[عمير الثبيتي]

الله من عين تصب العبر صب
صب السحاب اللي غزيرة مزونه

من جور هماً يعتلج داخل القلب
تنزف عروق القلب كثرة طعونه

قمت اتوجد عنه في رأس مرقب
ذعذع به الغربي وميل غصونه

ماني بباديبه عشقاً ولا حب
إلا بقلباً كاثرتن طعونه

على زماناً من هل الطيب ينضب
ولاعاد نسمع به ولا يذكرونه

كشر لنا نابه كما الذيب الاشهب
وسود الليالي شاركته بلحونه

انجامل الانذال بالطيب بالغصب
عزاز النفوس ولا نداني المهونه

والله لو ما الله نخشاك يا رب
لطير رؤوس ويفقدنه متونه

في كل يوم من التعاجيب نعجب
وابليس فوق الناس يسحب ردونه

راع الوفا ماله بذا الوقت مشرب
واليا ورد مورد لقا ابليس دونه

ويلقى مهندسة اسوالف تغثرب
اتغثربه ويضيع طعمه ولونه

الطيب بين الناس مغبي ومحجب
والخبث بين الناس كثرت فنونه

ودام الرجال اتحط حمرة و ميكب
وش عاد ابه من مرجله ترتجونه

ودام الآصايل طاوعت فتنة الغرب
انتاجهم للغرب تنظر عيونه

اتشوفهم بين الخلايق كما الجرب
فالقص والرقص وكثرت مجونه

يالله ترحمنا من الجهل والذنب
في ما قفاً كل الخلايق يجونه

في ما قفاً مافيه ملجأ ومهرب
إلا لمن في طاعته يعبدونه

وختامها صلوا على سيد العرب
إعداد من طاف الحرم ومن يجونه