يستاهلون الحايل أهل العوايد .. قصة وقصيدة عن كرم الاساعدة

[سيف الأساعدة]

الســـــــلام عليكم ..


ذكر كبار السن أن الأساعده غزو ركب ليس بكثير ووفقهم الله وأخذو لهم أباعر وعادوا سالمين وعندما وصلوا إلى أهلهم قام مطلق الحداري (راعي الشوشلية ) بذبح ناقة طيبة من كسبه لربعه على شأنها سمينة وسنامها مردوم ، فشره عليه المقربين منه بما فيهم والده فهيد وقالوا له لونك ذبحت قعود ولا بكره ولا من الفطرّ بدل هذه الناقة الطيبة فقال هذه القصيدة :

يستاهلون الحايل أهل العوايد*=اللي لهم بالكون صيت وعزاوي
الفاطر اللي فوقها الشحم زايد=عيد لهلنا ما نبيبه طراوي
جتنا كسابه ما نبي له فوايد=يوم فكنا الله من عظام البلاوي
لحقو على جيش وخيلٍ هدايد=والكل منهم منتوينا مناوي
بيمانهم دهم سوات الجرايد=حسه كما ذيب بظلعٍ يعاوي
طمعوا بنا من قلنا فالمزايد=كلٍ يغني له نشيد وحداوي
من شافنا قفا ولا هوب عايد=أوجس عطيب الجرح ماله مداوي
ربعي هل الوقفات وأهل الشدايد=الرمي ما يزمي صوابه لقاوي
عبرودهم وقعه بوسط النهايد=واليازمى بالراس فيه متساوي
قول بلا فعل ولا له شهايد =مردود لونه روى فيه راوي
تنشد الروقه ولابه جحايد=غزايز كسبي مغب الغزاوي
وضح نقلدها فالأول قلايد =لاجنبو قناصها والنداوي
نقدم على حمايها والولايد =والعمر منا بايعينه هداوي
والعمر واحد ما يجدد جدايد=نكسب به النوماس ولا نعاوي

أهل العـــــوايد : هم الأساعدة ..فقد إشتهروا بالكرم وتناقل الناس قصصهم عن الجود والسخاء ، فمنهم بن عردان مثوثي على روس الفطّـــر .. ودغيليب بن خنيصر (خيال جبلة) .. ودغيم بن شافي اللي ضيفّ العرب اللي نزلوا عليه وهو طرقي (حيث شرى الذبيحة منهم وحطها في القدر ورحل عنهم ) .. ومن حاضرة الأســـاعدة عبدالرحمن بن احمد آل حمد والذي اشتهر بكرمه وجوده و قيل فيه المثلان المشهوران (أكرم من ابن روق ) (الحار عند ابن روق) .. وأيضاً بريك الأسعــــــدي راعي بقعاء والذي ذكره عدوان الهربيد الشمري في قصيدته المشهــــــورة :

وحطاب للي بالصحن ينفض الغيـد=وبريك محيي بالركـاب الهزالـي

سيف الأســــــــــاعدة

آخر تعديل سيف الأساعدة يوم 23-May-2010 في 02:14 AM.