ياشقير لو الزين عاتبني اعتاب اشوا من الهجران واقبل اعتابه

[طويل الذراع]

هذه القصيده من قصايد الشاعر عبدالله ابن جريذي الدلبحي وهي عباره عن مراسله بينه وبين الشاعر شقير الجذع
والشاعر يقول

ياراكب اللي ماكتبه على الباب=ماسجلوا رقم الحرس فوق بابه
مامرونه جنود خبره وكتاب =اليا ضوا الجندي عريفه سرابه
من الوكاله ماتسجل الجلاب=شيك عليه وسددوا في حسابه
ماطب فالموسم يبى منه ركاب=في البايكه وملحفينه ثيابه
مجهزينه للطواري والاطلاب=وقت اللزوم انشغله ونعنابه
اليا ناشه الثالث تمرقص كما الداب=ماينقل السواق همه خرابه
يفز فزه ريمن العصر منصاب =ذير عليه وعلقوبه صوابه
جمس خفيف وزينه الخط مهذاب=ودريوله بمباشره في هبابه
الظهر من جده يودع للاصحاب=مع سايقه شال الدليله زهابه
شين خفيف وحط ابوقرن بقراب=وفكوا عن الدربيل جلده اقرابه
واعصير قد مالوا بوديان واشعاب=والحفر للدربيل حزمه زمابه
ملفاكم اللي للمواجيب ماهاب=قرمن على الطولات ناشن شبابه
ذكره تعدى من ربوعه للاجناب=ماشاب عند انثاه ماحد ن درابه
اشقير ملفاكم بعد مس الاتعاب=مبعد اشبوح الخوف عن من لجابه
تلقاه دايم ضاحك البال مرحاب=للضيف والعاني وسيعن ارحابه
تصدروا في مجلسن طيب واطياب=مع من وجدتوا قدمكم من عتابه
تلقون فالمجلس طراقي وعزاب=غير المسير من بيوت القرابه
واليا تعشيتوا وشيطانكم غاب=عطوه خطي واتركوه لجنابه
ابشتكي لشقير من جور الاحباب=جور الوليف اللي ذبحني عذابه
اليا جيت مع دولاب جاني بدولاب=واليا نويت القرب هجره نوابه
خلي قطع فيه بلا ذنب واسباب=وانا محب ولاعليه معابه
خلي بدارن لامزارع ولعناب=دايم على راعيه يكثح اترابه
وانا على ماقيل عاشق وكساب=ابا الوليف ودارهم ويش ابابه
ياشقير لو الزين عاتبني اعتاب=اشوا من الهجران واقبل اعتابه
عينه كمى عين اشقر الريش نهاب=اليا اهوا على جول الحباري عدابه
اليا اغضى هدب عينه على خده احراب=وانا سلهمن ياشقير حل القضابه
واليا وقف قرنه على المتن منساب=واليا مشى كنه بجمرن وطابه
واليا قعد عضيت خصري على الناب=ولعنت في صدري زمانن مشابه
واليا هرج لمصومع القلب جذاب=لو شافه المسند تجاهل اكتابه
ماعاد ميز بين عما والاحزاب=قامت اسورها في اعيونه تشابه
ياشقير سلمته وسامه مع الكاب=ورتبه فريق اول بزينه وادابه
ياشقير غربلني وانا صرت مرعاب=وعندك خبر في الحب ماله نيابه
ياشقير خلي وسط شرطه ونواب=وانا وحيد ولاستطيع اقترابه
ولو المراد اضروب دبسى ومشعاب=والله لقف وقفة صمايل واجابه
مير البلى دونه يسنون الارهاب=ناسن حسب ماعرف يبون الحرابه
وانتم ذرى مثلي اليا خاف وارتاب=الطير بالجنحان واشك سحابه
يمناي واسلاحي وربعي والاقراب=ريفي اليا جات الليالي اشهابه
تزبن على انحك مخلاب مخلاب=وازبن عليك اليا احدني اذيابه
تكفى يابن عساف جات ام غصاب=ابغاه هوش ومال والانهابه
انكانه بالمال لاتحسب احساب=لوقال مال الراجحي لاتهابه
وانكانه بالهوش تفنون الارقاب=كم شيخ قومن رمح جدك غدابه
وانكان بالحيلات واملاوى الاطناب=انتم هل الحيلات وانتم ذهابه
ياشقير لاتافر وليفي ولو تاب=اليا وليتوا بشروني بجابه

والرد لايحضرني الان ولكن سوف نوافيكم به