وش رايكم يالأخوان

[الفارس11]

السلام عليكم ورحمة الله وبركاته :
ما اطول عليكم ندخل في الموضوع على طول 00

يا الربع وش رايكم في مدير مدرسة في قرية " ما " وهو من اهلها قبل يومين يدق على المدرسين واحد واحد ويقول بكره الله يحيكم يبجيني ضيف ونباكم تشرفونا في حلتنا
00000 مع العلم ان بعض المدرسين ماقال له يبيجيني ضيف قال نباكم تشرفونا في حلتنا بعد الامطار والنعمه ونخليها فلة حجاج 0

جاء الغد وحصل نقاش بين العلمين العزيمة للضيف والا يمكن تكون لنا لكن قلنا يمكن هو ما يحب انه يوضحها لنا 0
المهم واحد من المدرسين قال انه مايبغى يروح وقال ان المدير متكبر واخاف انه مايقدرنا ويبغى يشخص بنا - والعزيمة ما فيها شي صريح بواجب لنا - المهم قلنا انه مستحيل اول مرة ندخل عليه في بيته والرجال ناقل وحاب انه يتسامح من المدرسين – ولذ لك واحد من المدرسين لما دق عليه المدير قاله المدرس – يابو......... الله ياالضيف الي جاك في وسط الاختبارت العزيمه للضيف والا المسألة واجب للمدسين وسماح "" لاحظ ... قال " المدير : لا تدقق تسمعها على الصحن ان شاء الله ""
المهم رحنا للرجال( نحن المدرسين فينا العتيبي والزهراني والمالكي والسفياني المهم من كل القبايل في حدود العشرين ) في ديرته رحب وهلل وبعدها جا الحاكم الاداري التابع للمنطقه تبعهم ورحبوا بالرجال 0
وقلطنا على الغدا ثلاث مفطحات .... المهم ورحب الرجال " لاحظ هنا مكمن القصيد : قال : مرحبا الله يحييكم على واجب ابو ..........." يقصد الحاكم الاداري فقط " قالها مرتين والمدرسين ولا شي ولا حتى بعد الغدا " تروا ياجماعه الكم واجب ولو كلام بس " ولاشي 0
المهم وش رايكم فالسواة الي سواها 0

ومايحق للمدرسين يزعلون 0 وحطوا في بالكم ياجماعة تروا المسالة ماهي مسألة أكل لكن تقدير 0

وانا انشدكم الصدق والقول بشهامة وش رايكم يالربع 0

اخوكم الكاتب : عتيبي وشكرا 0

[البريماني]

إذا أنكــم أول مرهــ تدخلون حلتــه ولا قام بواجبكم هذي تبقى في وجهــه... وإذا أن الغدا مسويه في استراحه مثل دورياتكم يالمدرسين وهو الي متكفل باالغدا وعازم له ضيف وانتم طبعا ازملاه داعيكم هذا شي ثاني....


مجرد رأي

[الفارس11]

شكرا اخوي الوفا على المرور 00 000

كلامك في محله 00 لكن لاحظ " نباكم تشرفونا في حلتنا" دخلنا بيته 000

ليتها كانت في استراحة !!!!!!!!!!!

00 وشكرا لك مرة أخرى 000
وأتمنى من جميع الإخوان الذين يشاهدون الموضوع أن لا يبخلوا علينا بآرائهم السديدة 00

ولكم خالص تحياتي 000000

[الفارس11]

اتمنى المشاركة 000000


يرفع0000000000

[بـدون أســم]

وعليكم السلام ورحمة الله وبركاته

أخوي العزيز:

كل أنسان له وجهة نظر

من ملاحظتي أنه عزم علي أخوانه المدرسين بالمدرسه المعنيه

ولم يقول لهم الواجب لكم

أنا عندي ضيف وحاب أنكم تشرفوني علي الواجب الذي لضيف

لأنكم زملا ئي في المدرسه ومن واجبي عليكم دعوتكم للحفله أو أي شئ كان

قد هو أخذ الأمر أنكم أخوياه وزملائه لا يحتاج لكم عزيمه والمحل محلكم


والله أعلم بما يخفي

مجرد رآي عابر

تحياتي لك

[ابو سعد الدلبحي]

حياك الله يالفارس11

أعتقد والله أعلم إن المدير آخذها من باب الميانة على زملائه المدرسين وانها غير متعمدة

إلتمس العذر في مثل هالمواقف ولا تدقق لأنك إذا دققت صدقني بتتعب