هل هذه محاوره أم سوالف ليل !!!؟؟؟

[ابو فايح]

*** موال ليلة البارحه فالطائف الذي أخذ نصف وقت المحاوره


*** ما زلت أقول فكرة مناقشة مثل ذلك جيده ولكن تنفيذها خاطئ خصوصا في ما كتب أسفل .

*** هل نوقش الموضوع بطريقه شعريه صحيحه أم فقط دغدغت مشاعر وضحك على الجمهور وإرضاء صغار السن !!؟؟

*** أربعة شعراء لهم أسمائهم كل واحد يغني على ليلاه وكأن كل خصم في حفله لوحده !!!

*** العتب بشكل كبير على الهرم الشعري مستور العصيمي ..

*** تركي 2000 خصمه مستور العصيمي ولكن لا يستمع لما يقول !! فقط يجهز مالديه وقال خلووووها !!!

*** ابن عتقان مثل معايد القريتين تاره يرد على مستور وتركي وتاره يرد على خصمه العنزي!!!

*** شاهر العنزي ضاع فالطوشه ولم يستطيع أن يحدد لنفسه موقف !!!


*** من المؤسف أن يذهب نصف وقت المحاوره في سوالف طائشه لا تمت للشعر بصله الا فالوزن والقافيه !!!

*** أعزائي الشعر تريدون اللعب على المكشوف ما عليه نمشيها في مثل هالمواضيع ولكن أن يغرد كل شاعر لوحده فهذا لا يسمى شعر الشعر خصمه !!!

*** هذه وجهة نظري وأتمنى الا يتكرر ذلك في أي حفله احضرها مستقبلا .

مستور العصيمي

عندي رساله يا ملكنا المفدى =.......وانت المبدى
وللنائب الثاني عساها تودى = ماتعرض الشكوى على غير أهلها

يا المطيري شد حيلك شد = خلنا الليله نقول بها

ابن عتقان

ارسل يا مستور العصيمي رسايل =تبغا تدخلنا معك في مشاكل
الله يجملنا ويالله تجمل = ماتعرض الشكوى على غير أهلها

كان كلمة عودنا من جد = يمكن الشعار ينكبها

تركي 2000

ما دام ابو متعب بخير وعوافي=الشعب كله ما يجيه الخلافي
في كل يوم(ن) والتطور يشافي = ماتعرض الشكوى على غير أهلها

هد يا شاعر عتيبه هد = طيع شوري لا تخربها

شاهر العنزي

يا تركي المطران وعيال وايل = من سابق الأيام قول وفعايل
من دون قاصر في جميع القبايل = ماتعرض الشكوى على غير أهلها

يا ولد عتقان جيب وود= ...................

مستور العصيمي

تكفى يا ابو متعب وتكفى يا نايف = الكل منا صار خايف وخايف
أهل المواشي ما وراهم وظايف = ماتعرض الشكوى على غير أهلها

البحر ما بين جزر ومد = والسماء فيها كواكبها

ابن عتقان

أنته يا شاهر شخص طيب يا شاهر =تأثر عليه الدبلجه والمظاهر
خلك محايد كنك انظام ساهر = ماتعرض الشكوى على غير أهلها

جاكم المستقبل الأسود = من معه خطه يجربها

تركي 2000

تكفى يا ابو خالد قوي العزايم = البدو ما تلقى شعير البهايم
وساهر يصورنا ويكتب قسايم = ماتعرض الشكوى على غير أهلها

انتظر بكره يجيك الرد = راقب الساعات واحسبها

شاهر العنزي

طيب ولكن خل عنك الحركات = ساهر جلسلك عند كل الإشارات
الله يعينك سوق كل الغرامات = ماتعرض الشكوى على غير أهلها

البنا ما هو سوات الهد = العرب بانت مكاسبها

مستور العصيمي

صار الشعير أغلا من البن والهيل = من همه البدوان ما تمرح الليل
هذي تراها كارثه يا ريجيل = ماتعرض الشكوى على غير أهلها

رحت للتاجر لعين الجد = فيه عيونه يقلبها

ابن عتقان

بالله يا تركي يا مستور يا إخوان = الفهلوه هاذي على الشعب من شأن
زادوا لكم كم قرش واحد فالالبان = ماتعرض الشكوى على غير أهلها

النتيجه تتضح فالغد = تحلق دقون بشواربها

تركي 2000

الطالب اللي كل يوم يتحرا = أهل الوظايف كل يوم اتبرا
وإليا وصلهم قالوا الربع برا = ماتعرض الشكوى على غير أهلها

أكثر التجار بارد خد = ودك خدوده تتربها

شاهر العنزي

وش رايك بتركي ومستور خيه = يمكن يجون بنكبت(ن) عالميه
ترى الخوي واجبه ينصح خويه = ماتعرض الشكوى على غير أهلها

اسلمي (ن) لو زهمته صد = كل صدقانه محاربها

مستور العصيمي

مخازن التجار مليانت(ن) حب = مير الغلا يا سيدي نار تشتب
الله وأكبر كن مال البدو رب = ماتعرض الشكوى على غير أهلها

أثر بعض الناس ماله سد = يسمع الكلمه ويقلبها

ابن عتقان

مستور يملك له ملايين فالبنك = وتركي مسوي له فنادق تجننك
يعني يا شاهر صاحبي ما دروا عنك = ماتعرض الشكوى على غير أهلها

طيع شوري يا أجودي وإشرد = بالنجوم اللي مركبها

تركي 2000

ملوكنا يا جعلهم دايم بخير = والهم ولاء ولهم معزه وتقدير
لكن حنا عاقبتنا الفواتير = ماتعرض الشكوى على غير أهلها

الله أعلم يا نهار الغد = الطيور أدمت مخالبها

شاهر العنزي

تركي ومستور العصيمي هوامير = وأنا مراقبهم على الشر والخير
وألا أنت طارت خيمتك بالمعاصير = ماتعرض الشكوى على غير أهلها

تدري إني بالمعارك ضد = كل ما هبت هبايبها

مستور العصيمي

تكفى وتكفى يا وزير التجاره = راحت مواشينا علينا خساره
طريقة التجار ماهي شطاره = ماتعرض الشكوى على غير أهلها

الليالي ووجها مسود = عاقبتنا الله يعاقبها

ابن عتقان

يشكي لكم جور الفواتير تركي = والمشكله جواله الدنمركي
طول السنه قاعد ويحكي = ماتعرض الشكوى على غير أهلها

يا عنزي يا زلمه بعد = أي حاجه ما تناسبها

تركي 2000

عجل نبا نمشي يا مستور عجل = لقيت ابن عتقان شايل مسجل
ياليتها يا صاحبي تنتوجل = ماتعرض الشكوى على غير أهلها

جعل عينك يا سلمي تنسد = السوالف لا تروح بها

شاهر العنزي

أنته يا ابن عتقان جنت جنونك = إليا متى وأنته ما تحسن ضنونك
لكن على قولك تندر عيونك = ماتعرض الشكوى على غير أهلها

اسلمي (ن) عنه ما ننشد = المشاكل لا يسببها

[فهد علي العازمي]

أنا أتوقع يا أبوفايح والعلم عند الله
إنهم يبون الرسالة تصل لمن يريدون كما يريدون
لإنهم يخاطبون أمراء ووزراء وتجار قد لايعرفون من المحاورة حتى إسمها
هذه وجهة نظري

[بـن عـــاصم]

اخوي بن فايح اتفق معك فيما قلت ..

مستور طرق موضوع مهم لكن باسلوب شعري سطحي او مايسمى الموال..
امّا تركي الميزاني فمثل ماقلت يابو فايح انه يجهز بيوته بدون ماينتظر ردّ مستور ..
لكن من وجهة نظري على الاقل انه عرف كيف يجاري الموضوع ويمشي على نفس الخط ..

وبالتأكيد ان الطاروق كان مخطط له من مستور وتركي حتى يحقق شهرة واثارة مثل طاروقهم الاول اللي تناقلته الصحف ومقاطع اليوتيوب, واكبر خطأ انهم اشركوا شاهر وابن عتقان فالطاروق اللي كان هذا الطاروق كان فرصة لهم للشهرة والاستفاده ..

شاهر ماأدري ليش قام من الاساس كأني احس انه يتهرب ولايبغى يطرق الموضوع اصلا مع ان الطاروق واضح من اول بيت وكان بإمكان شاهر يتركه وهو افضل له من الدخول الذي دّل على موقفه الضعيف ..

امّا ابن عتقان مذبذب مثل اللي يخم الجرة ويخطيها وحتى في ردّه على مستور وتركي كان ضعيف ..

مواضيعك شيقة وقلمك مميز ومفيد يابو فايح ولك مني كل الشكر وننتظر المزيد ..

آخر تعديل بـن عـــاصم يوم 14-Jul-2011 في 02:12 AM.

[& محمد خالد القحطاني &]

المشاركة الأصلية كتبت بواسطة بـن عـــاصم

اخوي بن فايح اتفق معك فيما قلت ..

مستور طرق موضوع مهم لكن باسلوب شعري سطحي او مايسمى الموال..
امّا تركي الميزاني فمثل ماقلت يابو فايح انه يجهز بيوته بدون ماينتظر ردّ مستور ..
لكن من وجهة نظري على الاقل انه عرف كيف يجاري الموضوع ويمشي على نفس الخط ..

وبالتأكيد ان الطاروق كان مخطط له من مستور وتركي حتى يحقق شهرة واثارة مثل طاروقهم الاول اللي تناقلته الصحف ومقاطع اليوتيوب, واكبر خطأ انهم اشركوا شاهر وابن عتقان فالطاروق اللي كان هذا الطاروق كان فرصة لهم للشهرة والاستفاده ..

شاهر ماأدري ليش قام من الاساس كأني احس انه يتهرب ولايبغى يطرق الموضوع اصلا مع ان الطاروق واضح من اول بيت وكان بإمكان شاهر يتركه وهو افضل له من الدخول الذي دّل على موقفه الضعيف ..

امّا ابن عتقان مذبذب مثل اللي يخم الجرة ويخطيها وحتى في ردّه على مستور وتركي كان ضعيف ..

مواضيعك شيقة وقلمك مميز ومفيد يابو فايح ولك مني كل الشكر وننتظر المزيد ..

وصوتي مع صوتك يابن عاصم لافض فوك

[الجوراسي]

ماعندي زيادة على الاخوان اعلاه الا انني بغيت اشير لتركيبات ضعيفة وخاطئة مثل:

فـــي كـــل يـــوم(ن) والـتـطـور يـشـافـي ( كيف التطور يشافي؟؟؟؟ )

أهــــــــل الــوظـــايـــف كــــــــل يــــــــوم اتــــبـــــرا ( كيف اهل الوطايف يتبرا؟؟؟)

[فيصل بن فهد الجهني]

مع احترامي لكافة الشعراء


الا انه طاروق سسامج و ساذج .. ولا يرتقي لمتوذقي الشعر


سقطه كبيره بتواريخهم جميعا


و اعتبرها سوالف ليل .. مثل ما قلت يا ابو فايح



و عسى الله يفكنا من ذا الطواريق و المواوييل .. اللي ما لها سنع ولا تمت للشعر بصله

[فهد الزهراني]

ان كان قصدهم فعلا ايصال رسالة الى ولاة الامر

فأعتقد انه آخر تقرير سيصل الى ولاة الامر.....ولا اعتقد انه سييصل اصلا فهذا الشي غير متابع اصلا وقد كفتهم الصحافة والاعلام بشكل عام فقد اشبعوا هذه المواضيع نقاشا بشكل اجمل ...وبشكل اعمق ..

ولكن اعتقد ان الموضوع البحث عن بريق اعلامي على غرار ما حدث في المحاورة الاولى ولكن اعتب عليهم جميعا فهم ليسوا بحاجة الى هذا البريق فهم معروفون وخاصة مستور بعد هذا السن ماذا يريد؟

اتمنى لهم التوفيق ومثل هذه التجاوزات معاول هدم للموروث واذا خرج من عباءته الاصلية سنرى العجب وسيتبدل بثوب آخر ...لا يروق لأصحاب الذوق الرفيع والمعاني المدفونة بأتقان . وحتى التراكيب الجزلة مفقودة تقريبا في هذه المحاورة

[مزحم العتيبي]

المشاركة الأصلية كتبت بواسطة فهد علي العازمي

أنا أتوقع يا أبوفايح والعلم عند الله
إنهم يبون الرسالة تصل لمن يريدون كما يريدون
لإنهم يخاطبون أمراء ووزراء وتجار قد لايعرفون من المحاورة حتى إسمها
هذه وجهة نظري

هذا الكلام اللي في خاطري يافهد


وبعدين مستور العصيمي شكلة مبهذلة الحلال والشعير

وتعب من كثر مايمسك سرا في سوق الشعير نلاحظ جميع كلامة عن المواشي والشعير وتجار الشعير

[الشوردي]

فيه بيت لمستور عليه علامات استفهام ولو كان خصمه غير تركي خصوص من الشعراء المتمرسين والفطنين كان تحول سير المحاورة وهو:

رحت للتاجر لعين الجد=فيـه عيونـه يقلبهـا

كلمة ( فيه ) تشير لمستور نفسه

ورده الثاني على رد تركي على هذا البيت كذك فيه علامة استفهام:

أثر بعض الناس ماله سد=يسمع الكلمـه ويقلبهـا

اعتقد ان مستور كان يريد معنى اخر ولكن الشعراء كلا يغني على ليلاه بما فيه خصمه

[وافي ضاوي]

المقصد واضح

لكسب شعبيه الجمهور وزي هالمواضيع يتم تداولها في الجوالات واحاديث المجالس

خصوصآ ان بعض الشعراء فقد شعبيته ويحاول استرجاعها ولكن للاسف ماهي بالطريقه ذي ,,

بالشعر الحقيقي وتعاملك الطيب النزيه مع الرجال وعدم قطع ارزاق اخوانك الشعراء (فلان لاتعزمونه )



(لكن الشرهه على الشعراء الكبار )



ولاهنت يابوفايح على مناقشة مثل هذه المواضيع