محمد وابنه دباس
محمد أبو دباس من أهل (بلدة العودة) من بلدان سدير في نجد ضاقت به الدنيا ذرعا
بعد رحيل ابنه دباس طلبا للرزق فقد طالت غربة دباس لأكثر من ثمان سنوات عانى خلالها
والده الكثير من مضايقات قومه واعتدائهم عليه بالأقوال والأفعال حيث
قالوا فيه ما يندى له الجبين ويمس الكرامة وقطعوا الماء عن نخيله فأصبح يعاني
الأمرين غياب ابنه وساعده الأيمن والذل والاحتقار في دياره، فأخذ يتجنب الناس وحديثهم
وعاش وحيدا منغلقا على نفسه، فنصحه أحد أصدقائه بأن يرسل إلى ابنه دباس ليعود بسرعة
ويرى ما وصلت إليه الحال فكتب محمد هذه القصيدة وأرسلها مع أحدهم للديار
التي يعمل بها دباس وقد اختلف الرواة في تحديد تلك البلاد فمنهم من قال
أنه كان في العراق ومنهم من قال في ايران ومنهم من قال في عمان
والقصيدة كالتالي:
يا ونةٍ ونيتهـا مـن خـوى الـراس=مـن لاهـبٍ بالكبـد مثـل السعيـره
ونين من رجله غـدت تقـل مقـواس=ويوّن تالـي الليـل يشكـي الجبيـره
ويا حمس قلبي حمس بـنٍ بمحمـاس=ويا هشـم حالـي هشمهـا بالنجيـره
ويا وجد حالي يا مـلا وجـد غـرّاس=يوم اثمرت واشفا صفـى عنـه بيـره
من ثمر قلبـي سـرا هجعـة النـاس=متنحـرٍ دربٍ عسـى فـيـه خـيـره
الله يفكـه مـن بـلا سـو الاتعـاس=ومـن شـر عبثـات الليالـي يجيـره
فى ديـرةٍ تقطعـت عنـه الارمـاس=سبعيـن يـومٍ للركـايـب مسـيـره
لا والله إلاحـال مـن دونـه اليـاس=حـط البحـر والبـر دون الجـزيـره
يالله ياللي رد مـن عقـب مـا يـاس=يوسف على يعقـوب وابصـر نظيـره
ترد على دباس يـا محصـي النـاس=يـا عالـمٍ مـا بالخفـا والسـريـره
يا دباس أنا بوصيك عن درب الادناس=تـرى الـذي مثلـك يناظـر مسيـره
عليك بالتقوى ترى العـز يـا دبـاس=فى طاعة اللـي مـا ينجيـك غيـره
هاذي ثمان سنين من رحت يا دبـاس=لا رسالـه جتنـي ولا مـن بـريـره
يا دباس من عقبك ترى البال محتاس=وعليـك دمـع العيـن حـرّق نظيـره
وعليك كنى فى دجـا الليـل حـراس=أصبح على حيلـي وعينـي سهيـره
أصبح انا مابيـن طـاري وهوجـاس=وطـواري تطـري عليـنـا كثـيـره
مثل الوحش قلبي على كـف حبـاس=يكفـخ كمـا طيـرٍ اسبوقـه قصيـره
متحيرٍ من عيلـه البيـت يـا دبـاس=ارجى ثـواب الله وأخشـى المعيـره
أخاف من حكي العداء ثـم الانجـاس=أهـل الحكايـا الطايلـه والقصـيـره
ويقـال خـلا عيلتـه عنّـز الـراس=أقفـى وخلـى عيلـةٍ لـه صغـيـره
والا فأنا يـا بـوك قطّـاع الارمـاس=مانيـب مثبـورٍ أو رجلـي كسـيـره
آصلك لو دونك نبـا حمـر الاطعـاس=الصلـب والصمـان دروب عسـيـره
مهالـك مـدارك مـا بهـا أونــاس=ألا الثعـل والبـوم تسمـع صفـيـره
لو كنت فى نزوى وديرة بنـي يـاس=أهـل المـوازى والوجيـه الغبـيـره
عبّـادة الاصنـام شرّابـة الـكـاس=الخمـر والتنبـاك فيـهـا وغـيـره
لركب على وجنا من الهجن عرمـاس=فجا النحر يا دبـاس حمـرا ظهيـره
متروسة الفخذيـن مزبـورة الـراس=كـن الخـلاص عيونهـا يـوم أديـره
أو شبـه ربـدا تخـفّـق لـلأونـاس=وان رفّعـت جنحانـهـا مستـذيـره
تنشر من العوده على نـور الانفـاس=عند الفجـر والليـل مقفـي مريـره
والعصر بالصمان تسمع لها اضـراس=حبـل الرسـن خطـرٍ تبتـر جريـره
نهـار ثالـث بيـن حـمـا الاوراس=واره يمينـك جعلهـا لــك سفـيـره
ثـم أركـب ساجيـة تقلـب الـراس=تمشي بأهلها فـى البحـور الغزيـره
إلى مسقط الفيحاء بها الخير محتاس=لـولا الكفـر والشـرك واوي ديـره
عز الله انهـا ديـرةٍ مالهـا أجنـاس=لـولا بهـا يعبـد مــع الله غـيـره
لـولا بهـا يشـرك علـي وعـبـاس=وأيضا بهـا الفـاروق سبّـه بريـره
فيها الطبيخ وراهي الخبز يـا دبـاس=يقعـد خـوى الـراس خنـة خميـره
هى ديرة اللي باغـيٍ كيفـة الـراس=ولا له أحد همه مـن النـاس غيـره
هيسٍ ولد هيـسٍ للمواعيـن لحّـاس=يفـرح إلـى نيـدي لذبـح النحيـره
وماقفك ذا يا دباس ما فيـه نومـاس=يصلـح لقيـنٍ مهنتـه طـق زيــره
ترى الفـداوي دون وانشـد النـاس=راعيـه مـا يذكـر بمـدحٍ وغـيـره
ماله سوى طق الحنك منـه واليـاس=وليا انقطع خرجـه فـلا لـه ذخيـره
طلب المعيشـه بالحراثـه والاجنـاس=المشتـرى والبيـع يوصـف وغيـره
قم انهض العيرات مـع كـل فـرّاس=يـا دبـاس دوّر خـيّـر تستشـيـره
جدك وعمانـك هـل العـز والبـاس=أهـل اللـوازم مكمليـن القصـيـره
يا دباس ما يصبر على البق والحاس=ألا الـذي مالـه بنـجـدٍ عشـيـره
واليوم يا مـروي شبـا كـل عبـاس=أنت الرجا يـا كعـام وجـه المغيـره
عشرين عامٍ كلها أرجيـك يـا دبـاس=مثـل الغريـر اللـي تولـع بطـيـره
عد المناكـب هيلـعٍ فـرخ قرنـاس=يمناه فـى لطـم الحبـاري شطيـره
عانق خلوجٍ روّحـت عقـب مـرواس=عنـد العصيـر لبيضهـا مستـذيـره
والليل جاها وحال من دونهـا اليـاس=روحها علـى فرقـاه فـرت فريـره
يا دباس أنـا يابـوك مانيـب بـلاس=ميـر ان عيـلات الرفاقـه كثـيـره
جنبت وسط السوق وامشي مع الساس=وأخذ شـوي الحـق واتـرك كثيـره
يا دباس لو جبت من دحب الاكيـاس=مختلـفـةٍ مــا بـيـن رزٍ ونـيـره
مالي بها يـا جعلهـا بألـف قبـاس=أو جعلها تذهـب ولـو هـي كثيـره
يا دباس قلبي كل مـا هـب نسنـاس=شرقيـةٍ هـبـت بقلـبـي سعـيـره
والحال يا فرز الوغى مسّهـا البـاس=عليـك يـا ناطـح وجيـه المغـيـره
وغصون قلبي يا فتى الجـود يبّـاس=غـادٍ أنـا يابـوك كـنـي هشـيـره
من شافنـي يقـول ذا فيـه لسّـاس=واللـي بـرى حالـي إلهـي خبيـره
لا وعلا مـن قبـل غـوّال الانفـاس=ومفـارق الدنيـا يجيـنـا بشـيـره
عسى يطق البـاب والنـاس غطـاس=يـا والـي القـدرة عليـك اتعبـيـره
وصلاة ربـي عـد ماهـب نسنـاس=على النبـي عـدة حقـوق المطيـره
وتذكر بعض الروايات أنه بعد مدة قصيرة وفي وقت طلوع الفجر ذات يوم شاهدت
ابنة محمد الماء يتدفق في نخل أبيها بعد انقطاعه إلا أنها لاحظت بعض الاحمرار في الماء
فذهبت لتخبر والدها الذي صاح فرحا وهو يردد لقد عاد دباس وما هذا الاحمرار إلا دم من
أهانوني في غيابه ، وبالفعل صدق حدس الوالد بقدوم دباس وظنه الذي لم يخب في ولده ،
فقرت عينه وانزاح همه بوجود ابنه وساعده الأيمن ،
وإليكم قصيدة الابن دباس التي أرسلها لوالده قبل قدومه
حي الجواب اللي لفانا من الـراس=جابـه غـلامٍ مـا توانـى مسيـره
اهلا هلا عـد مـا حبـك قرطـاس=أوما كتـب فوقـه بيـوتٍ شطيـره
جواب منهو لي مودٍ مـن النـاس=ابوى مـا يوصـف حلـيٍ لغيـره
فرز الوغى كنه على الوكر قرناس=قـروم ربعـه كلـهـا تستشـيـره
دليل عيـراتٍ ليـا هـب نسنـاس=ثـم ادلهـم الجـو ومابـه ذخيـره
مهفي الغنم لاهل الركايب والأفراس=لا روحوا له فـلا عليهـم قصيـره
راعي معاميلٍ بهـا العبـد جـلاس=للبـن يشـري بالسنيـن العسيـره
هاذي بمركاها وهـاذي بمحمـاس=وهاذي يصبـه للوجيـه السفيـره
وخلاف ذا يا راكبٍ فوق عرمـاس=مامونةٍ من نقـوة الهجـن عيـره
حمرا وهي فى سنها وقم الاسداس=متوسط لا فاطر ولا هـى صغيـره
ماهي لحوحٍ راكبه بالعصـا قـاس=حرّم عليهـا غيـر شيـل النقيـره
والخرج هو وبيوت قيلٍ بقرطـاس=مع مزهب الأيام مـا هـي كثيـره
وفوقه غلامٍ منوته قطع الارمـاس=لو هـو بليـلٍ مـا تغيـر نظيـره
وليا لفيت الدار فاجهر بالاحسـاس=وبلغ سلامـي كـل ذيـك العشيـره
وختص ابوي اللي نفل جملة الناس=وخصّه بعلمٍ وقـل ترانـي بشيـره
لا يا نقى العرض يا بـوي لابـاس=ان كان تشكي الضيم فأنـا اسيـره
وان سايلك عني ترانـي بنومـاس=وأنا أحمد اللي ما توسلـت غيـره
الحمد لو يشرى شرينـاه بأكيـاس=بأموالنا نرخـص نـدوّر الستيـره
مطرق فنرجيٍ مضاريبـه الـراس=ومصلبـخٍ جبتـه عسانـى ذخيـره
من صنع نصرانيٍ مشروبه الكـاس=يذكـر ورى جـاوه بعيـدٍ مسيـره
أبغيه للي حادينـك علـى السـاس=اهـل النمايـم والحكايـا الكثيـره
ربعٍ نووا فيك الـردى والتخسـاس=مهبول ياللي قـال غايـبٍ عشيـره
علي ديـنٍ لأودع الجمـع ينحـاس=لين العشير يقـوم يلعـن عشيـره
يا بوي انا ما رحت لكيفت الـراس=مع ذا ولاني فـى سفـاهٍ أوغيـره
أما سكنا الدار من غيـر هوجـاس=وألا نعـاف الـدار ونـدوّر غيـره
كله لعينا كلمـةٍ قلـت يـا دبـاس=تشكي وأنا دونـي بحـورٍ غريـزه
خذ لك يمين الشرع قطاّع الأنفـاس=انـه فـلا جتنـي علـومٍ بصيـره
لا نيب جانـي ولا حبـرٍ بقرطـاس=ايضـا ولا جتنـي علـومٍ سفيـره
ان كان تشكي الضيق يا بوي لاباس=جاك الفرج يا بوي هـو والبريـره
ولا فأنا يا بوي قطـاع الأرمـاس=اصبر على الشدة ولو هي عسيـره
يا مسندي يا بوي شف اوكد الناس=ثم أنشده قل ويش هو في مسيـره
ان كان ما يفرح صديقك بنومـاس=تحرم علينا اللـي نهـوده صغيـره
مدلول مجهول زها زيـن الالبـاس=بنت الذي يثني ليـا جـت كسيـره
طارٍ يقول اظهـر وطـار بجـلاس=قمت اشرب التنباك واثـره نكيـره
ابغى عسى الله يبرد القلب يا ناس=من لاهـبٍ شبـت بقلبـي سعيـره
ومن كان له غايبٍ فلا يقطع الياس=ان قدّر الله جـاب علمـه بشيـره
منقوله
« آخـــر الـــمـــشـــاركــــات »
21-Aug-2006, 07:20 PM
محمد وابنه دباس !!!
العرض العادي
