(((قــــــــادة الأمجــــــــــاد ألقاها ناصر بن حمد آل خليفة امام الملك عبدالله)))

[علي الحبابي]

القصيدة التي ألقاها سمو الشيخ ناصر بن حمد آل خليفة
بمناسبة الزيارة التاريخية لخادم الحرمين الشريفين
الملك عبدالله بن عبدالعزيز آل سعود لمملكة البحرين ..

ياهاجس أفكار القصايد حانت الوقفه تعال =وأنا أعرفك ماتخلف الهقوه ولا تنسى الوعد
واليوم موقفنا كبير ولا يبي غير الجزال = ماعاد فيها ياقصيدي غير وقف وإجتهد
قم وأحتزم بي وأعتبرني فالشدايد راس مال =وهات البيوت النادرات إللي معانيها جدد
سلام تسليمة وفا ترقى على روس الجبال =تسليمةٍ ما كنها إلا البرق لا حن الرعد
ويا مرحبا ياخادم البيتين زيزوم الثقال = باسم المليك الوافي المقدام قايدنا حمد
ترحيبةٍ ماكنها إلا الكيف من صفر الدلال =ولا هيب تحصى بالرقم ولايجاريها عدد
يالشامخ إللي بالمكارم والفعايل والخصال =رقيت فوق طويق وجبال السروات وأحد
أهدافك الوِحده ونبذ التفرقه والإنفصال =حتى ملكت قلوب من حولك وعاشوا في رغد
ياللي جمعت الطيب كله طيب راس وطيب فال =يالنادر إللي في نهار الضيق تاقف وتحشد
يالقايد إللي دون دارك تاقف قروم الرجال =وتحمي وطنها بالسيوف وتفتديها بالجسد
ما دامها ديرة هل العوجا كريمين السبال =تبشر بوقفات الرجال إللي تبشر بالسعد
وحنا بلد واحد وتربطنا العلاقة والوصال =ومن بيننا حب وموده وإتفاقات وعهد
حنا لكم وأنتو لنا وقت المعارك والنزال =يشهد لنا التاريخ فالماضي وفالحاضر شهد
شعارنا ما بيننا شكه ولا فينا جدال = ونبقى وتبقى ديارنا بالعز مرفوعه عمد
هذا كلام الصدق لا جا للحكي دور ومجال =لا صار قدام الملوك إللي لنا ذخر وسند
لا صار قدامك ياخو نوره رفعت إلك العقال =ولا صار قدامك ياخو نجلا بوقف وأستعد
ياقادة الأمجاد يا فخر العرب في كل حال =وياقدوة شعوب الوفا لا جا الكلام المعتمد
يالحاكمين العادلين بشرع ربي ذو الجلال =ياللي لطاريكم جميع الناس تشكر وتحمد
الله يحفظ دياركم من شر دورات الليال =والله يضد أهل الغدر وأهل الحكي وأهل الحسد
أقولها وأعيدها وقفه وسطوه وإعتدال =واثبت الأقوال بالأفعال تثبيت الوتد
لكن قبل ما ختم كلامي ودي أضرب لي مثال =من عاش في عز البلد .. يحرص على عز البلد

منقوله من في وهجير

http://www.alyaum.com/issue/article....1&I=753436&G=1