قصيدة ناصر الفراعنه بشاعر المليون ناقتي ياناقتي

[رمزي المقاطي]

ناقتي ياناقتي لارباع ولاسديس=وصليني لابتي من وراء هاك الطعوس
حائلاً رابع سنه من خيار العيس عيس=خفها لادرهمت كنه بالنار محسوس
في دجى خالي خلا لاحسيس ولاونيس=تنوخذ من شدة البرد طقطقة الظروس
في عيوني يكفخ الطير ويطيح الفريس=وانتهض جساس من دون خالته البسوس
وفي خفوقي فرخ جنيتاً يضرس ضريس=يوم اوردها هجوس واصدرها هجوس
ديرتي دار ابن ضاري وابن غثلم جريس=ديرة اللي دوجوا في فيافي نجد جوس
ديرتي يابنت شيخاً ومعدنها نفيس=عيطموساً دونها دثرتني عيطموس
جادلاً مطرق جسدها مع الغربي يميس=طينتاً من تربة الخلد والدم محموس
نقشت خمساً من الخمس في يوم الخميس=ليت شعري ما ارادت بهذا دختنوس
كم تمنا إن معه مثلها فتنه بليس=كان يمكن قد قلب نصف إمتنا مجوس
كن دماث الصدر منها كنيسه او كنيس=صومعة رهبان ديراً يؤدون الطقوس
آتقوس مع تقوس نواهدها وإقيس=قبتين قاب قوسين قوساً جنب قوس
خصرها يحكي لنا واقع القوم التعيس=وردفها عن غطرسة بوش يعطينا دروس
العروسه ماتبي غير ابو تركي عريس=العروسه نجد ماهيب حي الله عروس
نجد بنت المجد ونسة مونسة الونيس=ماعسفها الا معزي ضحى اليوم العبوس
كل اهل نجد هلي من إجاء حتى الخميس=في ذراهم بالتجي عن مجففة الرسوس
وعيشتي مابين أسوداً ولو ماني رئيس=(خير من كوني رئيساً على شلقة تيوس)
وليس عيباً إن خدعني بمكره كل هيس=لان مايفهم بمكر الهيوس الا الهيوس
مصطفى في مأدبة عمه البابا لويس=كبر اللقمه تحت ضؤ حمراء الكؤوس
وطسم حدتها على حائط المبكى جديس=يوم شقت ثوبها بنت عفار شموس
سيدة هاك القصر أسمها الاول لميس=دونها سمر الحناجر بترها حد موس
قسقسة لاحرارهم.قيس.قيس.قيس.قيس=والبستهم من مهانتهم انواع اللبوس
بين خدعة كعب اخيلاً ومولد ادونيس=درسونا الالهه والمدرس هنا روس
ويش لاقوا من قناة السويس اهل السويس=وويش لاقوا من تلمسان قوماً من سنوس
كلهم من شدة الجوع راحوا خندريس=بين غيبوبة مخدر وصحوة عرق سوس
ثورة راحوا سببها بتوع الاتوبيس=وش نبي فيها وهي ماتهز الا الغروس
آفة المرء اثنتان الف كاس وحب كيس=والنفوس اليا بغيت اتعرفها ارم الفلوس
ينكشف زيف الشعارات الى حمي الوطيس=ترجع الاذناب إذناب وتبقى الروس روس
صدق لاقال العرب مايحوص الا الخسيس=ولايوط الروس شئياً مثل ضعف النفوس