لافي حمود الغيداني (الجمال الانثوي)

[هلال الدوادمي]

مساكم عســـــــل ..


اليــــــــكم القصيده الغنيّه عن التعريف

مايبـرد واهـج الشـوق وشعـور الهيـام=غير سرداً تطوي البعـد بالسرعـه طـوي
بديها من خلف ماهـوب مثلـه مـن امـام=مستوي في حال .. وبحال ماهـو مستـوي
خشمها عبرود طلقـه .. وموخرهـا بهـام=رافعـه راعـيـه بـأشـارة ٍ ماتنـغـوي
لابدو دعاء السفر .. واعلنو ربـط الحـزام=ورشادات الامن لـو ترتطـم والا تهـوي
واستلمها واحـد ٍ خبرتـه عشريـن عـام=كبـتـن ٍ بالله وبكتـابـه إيمـانـه قــوي
مسلـم ٍ عنـده خبـر بالحـلال وبالحـرام=جابله ربي علـى الديـن وسلوكـه سـوي
وصعدت مثل اشقر ٍ فوق جول الصيد حـام=لمراوحهـا مـع الجـو لجـه وحــدوي
مثل مايدوي صدى صـوت رعـاد الغمـام=صوتها صـداه عبـر الفضـا يـدوي دوي
صنعة اللي ماعرفـوا لاصـلاة ولاصيـام=شعب ٍ أكثرهم ماهو عـارف ٍ منهـو ذوي
بالنهـار لياتعلـت كبـر فـرخ الحـمـام=دونهـا الاف المسـافـات تزويـهـا زوي
وان تغطلس بينـك وبيـن رؤيتهـا الظـلام=كن في روس اجنحتهـا مشاهيـب بـدوي
دوبهم دكـو عـن دلالـه الربـع الحشـام=تحتها من وقـدة السمـر جمـر ٍ مجثـوي
دايم وربعـه علـى جلسـة ٍ عنـده حيـام=ابلـج ٍ ليـن جنابـه لربـعـه وحـمـوي
مالي الا هي .. لياجـا للاشـواق أحتـدام=وقامت الذكرى على القلب تكوينـي كـوي
لي شهر وشـوي عينـي محاربهـا المنـام=ودي احضـر جـوازي وادورلـي خـوي
بينـي وبينـه مسافـات وحـدود ونـظـام=واحـد ٍ فرقـاه شاويتـن فـوادي شــوي
بس ابـا ازوره مثـل مايـزارون الكـرام=لين عينـي مـن قبالـه وشوفـه ترتـوي
لو بغيت اصبر .. واكابر .. واقول اني تمام=ذيب حبـه بيـن جـرد المحاديـب يعـوي
كان مالي في دروب الهوى شـف ومـرام=لين شفته .. واشهد انـه هـواة المهتـوي
ياسـلام الله علـى السلهمـه والابتـسـام=وياسلام الله علـى اللـي مابيلـه مطـروي
كن مالله حط في منطقـة خصـره عظـام=وكن غيره ماحتوى مثـل ماهـو محتـوي
لاقعـد مـاوده يقـوم .. وليـاقـام قــام=تلوي اعنـاق البشـر قومتـه يمـه لـوي
تقل بين اعلا الجسم واسفل الجسـم انقسـام=شي من جسمه مرتـب وشـي ٍ فوضـوي
استلمنـي فـي جبروتـه اشـر اسـتـلام=ليـن طيّـح معنـويـات راس المعـنـوي
الغـرام ليابطـش فيـك ملعـون الرسـام=مايعرف هـذا قبيلـي .. وهـذاك خلـوي
يكبـر الرجـال امـام المهمـات الجسـام=ويصغر الرجـال امـام الجمـال الانثـوي
مايتحمل نظرة العيـن .. وارخـاي اللثـام=لو باسه بـاس رحمـة حيـاة بـن جلـوي

منقوله ...

لافي حمود الغيداني الحربي