برقـــا وروق

[هلال العتيبي]

البارق اللي يشوق العين وينوض شرق=امسيت اخيله من المغرب الين الشروق
اساهره طول ليلي واحسبه برق بـرق=قلبي مولّع وانا مغرم بنوض البـروق
يابارق الشوق اغنّي لك على كل طرق=تليق فيك الخواطر والشعر والطـروق
يابرق بينك وبين بروق الامزان فـرق=هنا يبان التميّـز والوهـج والفـروق
يابرق بلّغ سلامي وارّتفـع فـوق ورق=هذا جوابي وتوقيعي ونبـض العـروق
قل للغظي لايحاول يسرق القلب سـرق=وين انت ساري بقلبي يالمزوح السروق
لازم تردّه ولـو دونـك عفاريـت زرق=وإلاّ نويت اعتزي واجيب برقـا وروق
وعاد انت تعرف عتيبه تحرق الجن حرق=عدوهم يصطلي من نارهم والحروق
وحليفهم يغرقونه فالكرامات غرق=بحر كراماتهم بحر(ن)عظيم غروق
وصلاة ربي على الهادي كثر نوح ورق=وكثر الزهر والثمر في وارفات الوروق