مساجلة الشاعر غازي بن عون والشاعر راجح العجمي

[سيف العجمان]

يقول غازي بن عون :

اللحيه اللي ماتكرم عن الموس = ودك يكرم مجمر الطيب عنها
اعفى اللحا دين وكرامه وناموس = واللوم والشرهه على من حسنها
في عصر اخو شرعا وسلطان ابا الروس = وامثالهم من شامها لا يمنها
وبيض السلوم إلها شريعه وقاموس = وعوارف بالعرف تامر وتنها
وشعر اللحا رمز عن الخدش محروس = ولا ينتقدر بالجواهر ثمنها
واليوم هالحلاق يعطونه فلوس = لا خلَص إخوان الغنادير منها
فالقلب ياراجح من الخوف هاجوس = في هجرتٍ ماعاد يعرف لحنها
رجلينها جت فوق والراس منكوس = وقلت محامدها وكثرت فتنها
ولقحت سفاح وجالها عشرت ديوس = وخربت مبادي من رضع من لبنها
وفكت ركاس اللي لها اعوام مركوس = وشره على قود الذلول برسنها
وبدا بتخطيط منظم ومدروس = وان شافله فرصه فالامه طعنها
صواهر للمجتمع ريش طاووس = يبدي المحاسن والمساوي دفنها
ولو القنا مرفوع والحبل ممسوس = ماقامت الشله تزاول مهنها

رد راجح العجمي :

البارحه جاني عن النوم كابوس = قزا العيون ونومها مامكنها
كنه يطعن ثومة القلب دبوس = ومما تشوف العين يكثر حزنها
هيض علي غازي دواكيك وحسوس = بابيات شعرٍ تو فك مخزنها
ابيات كاسيها من الشرع ملبوس = كنها الذهب فالعقد واحيان كنها
تنقى كما ينقى الفشق لأم نادوس = وبالهينه والفارغه ماشحنها
يفداه من لا خمها حاسها حوس = وجاتك ترج بيوتها ماوزنها
ومما دهى غازي ترا الصدر متروس = خيم على قلبي وكبدي قطنها
ولا استطيع ابوح والخد مانوس = ويسعد من نصف السلامه ضمنها
اشرت ياغازي إلى شيء ملموس = عن ماجرى للي ابليس احتضنها
جيل على ماقيل غاوي ومنحوس = ناسٍ عن السنه تحادى ضعنها
وقلوبها سود على الدين ونجوس = ياقل صافيها ومكثر دخنها
تسهر على غث القنوات وتهوس = هذي ثقافتها وهذا زمنها
وتركض وراء الدنيا مداوير وعسوس = ولا تفرق طيبها من عفنها
تاكل من اللقمه ولو جوفها سوس = السوس فيها والسنون تعجنها
دنياك دقت للخطر كل ناقوس = وياكثر من يشكي بلاوي محنها
قامت تحوس الناس ودوسها دوس = ناس تضحكها وناس تغبنها
ولا تفرق بين رئيس ومريوس = تبطش بصاحبها ليا من ومنها
والى انخدع فيها مهابيل وهدوس = عطها قفاك وصد والنفس صنها
دارت على اللي فالقسا تذبح العوس = اللي يزوزي بالولايم صحنها
ناسن لها قيمه واهل طرش وغروس = اليوم يقطن غيرها في وطنها
ماعاد فالدنيا لها حس ورموس = ربع رحا سود الليالي طحنها

آخر تعديل سيف العجمان يوم 21-Dec-2011 في 05:09 PM.