أجمل ماقيل في القهوه العربيه ,,,...,,,...,,,,..,.

[عقاب الحويماني]

القهوة في الشعر العربي





القهوة العربية كانت علماً على الكرم والرجولة والطيب في تاريخ الآباء والأجداد وقد تغنى بها كثيرا من الشعراء ومدحوا كثيراً من الكرماء الذين عرفوا بالكرم (وقهاويهم ) نسبة إلى القهوة ( مبرهجه) أي مفتوحة طوال الوقت وكانت النار لاتسمد بل كانت مشتعلة طوال الوقت (والدلال) بالوجار على جانب النار ... ومن الذين اشتهروا بهذه الصفات وبمنطقة حائل خاصة نذكر على سبيل المثال من سارت بأخبارهم الركبان وكانت بيوتهم (ملفى للخطار) وعابري السبيل ...من هؤلاء (ابن لحيدان راعي الوسيطاء) ( وابن ربيعان و راعي المستجدة) (وعثمان راعي جفيفاء) (والقبالي راعي قصر العشروات) (وابن خوير راعي قفار) (وابن بايح راعي الجثامية) ( وابن عبيكة أهل قناء وجبة) ( وبريك راعي بقعاء) وهناك الكثير من هؤلاء الذين يكرمون الضيف ولكن لعل هؤلاء أشهرههم حسب معرفتي المتواضعة ...

ولكم ماقيل في القهوه

وسأبدأها بقصيدة للأمير الشاعر الكريم ابن خوير:
هو الشاعر الأمير / زيد بن سلامة الخوير ... توفي بحدود عام 1334هـ رحمه الله
يقول الخوير ........

قال الذي يبدع على كل قافي ............... من ضامرٍ ياتن رْيامٍ مواليف
بمنومسة لقم على بكر صافي .............. عليه من شغل ابن سكران توليف
خلّه ليا ماتونس النذل غافي............ وقرب دلالٍ مثل بطٍّ مهاديف
بدلال ماعنهن سنا النار طافي........... بوجار من لادونهن بابهم جيف
مبرهجٍ تسفي عليه السوافي........... من خلْقته ماطق في ركزة السيف
واحمس ولقّم بالعجل يالسنافي ........... بشاميةٍ طرّف لها الجمر تطريف
حماسها قرمٍ من الغوش شافي.......... دايم يقلبها حريصٍ على الكيف
وزلَّه وصَفَّه عن سريب المصافي .......... من خوفة أحدٍ قال بالكيف ياحيف
كِنَّه ليا منه غشاها الرّعافي......... نثر الذّهب من فوق لوح المشانيف
وبهارها من يمّة الهند لافي......... في مركبٍ يقداه زجر العواصيف
وان كان تزمل من طيورٍ هوافي ......... بيضٍ فسدّ أفواهها باشقر الليف
فنجالها لاشف بين الأشافي ......... لاكن يجذب من شفا شاربه شيف
يبرالها من مير فِجّ الخوافي....... بكايرٍ تِرْمَهْ سهيلٍ ليا شيف
صبه لمن يثني خلاف المقافي ......... يوم الفرنج يقذِّف الملح تقذيف
ونفَّل بها اللي للمروات وافي.......... مادوَّر التَّجْرات به والمصاريف
اللي لياغليت شراها جزافي ........... مارطّله عند الدلاليل بنصيـف
ياسامعٍ مني علومٍ تشافي ........... خذها من اللي نافلٍ كل عرِّيف
دنياك لو ضحكت تراها بخافي ........... يبرم دواليب الشِّقا والتكاليف
إنهب منه من قبل مالعمر يافي ........... صيٌّور ماتقفي ركابك مواجيف
صيُّور عمرك ناهجٍ للذلافي.......... سمر الليالي تكمله بالتتاليف
صيُّور مايمسي لظى الجمر طافي .......... دنيا تفرق كل ربعٍ مواليف
وليا حصل عزٍّ مع الكيف كافي ......... ماني على الدنيا كثير التحاسيف


وهذا محمد بن مديبغ التميمي راع المستجدة رحمه الله

يادلتي لايجزعك واهج النار ............... ماجبتك إلا باغي تحْتضينه
أبي ليا جونا مشاكيل وخيار ............... اقلّطك والرزق ربي ضمينه
ياعنك ماغظلم حجاجي عن الجار ............. ولايوم ماعنا تقازى الظّغينه

وهذي لحمد بن ناحي المطيري .. يقول

يازين شبة نارها العصر ياخليف ............... لا مالت الفيه وزان البراد
كسرت فنجال على غاية الكيف ............. لاعج ريحه مثل ريح الزباد
جونا مسايير يبون العجاريف ..... لى أوحو دنين النجر مثل المنادي
جابوا سوالف طيبين المحاريف ............. اللي عليهم يقهرون الطراد

وهذه قصيدة .... زيد الخشيم [يرحمه الله] ... ايضاً بالقهوة... وغير القهوة

لاضاق صدري قمت اسوي من الكيـــف...... فنجال بن مايغــــبب ســريبــــــه
بكرٍ على بكرٍ عـــذي عن العيــــــــف........ يطرى على ان نام خطو الزريبه
وانٍ مصـبـه كــن لــــــونه الى شـيـف....... سـلـك الحـرير الى تمهل صبيبه
صــــبــــه الممرور براسـه زعـانـيـف ....... اللي إلى شبت يصالي لهيبـــــــه
ويثنـــى عن الرّبع المقفين بالســــيـف ..... لاحـــــل في تال التفافيق ديبـــــه
وفيــنــا محـازمنــا اسـوات الكرانيــف ....... ومعــنا خطاة املظب لاح شيبـــه
لعـيـــون غـيـدٍ شرّ كت تـنـثـر الليــف ........اللي شـــكا وارد قـناهـا عـسيـبـه
بشرقــي قـفـار كنهــا مزنة الصـيـف ........ شـرقٍ عن البطحا بجازع شعيبه
اللي نمـاهـا لــلـــمـســايير والضـــيف ........ يوم ان ولــد النذل حارب قريبـه
صرنا لعدلات المناظر كــلاليـــــــــــف ........ ننجش لهم ملح الشـفا كل عيـبــه

وهذه أبيات من قصيدة لاتحضرني كاملة للشاعر ( الصعيليك ) يمتدح ( ابن لحيدان ) الكريم المشهور بما يستنفد من القهوة يقول :

حرام مايرخص بصنعاء بضاعه ............ وابن لحيدان على جاهد القاع
مانفدت يمناه من البن ساعه ......... يطبخ شهر للزوم صكاك الاصباع
ليا من عيلات الاجاويد ضاعه ......... يفدع لو ان المجيدي على صاع


وهذه القصيده الرائعه .. لمبارك بن عبيكه بن رمال

قم يالمقهوي دن نجر ومحماس ............واحمس لنا من حب صنعا نماها
احمس وزين حمسة البن بقياس ..............دقــه ولقمهـا وعـجل سواهـا
وصبه لممرور على الخيل مدباس..............تقفي عنه صم الرمك لانصاها
من فوق ماتاخذ على الخيل مرواس,............لاجدعت خبثات الانفس حذاها
واثنه لمن حوله على الزبر جلاس..............اهل السموت اللي بعيد مداها
ابن عبيكه هرجته مابها باس..........تطرب لها كرام اللحى من حلاها
طول الجدار وقصرة الرجل نوماس............لا صار ما للرجــل داع دعاهــا
تصير بعيون الرفاقه معك باس.............لاصار ماتدعى تره من عناها
يصير قالات ويصير لولاس .............ونوبن من الادنين ياتي بلاها
قلبك يصير ويضرب القلب عوماس...........والنفس تقدح عقب زايد غلاها
خلك على بابك تقل لون حراس.............لاجو عليهن محترين عشاها
لاجن مع الخل الشمالي لها اضراس...........والكل تشكي رجلها من حفاها
نرحب بهم من قبل تجديع الالباس ..........ونقلط لهم تمر الحلا من نماها
ونذبح لهم كبش مربى بالاطعاس...........ونقلطه من قبل يقرب مساها
هذي سلوم جدودنا قبل من راس..........واللي بعدنا كــان ربي هداهـا

الشاعر/ سلطان بن عبدالله الجلعود يرحمه الله ولد بسميراء حوالي عام1320هـ وتوفي بها عام1374ه

الله على الفنجال مع هجعة النــــــــــاس...... بدلال نارٍ مايبطل سنــاهـــــــــــــــا
مع حمسة يملا بهــا كل محمـــــــــــاس.. ..ويقلبــه قرم يعـرف استواهــــــــــــا
قم يافرج شبّه تر الكبد والـــــــــــــرأس ... العين اشوفه قازيه من خطاهـــــــــا
حط الجروم اللي من العام يبـــــــــــاس .... .ليـاما يطوح ضوها مع فضاهــــــــا
واحمس على جمـــر ترى ماله اجـناس..... .وكفـّه ليا منه عرقها غشــاهــــــــــا
واودع بهاره هيل ورهه بالاجـــــراس ...... ياخالط الفنجال تر هو حلآهـــــــــــا
ودقه بنجر يسمعه كل نعـــــــــــــــاس...... ولاتغلق الضبة على من بغاهــــــــــا
وصفـه وصبه تر هو الصفى بقيــــاس...... ماهو خطاة الخامل اللي طهاهـــــــا
اللي يحطه باوسط النار مرفــــــــــاس ..... لما يطير قبوها مع غماهــــــــــــــــا

وهذه قصيده للشاعر / عضيب بن شلاح الحربي ... يذكر فيها مجالس القهوة ويصنف الرجال حسب رؤيته ...يقول

ياما حلا عقب العشا شبة النــــــار .... عقب الهجوع لا رقد كل كوبـــــــه
بقفرية ياعبيد يودع له اشعــــــــار .... وسواة فنجال يشوق بصبوبـــــــه
حبه على المطلوب من بن وبهــار .... يعجبك بالفنجال صبغه وروبـــــــه
كيف يجوز لشارب الكيف والكــــار .... لو دوروا به غمزة مــــا لقوبـــــه
في مجلس فيه المشاكيل حضــــار .... بغيبة ردي الحظ عنهم بنوبــــــــه
اللي يخزوون المسير بالانظـــــــار .... تكاظموا واللي جليس شوشوبــــه
تلافتوا على بعضهم بالانظـــــــــار .... وتغامزوا مابينهم وضحكوبــــــــه
الناس فيهم يافتى الجود هــــــــذار .... مسترحل لبليس زين ركوبـــــــــــه
عراض غرة مسلم غافل غـــــــــار .... يعرضه للناس لو ما حكوبـــــــــــه
دايم لغرات الاجاويد عقـــــــــــــــار .... يظهرعيوب ولا درى عن عيوبــــه
وفيهم تبيني لايسرك ولاضـــــــــار .... ماغير يحسب للربايع ضروبــــــــه
وفيهم حصيني قبوع قمــــــــــــار .... يوصف على ماقيل به طير ذوبــــه
وفيهم بليهي على الكود صبـــــــار .... يصبر ولو زادت عليه الصعوبـــــه
لا جا زمان فيه غلين الاسعـــــــــار .... غدى لربعه بالمكاييل جلوبــــــــــه
وانا جا نهار الضيق بالموسم الحار .... يرخص بعمره مايعد محسوبـــــــه

وهذه هي مجموعة من الأبيات لبعض شعراء بادية الجزيرة العربية الذين حرصوا فيها على ذكر ووصف القهوة العربية المميزة.

يقول الشاعر محمد بن أحمد بن محمد السديري:
صبه ومده يا كريم السبالي ..... يبعد همومي يوم اشمه بالانفاس
فنجال يغدي ما تصور ببالي ..... روابع تضرب به أخماس وأسداس

وهذا الشاعر الفارس تركي بن حميد حيث يصف القهوة وصوت النجر بقوله:
يا ما حلا يا عبيد في وقت الاسحار .... جر الفراش وشب ضو المناره
معدلة تجذا على صالي النار .... ونجر الى حرك تزايد عياره
النجر طق وجاذب كل مرار .... مالفه الملفوف من دون جاره
في ربعة ماهيب تحجب عن الجار .... لامن ولد اللاش ما شب ناره

وكذلك هناك القصيدة المشهورة للشاعر دغيم الظلماوي في القهوة، وفيها يقول:
يا كليب شب النار يا كليب شبه .... عليك شبه والحطب لك يجابي
الوالمه يا كليب عجل بصبه .... والرزق عند اللي ينشي السحابي
حنا علينا جيب ماها وحبه .... وعليك تقليط الدلال العذابي
ادغث لها يا كليب من جزل خبه .... وشبه الى منه هبا كل هابي
باغي إلى شبيتها ثم قبه .... تجذب سراة من بعيد غيابي
بنسرية يا كليب صلف مهبه .... متلطمين وسوقهم بالعقابي
صبه لقرم صرفته ما حسبّه .... يوم البخيل مدنهر الوجه هابي
وعده عن اللي ما يداري المسبه .... اللي يدور بالقصي الغيابي
لا جاضع المتروع خطو الجلبه .... يا حلو تالي الليل خبط الركابي
اقحص لهم وابدي سلام المحبه .... لا شح بالهين كبير العلابي

وكذلك يقول الشاعر سعد بن حمد بن ضويان في القهوة:
ياحسين لاكني على الجمر مجضوع .... من فقد خلاني وفقدي ربوعي
قم سو فنجالٍ ترى الراس مصدوع .... صفه وزله عن سريب الخموعي
فنجال فيه مخموس الكيف مجموع .... بدلال يشدن الخباس الوقوعي
ونجر دلاله ماو بالصوت مفجوع .... يا زين حسه والخلايق هجوعي
وانجاك بالمجلس سنافي وبالوع .... عده على الطيب وكب البلوعي

وهذا الشاعر عبد الله العلي الحرير يقول في القهوة:
قم سو فنجال ونظف أدلاله .... ريحه لراعي الكيف يجلي اعماسه
اشعل ولونه مثل دم الغزاله .... لا ذاقه الراقد يحارب انعاسه
في مجلس تدله الى جاء مجاله .... اللي عن اللجات يقصر حساسه
والا ترا بعض المجالس عذاله .... لا معشر طيب ولا فيه اناسه

ويقول الشاعر غازي بن عون في الغرض ذاته:
يا ريف قلبي للمسايير قم شب .... وحط المنارة في طويل الظلالي
عقب تشق لها لجزل الحطب جب .... وهات النجر واحضر جداد الدلالي
دنّه وخلّه للمسايير يجذب .... لا قام صوته للنشامى يلالي
يوحونه الجيران لا قام يقنب .... ويجيك الاقصى والقصير الموالي

ويقول سليمان المحمد الهزاع في قصيدة عن القهوة:
لا في على جمر الغضى سو فنجال .... فنجال بن من رخيص وغالي
حيثك قديم مغربل البن غربال .... حكيم عند مصاطرات الدلالي
خله على المطلوب يلفت لنا البال .... يفتح لنا المعنى بمبدا المقالي
الى انطلق من ثعلب المبهرة مال .... يشدي خضاب مخفرات حيالي

ويقول محمد العبد الله القاضي عن القهوة وعن الأواني التي تجهز بها القهوة:
دنيت لي من غالي البن مالاق .... بالكف صافيها عن العذق منسوق
احمس ثلاث يا نديمي على ساق .... ريحه على جمر الغضى يفضح السوق
واياك والنيه وبالك والاحراق .... واصحا تصير بحمسة البن مطفوق
دقه بنجر يسمعه كل مشتاق .... راع الهوى يطرب الى دق بخفوق
لقم بدله مولع كنها ساق .... مصبوبة مربوبة تقل غرنوق
خله تفوح وراعي الكيف يشتاق .... الى طفح له جوهر صح له ذوق
إلى أن قال:
زله على وضحا بها خمسة ارناق .... هيل ومسمار بالاسباب مسحوق
مع زعفران والشمطري إلى انساق .... والعنبر الغالي على الطاق مطبوق
إلى اجتمع هذا وهذا بتيفاق .... صبه كفيت العوق عن كل مخلوق

وهذا راكان بن حثلين يقول في قصيدة مشهورة:
ياما حلا الفنجال مع سيحة البال .... في مجلس ما فيه نفس ثقيله
هذا ولد وهذا ولد خال .... وهذا رفيق ما لقينا مثيله

وهذا الشاعر هايس بن مجلاد يقول وهو يصف الدلة وصوت النجر:
قم سو ما يصبغ على الصين يا ذياب .... بدلال يشدن البطاط المحاديب
احمس الى من العرق فوقها ذاب .... واستدن ما يجذب عليك الشراريب
نجر يصيح من الطرب تقل بحجاب .... يصبر على طول الدهر للمواجيب

,,,,,,,,,,,,,,,, وسلامتكم

أخوكم/ عقاب الحويماني

[نبض المشاعر]

يعيطك العافية على القصص والقصائد الرائعة ....

التوقيع

دنيــــا ومــن يـــــدري كلــــ شــــئ يصـــير فيهــــا

[عقاب الحويماني]

أخوي/ نبض المشاعر

مرورك يكفي ياطويل العمر وشرف لي أنا شخصيا" قبل ماتيشرف بك الموضوع واشكرك على الدعم

المتواصل والثناء على مواضيعي يالغالي

والشــــــــــــــــــــــــــــــــــــــرف لي


لك كل الاحترام والتقدير

أخوك/ عـــــــــــــــــــــــــــــــــــــــقاب الحويماني

[fahad8088]

تستاهل القصيد,,,,,,,,,

ومشكور على الموضوع الجيد

اخوك / الروقي.com

[عقاب الحويماني]

أخوي / فهد 8088

والله مرور جميل يالغالي لاهنت ؟ ولك التقدير والاحترام؟


تحياتي / عقاب الحويماني

[هيض القصيد]

الله يوفقك

ذكرتنى فى البر وزمان اول

[عبدالرحمن الهيلوم]

	لاهنت يالغالي ولاهانووووووو اهل الكيف

[محب الهيلا]

مشكور وماقصرت على النقل الرائع

[شبيب شافي الملعبي]

لاهنت على النقل وموضوع تشكر عليه
تقبل مروري

[أبو مرحبا]

واضيف على القصائد التالية قصيدة من شاعر كبير وهو الشاعر غازي بن عون يذكر بها القهوه ويصف طريقة سواتها

ياريف قلبـي للمساييـر قـم شـب ... وحط المناره فـي طويـل الضلالـي

عقب تشق لها لجزل الحطـب جـب ... وهات النجر وأحضر جـداد الدلالـي

ثلاث(ن)الهن راعي الكيـف يطـرب ... وسوطهـن ضمـر والآخـر جلالـي

وبطونهن ماخذن اسبوع(ن)عن الرب ... وجنوبهـن صفر(ن)تـلالا تـلالـي

والرابعـه ملقامـةٍ لونهـا أصهـب ... حيـث إنهـا للنـار دايـم تصالـي

ولاجبت كل شروطهـا اللـي تطلـب ... إجلـس عليهـن يازعيـم العيالـي

وإحمـس لنـا بريةٍحبهـا أشـهـب ... وبهارهـا هنـدي وماهـا زلالــي

وإعـرف تـرى قانونهـا مايخـرب ... وندارهـا ينقـى ومـاهـا يكـالـي

تـراه مايصلـح لهـا كـل مذهـب ... ولاتقبل الراضه ولا الاعـت جالـي

وليا حمست إحرص على حمسة الحب ... واعرف ترى الحمسه تبي وسع بالي

تاخذ على ادنى الجمر فتـره تقلـب ... لين العرق يطلـع سـوات اللوالـي

ومن يـوم يطلـع فالمبردلهـا كـب .... لين النـدار ان كـان فيهـا يشالـي

وليـا خـذت مقـدار للنجـر قـرب ... ودنه بصـوتٍ يسمعـه كـل غالـي

دنـه وخلـه للمسايـيـر يـجـذب .... لاقـام صوتـه للنشـامـى يـلالـي

يوحونـه الجيـران لاقـام يقـنـب .... ويجيك الاقصى والقصيـر الموالـي

وعقـب تـدق البـن لقـم وركـب .... لين انهـا تسمـح مـن الاجتوالـي

وقبل تبهرهـا عـن النـار تجـذب ..... وتركد شويه ليـن يصفـى الحثالـي

وبرويد في حدى المباهيـر تسكـب ... من عقب غال الهيـل فيهـا يهالـي

واعـرف ليابهرتـهـا يالمشـبـب .... تـراه يكفيهـا مـن النـار صالـي

ثم اجذها مـن يـوم بالهيـل تقلـب .... ومن يـوم تركـد صبهـا للرجالـي

حتى يجي الفنجـال منهـا لياصـب ... بين الشقار وبيـن لـون الشعالـي

ياأمّا أشقرٍ رايب مثل بـول الارنـب .... والا اشعـل يشبـه لـدم الغـزالـي

يطرب لها من كان للكيـف يشـرب .... كيف النشامى اللي من العيب خالـي

واعـرف تراهـا عـادةٍ ماتسـيـب .... ولاينتقدهـا إلا قصـيـر الحبـالـي

تـراك مـن كـل المناسـب معـرب ..... مابيـن جـدان وعمـام وخـوالـي

وابيـك عـن منهاجهـم ماتجـنـب ..... انكـان فكـنـك بـنـات الليـالـي




لاهنت ياعقاب الحويماني

التوقيع

إن قلَّـت الوزنـه وربعـي مشافيـح ** أخلـي الوزنـه لربعـي واشـومـي