إليكم هذه المحاورة آمل أن تنال استحسان المتابعين الواعين
فيصل الرياحي
ذا الليل ياحبيب نويت الحرب وألا مانويت
الخيل ياخيالها والحرب يادندونها
يلي تقول من النعيرية تفرج فالكويت
لارحم أبو زرقاء اليمامة ماعطتك عيونها
حبيب العازمي
أمشي معك وآقف معك وليا عصيت أمري عصيت
والملعبة ليلى ومحسوبك هذا دندونها
لابالله أنته ماتشوف من الزعل مدري انعميت
وأهل الكويت من الزعل لأجلك تحد سنونها
فيصل الرياحي
أنا أستمد الأمر من ربي دريت أو مادريت
عسى عتيبة في حبيب ماتضيع ظنونها
هذا زمان الدسدسة والكذب يدخل كل بيت
يرضونها الجهال والعقال مايرضونها
حبيب العازمي
راح الرياحي كمبليت أرب يرجع كمبليت
حتى البقوم من الرياحي ماتزيد غبونها
ياأصحابنا يأهل تربة مافي ديركم خام زيت
والديرة اللي مابها بترول لاتطرونها
فيصل الرياحي
أنا باقول الحق من قول الحقيقة ماأستحيت
توحونها ياقوم وألا اليوم ماتوحونها
الله يعز الديرة اللي في روابيها ربيت
عفيف لاتصبر عليك ولاتعيش بدونها
حبيب العازمي
الكلمة اللي قلتها بديت معها وانتهيت
ياكلمة ن ياصعبها ياكلمة ن ياهونها
الله يعز الديرة اللي كلها نخوة وصيت
رجالها في سهالها وجبالها يحمونها
فيصل الرياحي
مازلت فالروضة صغير لاكتبت ولاقريت
لاعطيتك الكلمة ولاناشدك عن مضمونها
قالوا ياليت الميت حي وقلت ليت الحي ميت
هذاك خلق الله على صوته تهز متونها
حبيب العازمي
أنا أستحي من ردها وألا أنت قلت ولااستحيت
مدري يغرك شكلها وألا يغرك لونها
أنته مواطن فالمدينة لاهدمت ولابنيت
وإن جيت في مكة ترا الكعبة تشوف ركونها
فيصل الرياحي
أنا ليا جاء العيد أبا أغني وأبا أضيف ثبيت
من الوعول اللي على الصخرة تحك قرونها