بيتٍ بليا ساس ماينزل فيه ؟؟؟؟؟؟؟؟؟؟

[((الدلبحي))]

هذه القصيده لشاعر سالم بن حمد الجهني يوصي ابنه:
ياعبيد ياصقر على كف داعيه
ياعبيد خذ مني وصاة عظيمه
الاوله ياعبيد فرضك تصليه
هذي على الاسلام فرضٍ قديمه
لو ان عمرك طال فالموت قافيه
عن هادم اللذات مامن هزيمه
عملك يكتب بالموازين تحصيه
تشوف ماقدمت عدل وظليمه
الثانيه شي تسرك معانيه
فعل الكرم واقطع حبال النميمه
بيت بليا ساس ماينزل فيه
سريع ماتنظر بعينك هديمه
الثالثه شر العرب لاتجي فيه
اجهد لهم بالنصح واطف الجريمه
راع الطلب يلحق على الطول راعيه
ادخل عنه ولاتزوره بشيمه
واللي يعرف الحق ياعبيد يكفيه
ومن لايعرف الحق مثل البهيمه
خطو البناخي يرتفع عن بني خيه
الى اغتنى يحسب غناته مقيمه
يدبر الدنيا وهي دبرت فيه
نوبٍ تحلوى له ونوبٍ تضيمه
ومن لايرد الشور لك لاتراعيه
خله بدبره مايفيد اتعليمه
لاخير في رجل ٍ يضيع معانيه
يعيش بالدنيا حياته ذميمه
عمه وابن عمه ومايتصل فيه
وضيفه وجاره والخوي والرحيمه
عليه حقٍ لازمٍ مايخليه
يصون عرضه والسلامه غنيمه
هذي وصاة الوالد ابنه يوصيه
والعمر فاني والليالي مقيمه

وسلامتكم