قصيدة (الشيخه) لـ مقحم الصقري العنزي

[عبدالله الدغيلبي]

هذه قصيدة الفارس الشاعر مقحم بن فالح النجدي الصقري العنزي رحمه الله، وهي من القصائد القديمه ، وسميت بـ(الشيخه) عند عنزة لقوتها وجزالتها، وهي أحدى الثلاثة قصائد والتي سميت لدى عموم عنزة بشيخات عنزة الثلاثه ، الأولى شيخة مشعان إبن هـذال، والثانيه شيخة مقحم الصقري، والثالثه شيخة الدسم السبيعي.

أما قصيدتنا هذه فقد قيلت قبل 200 سنه تقريبا. وهي مليئه بالفخر والحكم والنصائح:






من البارحة بالقلب هجـس ٍ وتعبـار
هجس ٍ وهاجـوس ٍ تعاقـب نكيفـه
الصبر مفتاح الفـرج هـو والافكـار
من لاصبر تصبـح حوالـه كسيفـه
يالله يالمطلـوب يــاوال الاقــدار
انت الـذي مـدات جـودك لطيفـه
يالله يالمعبـود عـاون هـل الكـار
تحـل شــدات عليـهـم كليـفـه
اللـي مجالسهـم بهـا بـن وبهـار
ونجـر ٍ يصـوت للمسيـر رجيفـه
ومكارم ٍ للضيـف عجـلات وكبـار
ومفطحـات فـي صحـون نظيـفـه
تقليطهـم للضيـف قعـدان وبكـار
وحيل الغنم وقـت السنيـن الحفيفـه
اكرام ضيـف البيـت حـق وتعبـار
والكـل منـا يفتخـر فيـه ضيفـه
يا مزنةٍ غـرّا مـن الوسـم مبـدار
اللـي جذبنـي مـن بعيـدٍ رفيـفـه
هلت مـن القبلـه هماليـل الأمطـار
من سيلها الـوادي غدالـه وحيفـه
تمطر من الهدرا اليـا خشـم سنـار
وتسقـي ديـار محقبـه والحتيفـه
وتضفي على كل المفالـي والاقطـار
وتصبح بها خـدان ربعـي مريفـه
عقب الحيا فاحت بها ريـح الازهـار
وتعاقـب النـوار مثـل القطيـفـه
وترعا بها الغرا وتبنـي لهـا طـار
عقب الضعف راحـت ردوم منيفـه
اذوادنـا مايرتعـن دمـنـة الــدار
ولا يرعـن الا بالفيـاض النظيفـه
يرعـن بعبـدالله وجبـر ٍ وجـبـار
خيالـة يــوم المـلاقـا عنيـفـه
ترعى بها الوضحا من الذود معطـار
غبوقـة الخطـار عجـلٍ عطيـفـه
يبنـي عليهـا بنيـة اللُّبْـن لجـدار
عقب الضعف راحـت ردومٍ منيفـه
اذوادنا يرعـن بنـا سـر وجهـار
من دونهن نروي الغلـب والرديفـه
ترعى بضف الغوش بقصاف الاعمار
تقطف زهر مرباعهـا مـع مصيفـه
ما هي سوالف مسرد ٍ عقب ما نـار
اللي هرب واطـراف رمحـه نظيفـه
إن سوهجوا عنها قليليـن الابصـار
من دونها نروي السيـوف الرهيفـه
ان سوهجوا عنها معاميس الابصـار
حنـا نـرد اللـي يبيـهـا نكيـفـه
خطو الولد مثل البليهـي اليـا ثـار
زود ٍ على حمله نقـل حمـل أليفـه
بشدا هديب الشـام شيّـال الاقطـار
واليـا كبـر حملـه تـزاود زفيفـه
وخطو الولد مثل النداوي اليـا طـار
صيده من الجزلات ماهـي ضعيفـه
ترجي العشا من مخلبه وقـع وطيـار
حسه على صيد الخـلا لـه وحيفـه
وخطو الولد يصبر على موتة النـار
صفـر علـى عـود تضبـه كتيفـه
وخطو الولد يامال قصـاف الاعمـار
لانافـع ٍ نفسـه ولا منـه خيـفـه
واليا بخصته ماسـوى ربـع دينـار
مع العـرب يشبـه خطـاة الهديفـه
حنا فريـق ولا نغبـي سنـا النـار
مـا ننـزل الا بالديـار المخيـفـه
ودار ٍ به الحقـران ماهـي لنـا دار
حتيش لو صـارت خصـاب مريفـه
وحنا لك الله مـن بعيديـن الاخبـار
والنفس ما نلحـق هواهـا حسيفـه
حلويـن للصاحـب وللخصـم قهـار
وعدونـا لـو هـو بعيـد نخيـفـه
حنا كما المشخص عن الصرف ما بار
بالوزن يرجـح والمصـاري خفيفـه
وتلقـى منازلنـا رفيعـات واخيـار
والرجل عن دوس القصايـر حفيفـه
لابد مـا نسجلهـا تواريـخ واذكـار
وتبقى لدسميـن الشـوارب وظيفـه
الا ومـع ذلـك لـك الله لنـا كـار
عن جارنـا ماقـط نخفـي الطريفـه
نرفا خمال الجار لو هـو بنـا بـار
ونضحك حجاجـه بالعلـوم اللطيفـه
ولا نبدي الخافي لاصـار مـا صـار
وندمح خمال الجار لـو بـان حيفـه
ونرفا خمالـه رفيـه العـش بالغـار
ونودع له النفـس القويـه ضعيفـه
والجار له قيمـة وحشمـة واعتبـار
وجارتنـا عـن كـل عايـز عفيفـه
ما زارهن من يبغـي الحيـف زوار
الا ولا عنهـن نــدس الغريـفـه
نبيـه إليـا بـدل الــدار بـديـار
وكـل بجيرانـه يـعـد الوصيـفـه
نكرم سبال الضيـف حـقٍ وتعْبـار
لا من ولـد العفـن شـح برغيفـه
أحد ٍ علـى جـاره بختـري ونـوار
و احدٍ على جـاره صفـاتٍ محيفـه
وصلاة ربي عد ماخضـر الاشجـار
على الرسول اللي علومـه شريفـه






وسلامتكم .. منقول

,,,,,,,,,,,,,,,,,,,,,,,,,,,

[ولدعساف]

صح لسانه وصح منقولك وسلمت يمناك يالدغيلبي ع النقل !!

,,

ودي وتقديري لشخصك !!

التوقيع

قال أبوبكر الصديق - رضي الله عنه - ( الموت أهون مما بعده، و أشدّ مما قبله ) حسبي الله ونعم الوكيل كتبت وقد أيقنت يوم كتابتي .. بأن يدي تفنى ويبقى كتابها فإن كتبت خيراً ستجزى بمثله .. وإن كتبت شرا عليها حسابها

[محمد العتيبي]

الف شكر يالغالي ..



ونعم بالآد وايل

التوقيع

للتواصل عبر twitter تويتر al_bargawy@

[خالد بن مورق]

نعم هي شيخة قصائد عنزه ومثلها قصيدة بديوي الوقداني ايامنا والليالي شيخة قصائد عتيبه