حواجز الصمت بوح العين يكسرها (مصافحه اولى)

[سلطان بن بشيّـر]

السلام عليكم مصافحه اولى اتمنى ان ترقى لذائقتكم الشامخه

الصدفه الي لفتبك يا اجمل سنيني=يا حلوها مير ما كنت اتصورها
جابتك عندي وحطت عينك بعيني=والشوق اشوفه يحاصرك ويحاصرها
العام تضحك معي واليوم تبكيني=وعلى الجفا نفسك من العام جابرها
لا تكتم البوح وعيونك تحاكيني=حواجز الصمت بوح العين يكسرها
ما تدري اني عشانك سقت رجليني=في طرقةٍ مااعرفها اولها من اخرها
يا مكثر هموم قلبي يا معنيني=الله لا يرحم جفاك ولا يكثرها
مشاعري من شقا حبك ملاييني=احترت ما بين مسلمها وكافرها
عطيتك الحب ولا ابيك تعطيني=وسلمتك الروح تنهاها وتامرها
والي ينسيك والله ما ينسيني=ان كنت تؤمن بها وان كنت تنكرها
تعال يمديك يا خلي ويمديني=ابا اجمع احلام عمري فيك وانثرها
وانت اجمع احلام عمرك كلها فيني=واتركني اعزها لجلك واقدرها
السالفه ما رجحت منها الموازيني=اصّغر السالفه وانته تكبرها
الضيق منها يواسيك ويواسيني=والنفس ما عاد ينفعها تصبرها
تعال جدد عهودك واقضب يديني=واسمع بيوتن لجل لاماك اصخرها
ماني مخليك وانته لا تخليني=وبقولك كلمه اسمعها وكررها
ان قام حظي تكمل دينك وديني=على العهود القديمه وانت خابرها
وان طاح حظي يا مقرون الحجاجيني=وطى على غارب احلامي وصابرها

سلطان ابن هادي ابن بشير العتيبي