عمرك مطيه للشاعر/ عبدالله الطلحي - الهيـــــــــــــلا *** منتدى قبيلة عتيبة

فيصل المسعودي · 17-Dec-2005, 12:02 AM

قصيده للشاعر / عبدالله الطلحي الهذلي

أنا البارحه يوم إن خالي الضماير بـات= تسلّطّ علـى عينـي حريـبٍ يحاربهـا
حرمها لذيذ النوم والنـوم لـه لـذات = ليا حل فـي العينيـن فتّـر حواجبهـا
سرت بي ركايب هاجسي في زمانٍ فات= وكم مـن هواجيـسٍ تتعّـب ركايبهـا
أراجع كتاب العمر واقلّـب الصفحـات = وصفحـه مزيّنهـا وصفحـه مخربهـا
وياكثر مافيها صور نـاس وحكايـات = صور ناس وحكايات واشعـار كاتبهـا
زمان الصبا يوم الهوى طيّب النسمات = ليا داعـب الأنفـاس ريحـه يطيبهـا
بريح الزهور اللي لها بالهوى ميـلات = ليا هبت انسـام العصـاري تجاذبهـا
وانا مثل طير الروض لاطابت الأوقـات = يطـارد فراشـات الزهـور ويلاعبهـا
وروح الصبا غضه طريه لهـا فـزات = خدمها صحيح الجسم والجهل صاحبهـا
وما تدري إن العمر يمضي وله ساعات = سوالف ربيعـه فـي خريفـه يكذبهـا
هوى النفس يدفعها ويظهر لها الرغبات = وكم رغبـةٍ كانـت وخيمـه عواقبهـا
ولابد ماتصحى من الجهـل والغفـلات = ليا شابت اللحيـه وشابـت شواربهـا
وماتت زهور الروض واوراقه الغضات = وقبّل على الأغصان حطـاب يحطبهـا
لوإن المطر همّال مايحيي اللـي مـات = تشوف السيول تسيل والرمل يشربهـا
ليا اقفى ربيع العمر قفّت معه حاجـات = بعدها تلـد العيـن وش عـاد يعجبهـا
رسوم الديار الباليـه مابهـا طمعـات = ليا اقفى الربيع وصالي القيض يلهبهـا
وعمرك مطيه عودت تسرع الخطـوات = بعد ما اونست جرح المسامه بغاربهـا
نوت تنهي الرحله وتخلص من الحملات = وترتاح من هـذي المسامـه وراكبهـا
نصيبك من الدنيا رصيدٍ من الحسـرات = وهـذي هـي الأيـام وانـا مجربهـا
ولابدى مشرق شمسها يخلف الهقوات = ولابـد مشرقهـا يـعـوّد لمغربـهـا