هذه القصيده القاها احد شعراء عتيبه وهي مشهوره بعد قضية سعود بن بدر الشيباني
بيّض الله وجه من زبّـن دخيلـه=في لهيب الوقت والاّ فـي بـراده
يا مشايخ جهم وأفـراد القبيلـة=كل واحد مـا تناسينـا أجتهـاده
إلكم البيضاء على راس الطويلة=تستحقون البياض مـع الاشـادة
بأمر سلطان الدخيل أخلوا سبيله=أعتقوه وأمر سلطـان أعتمـاده
وأنتخى سلمان قال أنـا كفيلـه=وأرتكى له لين حقق لـه مـراده
الأمير اللي نـدر فعلـه بجيلـه=ما أستراح الاّ بعد حلّـوا قيـاده
هم سلالة يعرب ونعـم السليلـة=وهم ذخاير عزوة العـز وعتـاده
وهم عيال اللي ركب فوق الكحيلة=وأستعاد شـدَادْ جـده أستعـاده
الامام اللي معـه حيـلٍ وحيلـه=وحّد الامّـة بعـد وحّـد بـلاده
يا قبايل جهم وأصحاب الجميلـة=والجمايل عندكـم طبـعٍ وعـاده
يا رجالٍ في مواجيـب الفضيلـة=تبذلون النفس والمـال بزيـاده
يا رجالٍ مـا تشيـل الاّ الثقيلـة=تنقل الحمل الثقيـل بـلا هـواده
الرجال اللي توفـي كـل كيلـه=توفي المكيال في موسم حصـاده
بالشجاعة معهم سيوفٍ صقيلـه=وكل رجلٍ لا لفى يقـدح زنـاده
يفعلـون الكايـدة والمستحيلـة=والفعول الطيبـة أزكـى شهـادة
بالكـرم مدّاتهـم دايـم جزيلـة=ما ضروا في مدّة اليمنى زهـاده
وللوفاء ما دوروا رد وحصيلـه=يبتغون أفضال من حنّـا عبـاده
والفعول الطيبة مـا هـي قليلـه=كلهـا تنبيـك ان القـوم سـاده
جدهم مقبـور واقـف بالنثيلـه=رمز حمّاي الدخيل أن طب مـاده
مرحبـا عـداد بـرّاق المخيلـه=بالرجال اللي مشاهدهـم سعـاده
مرحبا ترحيبة الجـود الاصيلـه=عند من يكرم كريميـن الوفـاده
ومرحبا ترحيبة الـوادي لسيلـه=ومرحبا ترحيبة الطيـر لهـداده
ومرحبا في كل يوم وكـل ليلـه=مرحبا ترحيب ما يحصى عـداده
والنفيعي سطـر ابيـات جميلـه=هيضه فعل الرجال أهل الريـاده
وأن قبست النار في راس الفتيله=جوك ربعـي للمـات وللشهـاده
عزوة الهيلا عتيبة فـي الدبيلـه=خصمها ما يهتنـي نومـه وزاده
عزوةٍ يا سعد من هو ترتكي لـه=ورعهم حرّاب من يـوم الـولاده
ويا مشايخ جهم وأفراد القبيلـة=كل واحد مـا تناسينـا أجتهـاده
إلكم البيضاء على راس الطويله=تستحقون البياض مـع الاشـاده
وبيض الله وجه من زبَّن دخيلـه=في لهيب الوقت والاّ فـي بـراده
الشاعر : نايف بن عمهوج النفيعي العتيبي
20/11/1422هـ
« آخـــر الـــمـــشـــاركــــات »
02-Feb-2007, 12:43 PM
بيض الله وجه من زبن دخيله
العرض العادي
