لن عكر الصافي زمان التهاويل = وقامت همومك تشتغل طابعتها
ووقت العنا جاتك خيوله زرافيل = وحمولهن حدب الضلوع احتوتها
وبديت في منضومة الحط والشيل = والارض ضاقت في عيونك سعتها
ازبن على اللي نزل الحق تنزيل = اللي رفع سبعٍ وسبعٍ تحتها
سبحان من بمره يوجه مكائيل = ويسوق سحبٍ قدرته كونتها
ويهلك بها جيلٍ ويرحم بها جيل = ويحط عبرت قوم في سابقتها
هو من يبدلها بيسر وتساهيل = وغيرة محال انه يغير جهتها
دنياً زوال ولاوراها محاصيل = محدٍ سلم منها ومن عنجهتها
ياما تعثر في شركها رياجيل = وياما عليهم كبرت دايرتها
ولاتكبر الا في عيون المهابيل = ضعوف النفوس اللي رديٍ بختها
اللي ركايبهم مقافٍ مقابيل = والناس في مادار ماعبرتها
والله مايشف الكبود المغاليل = خطوة هلابيجٍ عليك عرضتها
لو انهم في منزل الجدي وسهيل = لابد يعطيك الزمن خارطتها
ويكشف لك الحاصل بكل التفاصيل = وتدرك مساعيها وتفهم لغتها
واعطيك في ماقول واف المعاديل = وراي العرب يعرض على عارفتها