اقتباس:
المشاركة الأصلية كتبت بواسطة مرزوق العتيبي
بالصوت والصوره
قصيده الشاعر الكبير عبد بن نايف بن عون ومجاراه لها من الشاعرين
الكبيرين سعد بن جدلان ومحمد بن عباد ....
لسماع القصيده اضغط هنا
يقول الشاعر :عبد الله بن عون
شعتني علوم الصيف وارقلت للمسناد =ولاعاد يعـذل واحـد طافـح شبلـه
آبي عبلة ضافي عليها كمـا السجـاد =ديار يرود عدودها من يحـب ابلـه
ولاعاد لي من يوم سال الشفا مقعـاد = عتيبي وداري فـوق ونحيتـي قبلـه
مادامه وكد لي سيل وادي قليب عناد = انا ويش يحرمني شفا نجـد والعبلـه
ابتبع هوى وضحا تحط البيـد سنـاد =لها غير زين طبوعهـا خـدة قبلـه
ليا سمعت الحادي نده ندهة الميـراد = تقود اول الزعجول لول وتقرب لـه
ابيها ترفع فوق عن ساخـن الانفـاد = وتجي في فياح كل مصلاح يطرب له
انا في الديار الطامنه في تعب وجهاد = على كثر مرعاهـا مداخيلهـا خبلـه
عساها يساقيها المطر ديرة الاجـواد =ولابيها لـون ثمامهـا ينقلـب ربلـه
مجاراة الشاعر: سعد بن جدلان
شعتني قصيدة شاعـر عـذ ّب القصـاد =ماحد يستلذ السالفـه ليـن تنسـب لـه
علومك يا بو نايف قراح ٍ على الأكبـاد =لكن تجرح قلوب ٍ مع الوضـح منهبلـه
مواليف وضح ٍ كنها وضحى بـن عبّـادة =لا شافها راعي الدبـش طيـرت شبلـه
تواغض مع الريضان كنها خيـام أسيـاد = لونها بعيد ٍ بـادي الرجـم تقـرب لـه
أو حمّـى مغاتيـر ٍ مقاديمهـا شــراد = هريب السحاب اللـي تواليـه منسبلـه
قبلهـا ليـا مـن المنـاره سنـاهـا زاد = قبل الاشهب المرشوش لا فضوا اصطبله
عنقا مـارق ٍ نسنوسهـا سدوهـا منقـاد = مـع طـول خدتهـا خراطيمهـا سبلـه
شنـاح ٍ طفـوح شبلهـا دايـم ٍ خـدّاد = لونها مع ذود ابن عمـي خذيـت ابلـه
لا ضاقت براعيها الوسيعه بكـل بـلاد= يحوّم و كبده مـن هـل المـدن مندبلـه
لا منه نطحها عصر و لا هجد مهجـاد = ليا شافتـه قامـت تـرازم ترحـب لـه
هذي تنطحه تبغـى تقبّلـه جـد عمـاد = وهذي تنهب شماغه و هذيك تلعـب لـه
و الله ما يهني من حكم عاصمـة بغـداد = اللي له مزامير الفخر تضـرب الطبلـه
مجارة الشاعر: محمد بن عباد
جذبني صدى صوت ٍ تلاحت به الأطواد = يتعّب هواة الشعـر بعـده و مـن قبلـه
صدى صوت عرّافٍ لشعـر الأدب روّاد = منابع عيـون الشعـر و الكلمـه الذبلـه
تلاحوا على وضح ٍ عليها العيون حـداد = ولوف ٍ على صوت الموده تراقـب لـه
دقـاق العنـوق اللـي خراطيمهـا ورّاد =على حب راعيهـا شغـوف ٍ و منجبلـه
تقدم لها بن عـون فـي وصفهـا نشّـاد =و شعا الأكلبي و الأكلبـي تلنـي حبلـه
و انا قبل صوته ماشي ٍفي الطريق حياد = على ما تقول الناس كـل ٍ علـى هبلـه
و بعد زعزع الوضحى فلا عاد لي صدّاد = سلولي و قلبي طاري الوضح يرغب لـه
ابتعب واحاول لو لحقني عنـا و انكـاد = على منهج ًٍ ما كل قـاف ٍ يناسـب لـه
و انا في هواهـا مغـرم ٍ هايـم ٍ منقـاد = لو اكثر علي اللـوم فـي حبهـا الابلـه
اوقـع لهـا بالعشـر واشهّـد الأشهـاد =انه لاعـب ٍ بـي حبهـا لعبـة السبلـه
للامانه منقول من منتديات الصايره |
وهذه مجارات الشاعر جساس
هجوسي موردها على حزة الميراد=اوقع لراعي الطيب في السجل واكتب له
ولا صار ترثة عون جاب العلوم وكاد=كثير العرب من بادي الشوق منهبله
عماد الشعر ثبت ركون على الاوتاد=ولاهوب في عازه عوين ٍ يقطب له
ليا كبر محمول البليهي وثقل وكاد=ينوخ لها ويشيل حمله ويطرب له
هل الوضح صبحها وثنا لها المهجاد=صبيٍ علوم الطيب دايم تناسبله
ليا نام ولد اللاش ليله وشبع رقاد=سرى الظامي المشتاق ليله يسوق ابله
وانا ما علي من شلت الكفر والالحاد=هذا يضحك الملعون واخر يكذب له
بعد ما ذبح صدام مع بندر العواد=اشوف الجمل زومان كلن يعرقب له
ولاهمني سالم وعنتر ولد شداد=ليا صار مقصور المعاريف تنسب له
تكاشف سنا برقٍ من الشرق قدم وعاد=رعود اليمن والشام قامت تجاوب له
عسى المزن ما وسط برد يا هل الميعاد=ليا صار مزن الشعر بالشعر تحلب له
يسوق الشعر سوق المطايا جموع افراد=يسبل على المحراف والسبله السبله
بعير البدو لا صار يسرح وفيه قراد=نحرت البعير وسقت عنتر معا عبله
ورادار شعري عقب ما ثبت الكداد=ضعاف العرب قامت بصوبه تزهب له
اقول الحقيقه وافيه والفكر منقاد=ونفسي لقول الحق بالحق منجبله
بعد زان شرب الكيف دله معا براد=علوم الوفاء لاهل المواجيب منقبله
آخر تعديل جساس يوم 02-Sep-2007 في 06:00 PM.
« آخـــر الـــمـــشـــاركــــات »
02-Sep-2007, 05:08 PM
عبدالله بن عون وابن جدلان وابن عباد مع مجارات الشاعر جساس
العرض المتطور
