي علوم خابرها وعجل ويش عندك قلي=قال لي خلك طلبك الحل واخذ العلم سمع وطاعه
احسن المولى عزاك وخل قلبك بالصبر متحلي=واستمع في قصة يمكن تزيد جروحك الملتاعه
والله اني واقفٍ عنده وحاضر يوم موته حلي=قبل ينطق بالشهاده صاح باسمك صيحةٍ مع راعه
والسبايب كلبوها من فراقك سل حاله سلي=طال سقمه وانزعوا روحه ملائكة السماء النزاعه
ومن عقب نفسه مافاضت لحفوه بقطعة من زلي=وغسلوه وليموا جدايلٍ فوق النحر منداعه
وكفنوه بخرقةٍ بيضا لها سمكٍ يساوي ملي=وطيبوه بمسكٍ اصلي مايرخص بالثمن بياعه
وانقلوه للمسجد الديره على بداية زوال الظلي=شوف عيني شايلينه فالنعش في روحتة وارجاعه
ومن عقب صلوا عليه العصر شيل ووسط قبره دلي=حاضرٍ يوم انهم وطوه من راس القبر للقاعه
حولوه وفاللحد لقوه قبله والتراب انهلي=واركزوا نصيبةٍ مقدارها بالطول حول ذراعه
عان موقعها بشرق المقبره كانك تبى تدٌلي=مقبره فارض خلا لا فيه بنايه ولا زراعه
واتركوا صاحبك بالمثوى الاخير وفي محله خلي=والفجيعه في وجيه الناس واشكال الحزن وانواعه
كل من حضر العزاء قال ان قدره عندنا متعلي=ماشكا جاره من جواره ولا يمشي دروب الضاعه
صاينٍ عرضه ومعرض عن هروج الناس دق وجلي=ماتولع بالهواتف والسوالف من وراء السماعه
ولامشى مشي الدلع فالسوق بين معليٍ ومدلي=ابدويٍ مولع بالذود في مقياضه ومرباعه
ياعسى غر السحايب فوق قبره كل لليل تهلي=والنسيم يسوقها بركود وينوش القبر ذعذاعه
ياسفر هاذي علومي وانت خلك فاطن صاحٍ لي=اقتنع ولا زمانك يقنعك ياللي صعيب اقناعه
انفجعت وكن في وسط الضماير ثورة العصملي=وبردة عضامي وراسي صابته دوخه وزاد اصداعه
قلت لو طال الزمن مالك خشيرٍ بالهوى ياخلي=مخلصٍ لك حي واليا مت حبك فالضمير وداعه
ثم جذبت الونه اللي حرقت قلبي وزادت غلي=وابرك الحزات يوم اني سمعة الفجر صوت الساعه
اثرها هذاري الشيطان ياعايض وحلم زلي=الله يكافي ويحمانا من الشيطان هو واتباعه

وسلامتكم