جديد عبدالواحد بن سعود

[فهد الزهراني]

كل عام وانتم بخير

قصيدة تقدم نفسها
وتعرف بشاعرها

اسخف حماقات الانسان افتراض النظام=من اجل ترتيب هذا العالم الفوضوي
وهو بعينه يشوف الكون غابة هوام =فيها البلابل تغرد والذياب تعوي
والارض في وضع ما يبعث على الانسجام=كروية الشكل لكن سطحها مستوي
دامت كذا كل شي فيها على ما يرام=لا فرق بين الغبي والشاطر الفهلوي
بلا شعور امتطيت المهرة ام اللجام=واصبحت كائن فضائي في لباس بدوي
استغرقت رحلتي حول الثلاثين عام=اصبر من الشمع لما يحترق و يذوي
كود وصلت التراب الرطب تحت الركام =عبر الطريق الطويل الشايك الملتوي
امطت عن وجه الايام القبيح اللثام=و طويت صفحة من الصعب انها تنطوي
آخر جنودي من النور ابتلعه الظلام=والشمس تسمع وتنظر والنهار ضحوي
الناس في ذا المدينة يشتكون الزحام =وانا هنا في زوايا عزلتي منزوي
ما عاد من كبريائي غير حفنة حطام =استر عليها بطاءوسيتي و زهوي
طارت من اعشاش تفكيري طيور الكلام =ومن غيمة الصمت شيبان النسور تهوي
عجمت ربعي مثل ما يعجمون السهام =و عجزت لا القى خوي منهم بمعنى خوى
خبث معادنهم اجبرني على الانهزام=يستحقرون الضعيف و يكرهون القوى
حسرة عليهم ولا فيهم ولو بن حرام =ينقل صدى العالمالمسحوق للنخبوي
استصرخ بجهد صوتي رغبة الانتقام =ويرد عنها الضمير بصوته الانثوي
وارضخ بعد ما خسرت المعركة للسلام =وانصب سرادق عزا مشروعي النهضوي
يتقزم الكون لين يصير نصف الجرام =يرجح بهذا الكيان بكل ما يحتوي
ما رد لي بعض وعيي غير صوت الامام=وهو يقول استووا وانا قربت استوي
داويتها بالتي كانت قدرها الزؤام =اول علاج الاطبا المفلسين الكوي
عشان امثل بعدها لعبة الاحترام=واعشم المحبطين بحافز معنوي
وادفن بقايا ضياعي في سجل الدوام=و ادخل بجهلي ثياب المشرف التربوي
عبدالواحد بن سعود=