قومن لها حب وعلاقه مـع ابليـس

[مخاوي الطير]

هـاج الظميـر وولعـن الاحاسيس = لابو صبيٍ يقضي العمـر ماحـس
سلم على اللي كل راسه نعاطيـس = قـرمٍ لياهاجن الامـواج ماهـس
وقت القشر محدٍ عرفلـه مقاييـس = نوبٍ يجي صافي ونـوب يتنكـس
وقتٍ هفت فيه الحرار القـرانيـس = وفيه الحباري والقطا جالهن حـس
الاش فعله صار ضمـن النواميـس = والقرم دسوا سمعتـه بالخفـا دس
قومن لها حب وعلاقه مـع ابليـس = شلـة خنازيـرٍ هتولـن منـجـس
أهل الحقد وأهل الهروج الدنافيـس = وأهل الحكي والزور وأهل التجسـس
دنياً صفـت للساقطيـن المتاييـس = أهل الردى وأهل الوجيـه المعبـس
ناسٍ من فعول المراجـل مفالييـس = وحبالها من طيـب الحـظ تتمتـس
دنياً تقومها علـى غيـر تأسيـس = خلت حكيم الراي منهـا يوسـوس
ناسٍ من النعمه تـدق المراويـس = وناسٍ يمسسها الفقر والحزن مـس
يومنهـا لمبعُـديـن المرامـيـس = حماية العطـفه ليـا صاح محتـس
ويومنها برماح وسيـوف فريـس = وسوالفٍ منهـا الهبيـل يتحسـس
واليوم ماباقي غير عديس وعويس = هلايـمٍ بالطـيـب لازم اتــدرس
عبرت من صافي هجوسي على ايس = شطرٍ على ايسٍ وشطـرٍ علـى اس
وفرجّت عن بعض الهموم المحابيس = واللي بقى داخل فوادي محبس

الشاعر / سعود بن طالع الشيباني

[أخو جوزا]

صح لسانك ياسعود

[سعود طالع الشيباني]

الله لا يهــينك يامخــاوي الطــير

وصح بـــدنــك يااخـــو جــوزا

[سفير الجذعان]

صح السان الشاعر سعود الشيباني وتشكر على النقل

[سعود طالع الشيباني]

صح البدن ياسفير الجذعان