ديوان الشاعر / عمار القلاع ( رحمه الله)

[حميد السجايا]

بسم الله الرحمن الرحيم
والصلاة والسلام على من لا نبي بعده
اخواني اعضاء وإداريين ومنسوبي وزوار منتدى الهيلا
يسرني أن اقدم لكم بعض ماوجدت من هذا الشعر شعر (عمار القلاع)- رحمه الله
فهو شعر حكمة وخير عدل, فهذا الشعر وليدة خبرات وتجارب مربها عمار القلاع خلال سنوات طويلة
وأسأل الله ان ينفع به الجميع
والسـلام عليكم ورحمة الله وبركاته :-

أسمة ونسبة :-
هو الشاعر: عمـار بن بركات بن مبارك بن عمار بن جويسر بن عجلان القلاع العالي الروقي العتيبي (رحمة الله)

نشأ في منطقة الحجاز ومايسمى (ركبة ) وهي متعلقة بين الحجاز ونجد

وشارك مع الامام فيصل في فتح نجران

وشارك مع الشريف في الشام

يشتهر الشاعر رحمه الله بالكرم والنخوة والطيب



الشـــاعر عمار القلاع

أصابة مرض في يدة اليمنى وقد وضعت فيه ثلاثين كية وكان ذالك الوقت
لايوجد أطباء فكانو يستخدمون الطب العربي وكان ذلك عام (1340) هـ وبعد ذلك شافاه الله .. وقال هذه القصيدة :-

يالله يالي ما على نورك اسداف = يالي خلقت اليسر والمعسرية
تفرج لمن كنه على راس زلاف = المتن عايب والملايل عليه
لا وايدي ماتحرف النجر بحراف = ومعلقن فيها ثلاثين كية
عفت المنام ومسهرتني بالا وجاف = ولعاد اوالي شلة العدملية
ماكن مختها على العظم تلاف = والا يشظ العظم بالسوعرية
يامن يلحفني عن البرد بلحاف = فلاج يا أبني ضف همي عليه
لا وايدي ماخانت الجار بخلاف = ولا خنت غرات آمني في خفية
جزنا من المحظار يوم النخل صاف = واليوم عقب الصيف جدة اقنية
ويهل الهوى من يتبع الود بشفاف = طاحت نواعيره ويبست ادلية
راح الهوى يلعب على راس مخطاف = لعبت محال العاج بالجوهرية
والود بعته مثل مبيوع الاشراف = عني رميت الود بالجاهلية
بعته بمجلس عاقلٍ جوف عراف = ماسمجه جابان بالمجهوية
وبعته بطبخة مضرمٍ عقب الاصلاف = في ليل شتوٍ والهبوب ايسدية
وبعته بذبحة عاقرٍ وقرها أرداف = يفهق على روس الشوارب صفية
واكثر طراته يوم يخلط بمنساف = لين الصحن يركب طعامه شفية
واول يبدأ كل ورعٍ بمغراف = ويحط للجيران منها جزية
ماجوب أهل ركبٍ إليا جن حذاف = تركا على صنوة أرقابه عصية
واحدٍ مناعه ملي بطنة إليا ضاف = وأحدٍ يبا كيفاً بلا مقهرية
وقام المعزب وانقلب يم الأطراف = ورما لهم في النجر هيل أحبشية
في بيت من لا نزلة عسر وأحقاف = ولا ناحزه قطعة حرام أوفدية
لونها حطت سراويل واشناف = مقطوعة الوالي لحوح مخلية

......( فلاج هو ابنه فلاج ابن عمار ,, مخليه : خالية من العقل ) ....

وقال الشاعر:-

يالمهلكي طير الهوى ماخلق طير = والتبن ماوقى شداد النجيره
والغصن مادرق على الجفر بحجار = والخبل ماروحك فاكتار ديره
وان كان ماضلت سوانيك عبار = ماوردوك اهل الحبال القصيرة
وانا منول ناصٍ الدحو وامطار = وخيره وانا عمار ياسعود خيره
لو البحر ينسف على شعر واشعار = شربوه ماكنه خلق وسط ديره

سوانيك : جمع سانية والسانية هي الت تقوم بجذب الماء
شعر واشعار : جبلين بجوار حفر كشب
امطار : يقصد قبيلة مطير بس القاف يجبر واللغة العامية
سعود : هو صاحبه سعود ابو اسنانه المحقني العضياني


وقال الشاعر :-

ان كان ماجاك الولد في ملافية = يشتب كنه مسرجٍ وولعوبة
لا عادة أيامه وليلٍ بدا فية = ................ شطر مفقود
وانجاه ابن عمه وخاله وعانية = سوى عشاهم والشبب ماهقوبه
قلل محاصيلة وكثر شكاوية = والعذر مركوب الفلس ماهتجوبة

ملافية : مكان استقبال الضيف
.........

























وكان عمار القلاع له عواني من المهالكة من قبيلة مطير وقاموا بزياره له أيام صيف النخل
ومعهم 12 من الجمال ويريدون أن يحملها لهم من التمر كان ذلك عام 1335هـ
وقال الشاعر:-

يامرحبا يابو علي ذخر الاجواد = ياطارش واد ارن من دون أهالية
ترحيبةٍ تبري عن الكبد الاوقاد = واحلى من السكر على كبد شاهية
واحلى من الي ينخلع بين الاجراد = ذوب اللبان أليا انخلع من مجانية
ومازال راسي حي والعمر ماباد = عيبٍ على من لايرحب بعانية
وناشٍ وانا عمار يقصر عن الماد = قصر به الفقر الحمر في مواشية
والمهلكي ماله صحيبٍ ولا زاد = في واديٍ كلٍ سكب في مجانية
قم يالمقهوي سو له خمسٍ أفراد = وزله من المصفاة وافهق ثناوية
واليا تقهوى المهلكي مايبا زاد = بريةٍ فنجالها من مناوية
ودنو وشالو فوق منبوز الاعضاد = من واديٍ عصرٍ تصافق ذوارية
والدرب من قوع المراقيب الانضاد = دربٍ سماح ولا أوقفتهم قشاعية
ينصون حيٍ دونه الضلع منقاد= ضلع العلم والا الغريف حراوية
وليلة مساك بدار عايض وشداد = سلم على الي عدنا واردٍ فيه
وسعود مبهج خاطر الله أليا راد = عيد الركيب الي حفايأ سمارية

ذهب الشاعر : عمار القلاع إلى عوانية المطران وعندما زارهم لم يقوموا بواجبة على الوجة المطلوب!!
فقال:-

ياليت مالي فالنحايين عاني = ولا جيتهم من نقرة الشام طراش
ماينفع العاني عريض الاذاني = عانية لو زارة على بخل وبلاش
لقيتلي بومٍ عليه امتداني =رجالهم مايبهج الضيف بفراش
ماكيفوا صدري بكيف الاواني = ولا حط لي عصبٍ بعد يبرد الجاش
ولا منهم الي بالعزيمة نواني = تراكت الواجب مربية الادباش
تخارعوا مثل الحجل والسماني = ألحوم وملاحم لحومي على ماش
ياليت مسفر فوقهم ماحداني = ولا جيتهم من يم شداد غباش
قصرٍ عن الي ينهضون المباني = واصحونهم يلقى بها عصب واعراش
مذخور نامي من طوال اليماني = والكل منهم للمواجيب شواش
لطم الحريب مقربين الاوزاني =وكسابة الناموس مع كل هواش
ربعٍ تشافوني وكلٍ عطاني = وعاضو بعيد الدار من ربع الادباش
ومن عندهم تنصب بتيل اليماني = تنطحي حيٍ مرابية خشخاش
عهدي بها يوم الشتا هالزماني = واليوم طال الغرس ماعاد يناش
علوهم يرعى السهل والطماني = واد العقيق أليا اتقب نبت الأرواش
إليا عج مرباعة من القحوياني = وأسقاه نو الصيف والطرف برشاش
ويهل الحراير ساهجات البطاني = ودو عبيد الله من البيض معراش
بيضٍ تنشر قيس ضلع احلبناني = والاد الحجيج اللي لباب الحرم ناش
غنابها الي في جبال اقحطاني = وسمع بها الي في جبل ضلع وأرقاش
وتضفي على الي منزله في البياني = وعن فالحة حلو بها بخنق الشاش
وأرموه مع حذفين تجرت كباني = كسوة أخزام وزودهن ال كرداش
وتضفي على الي ضيفهم بالهواني = وسوات من يرقع ذرى البيت بخياش
ويمطير يالي تشربون الوزاني = ماني لكم ياباقي الحي محاش
ياهل المقاهي والصحون الرزاني = عليكم البيض عنهم عد الارماش

.... مسفر : هو مسفر الافشح من مطير وشداد قريب لمسفر بعد
ومذخور نامي : فخذ من قبيلة مطير بعد






















وقال الشاعر ايضاً:-

ياراكب الي جديد الكور يزهنه = بنات بيوض عن غميض والثاني
يشقى بهن الي مع الخبة يشقنه = قطم الاواريك وعظم الكوع عرياني
يازين بكوارها مجلاس اهلنه = بان العصي ياجهز ميكار شاهاني
والدرب ياطى القرى واقصا غرضهنه = مقيالها النوب يم أرقاب حيطاني
تلفي ثعيل السميري لايعدنه = هذي سنه كيف ماجيته ولا جاني
جتني مكاتيب عون الي كتبهنه = جاني بها مصطفق داخل وبراني
محدن رضي فيه غير مخادع السنه = سوات من خالف الدنيا بنصراني

... الخبة : هو الخلا او بمعنى البر الطليق


وقال الشاعر ايضاً :- (عندما كان في الشام مع الشريف ايام حروبه )

كريم يامزنٍ تلاعج بروقه = بالشام والبراق عنا يماني
نخيلة بوساق هجنٍ نسوقه = حرايرٍ ما ولعن الهداني
يمشن شام وكل عدٍ نذوقه = ومقيال أهلها من مكان لمكاني
يهني من در العشاير ريوقه= ماغربنه ساهجات البطاني
ياعلي كان القلب بانت رهوقه = تروفو بي كان أميري جفاني
مابي يكود الصيف تهنع عذوقه = ويروح وانا فالحرايب مكاني
وغروٍ بعد حرق بقلبي حروقه = بعته بلاما شاربين الاوزاني

ذهب الشاعر عمار القلاع إلى نوار بن عجل القلاع , كان نوار صاحب إبل ليس معه غنم وقال له عمار ابي اشتري منك الذلول (جـروة ) بستين من الغنم , أخذ عمار الذلول وراح فوقها لعوانية المهالكة من مطير
وعطوه (62) من الغنم وناقة ألقحة ورجع عمار لدياره وعقب ماجاء عند نوار قال له انت يانوار مخيرك في الغنم والا في ذلولي جروة وكان نوار مشتهي الذلول وقال انا ابغى جروة وانت اخذ الغنم وعندما راجع عمار
إلى أهله قال :-

سابقي ياجهز ينقال طيارة = مستقلٍ عن الملهاب راكبها
لو عطوني نقاوة جيش سنجارة = ماسوة كوع جروة لجل منسبها
زينت الكوع تحت الكور صبارة = دشنها الجوخ تزهى من مناكبها
يوم حنا وطينا الهضب مراره = تنزع الحبل من قوة معالبها
دوب تثني الرسن منها تبي الغارة = لاعبتني وانا فالعصر ألاعبها
لعب أدميٍ جفل من دنه القارة = حقق الشوف واجزل من جنايبها

وقال الشاعر أيضاً :-

النوم كثرة ياجهز للرجوعي = والا لخبلٍ ماعرف شبة النار
والثلث يقنعني وعيني قنوعي = وثلثين مايدخل بردها والاحجار
من لا حطب نارة يشق الفروعي= مشية مع اسنانه على البخل معيار
ألا يكود انه مقل وقطوعي = هذاك أله غذاي الايتام عذار
ان كان وأليا نشوته للهزوعي = ناشن مع أسنانه على موتة النار
خسران حمل أمه بغروٍ يروعي = عامين غاذيته على مشة الزار
تباه يبري صدرها لا يجوعي = من حايلٍ ينقا شحمها لخطار
والا برزٍ باليدام امخلوعي = يصل سمنه مع الكوع قطار

...............

وقال الشــاعر أيضاً :-

ياجهز معك أمانه لتغلي الصحيب = غير صحبة فلس لا تشقى بها
وين بنت الردي لو عمقها عجيب = لا يبرق لك الزين واسلابها
وين ماكل حبٍ صلح للركيب = حب يصلح وحبات يرمى بها
وين جارك ليا صار بيته طنيب = فوقه أضف اللحف لاتبدا بها

..... والقصيدة اطول من ذلك لاكن هذا ماوجدناه منها

عمقها : جسمها ,,, أسلابها : ملابسها

ياحامسين البن حمس التلاحيق= تاليه نسف وفاول الحمس دوبه
ذره اليا جا للهبايب تصافيــــــــق = ورد الذرا من يم صالق هبوبــــه
من خوف يطلع في جنوبه تحاريق = حرقان ولا ان النيا في جنوبـــه
ترى مواري البن بش الاعاريـــــق = من خوف لايطرق شرابه شبوبه
والبن خله مثل دم الافاليـــــــــــق= باللون والا الروب ماهو بروبــــه
وترى بهار البن عشرن مغاليـــــق= الا ياكود الهيل غادي احبوبــــــه
وسوقه على الي فالمجالس صناديق= ان جاك نبا غلقو عنك نوبـه
وسوقه على مروين حد المراهيق= امدورة درب الحسب لين جوبــه
وكفه عن الي مايسد الاراويــــــق= الي يجيب العذر من كم ثوبـــــه
ينكس الي جا للشكاله طواريــــق= ينكس عليه الي تحمل ذنوبــــه
والكيف مايصلح لطير الحميميــــق= الي جناحينه تصافق جنوبــــــه

وقال الشاعر أيضاً :-

ياراكب أربع كلبوهن جهال = اربع عراوٍ كلهنه مجاهيل
ومحيلاتٍ ماسرقهن الابهال = ولا دارها الحلاب خلفٍ مباهيل
ولبوسهن من حسينات الاعدال = وبيدين أهلهنه حسين التشاعيل
وخصوا بجاباتي هليل وهلال = وعدو لبو عارف حمات المثاقيل
عقال شيابٍ عوارف وجهال = وارزاقهم يندب بها الله تساهيل
وثعيل ابن رابح منازيله شلال = عقب البداوة منزله روس اشاليل
مبري حفاهنه بكومٍ من الحيل = وبالكيف لو ان المراجل شماشيل
ويا لاد روق ابديت لي حرف من حال = ومن حال والي عز الحروف ماعيل
عد الروى دونه محاريب واجهال = كيداً شرابه فوق ثلث الاعاويل
ياكود من يدخل مع الشبك بحبال = ودجاج اهل خيبر تليم على الفيل
وذرواً لهم حبٍ مع البقع سيال = الله ولا حبٍ ذروه القناصيل
حبٍ ذراه وريعوا له بعمال = وعمال مايصلح بليا عماميل
وعنه اقنعوا وألها على الرب حلال = ولاينحلب درٍ بليا تحاليل
ولا يلحق بحيل الشقى مال= وذبوا قراطيع الوزان الرياجيل
والخبل مايلقى مع الصقر مدخال = والصقر يلقى له دروب ومداخيل

وسلااااامتكم اختتمنا قصائد الشاعر عمار القلاع

وتوفي رحمة الله عليه

ورثته امرأته : امزانة بنت عجل قائلة :

يا لجتي لجة كلاب القطيني=والاكما لجت مع الغبشه الذيب
عليك يامردي سمان الهجيني=ياقاطع الخيفه على شمخ النيب
شوقي يفوز بواجب المقبليني=مايدرق سد العسر والاشاعيب
وليالفوعنده على اشناق حيلي=مادزهنه بالغلى فالمجاليب
وسوالف ٍتبري الكبود العليلي=ونجر ٍيرودونه هل الفطر الشيب
حطوه بالرجم الطويل البتيلي=وعقب الغلى صكوعليه المغاليب
واقفيت من عنده وقلبي حزيني=وانجيت ابا ابرى كيف آبا برى وبطيب
والموت لو ينهاش لرقى البتيلي=وانخى عتيبه معلقين الاصاويب

وفي الختام نعتذر عن وجود أي خطأ كان او أي شئ سقط سهواٌ ونعتذر للجميع

وهذا الديوان مأخوذ من رواية احفادة وابنائه ومعد هذا الديوان هو ( جهز بن حذروف بن سلطان بن عمار بن بركات القلاع)

وأي شخص يجد عن هذا الشاعر المشهور اي قصيده اخرى فليبلغنا مشكوراً


وترقبوا ديوان ابنه ( سلطان بن عمار)


وتقبلوو تحيات اخوكم
( متعب بن صالح العالي)

[خلف الروقي]

جزااااااااااااك الله خير


لاهنت ياااااااغالي







دمت بود

[حميد السجايا]

يااهــلا فيك ياخلف وشكرا على مرورك يالغلا

[ابن صنهوت]

لاهنت يا متعب بيض الله وجهك جهد رائع والله يرحم عمار القلاع وانا صارلي شهر ابنزله قصايد ولكن لضيق الوقت لدي لم استطع وانت وفيت وكفيت واعتقد ان بعض القصايد فيها نقص لم تكملها تاكد منها لاني انا قريت الموضوع على عجاله ,,,

وله قصه وقصيده مع البنت لم تذكرها وسوف تراها قريبا في هذا القسم



لك كل الشكر لاهنت يالذيب

[@ـايل]

رحم الله الشاعر / عمار القلاع العالي ..

ديوان ضم جزل القصايد التي تكتب بماء من الذهب ..

لاهنت ياحميد السجايا على الجهد الطيب .. والله يعافيك.

..

[حميد السجايا]

المشاركة الأصلية كتبت بواسطة ابن صنهوت

لاهنت يا متعب بيض الله وجهك جهد رائع والله يرحم عمار القلاع وانا صارلي شهر ابنزله قصايد ولكن لضيق الوقت لدي لم استطع وانت وفيت وكفيت واعتقد ان بعض القصايد فيها نقص لم تكملها تاكد منها لاني انا قريت الموضوع على عجاله ,,,

وله قصه وقصيده مع البنت لم تذكرها وسوف تراها قريبا في هذا القسم



لك كل الشكر لاهنت يالذيب

لاهنت يابن صنهووت وهذا واجب على الجميع والي مثل عمار تفتخر بقصايده وسوالفه مع الرجال


وانا هذا الي حصلته كله وجبته
وجائز يكون فيه غلط او نقص
ولاكن حنا مكملين لبعض طال عمرك


والله لايهينك يابن صنهووت

[حميد السجايا]

[size=6]هااااايل جزاك الله خير اخوي

وشكرا على مرورك


وتواجدك يسعدنا كثير طال عمرك[/size]

[فيصل المسند]

ابداع يا بو صالح

جهد تشكر عليه وشاعر كبير مثل عمار نفتخر به جميعا
والله يرحمه


تقبل خالص شكري وتقديري

[حميد السجايا]

شكرا شكرا يافيصلل على ماكتبت



ولاهنت على مرورك

وبلا شك العموم يفتخر



لك ودي وتقديري

[سهاج ابن روق]

بيض الله وجهك ووجه القائمين على جمع هذا الديوان

والحمدلله ان عمار اصبح مثالا عند القبائل بالكرم والشهامه

واكرر شكري يا ابو صالح فعلا ابدعت طال عمرك