محاورة قديمه وسوف انشرها لكم فيديو قريباً أما الأن كتابيه
عبدالله العير
هلا مرحبا في حفلة عبيد بن درهوم
تراحيب مثل الورد والسكر الحالي
آلا ياسفر صدقناك العام راحوا قوم
ولاكل رجالٍ يعوضك برجالي
سفرالدغيلبي
يدوم البقاء من شاعرٍ ساع وصل اليوم
يدور فعل مادور القيل والقالي
أنا كيف أداوي علة بعيرك الماسوم
وأنا للجمال الجرب مانيب جمّالي
عبدالله العير
انا لو ابا أدور على المسلمين علوم
أبا ألقى مزونٍ سيلها فالخلاء الخالي
تبريت منها وانته مجودٍ بختوم
على العهد والميثاق يالطيّب الغالي
سفرالدغيلبي
أنا صاحبك وليا ارتخى عفشك المحزوم
تروّح على فالك وأروّح على فالي
علام العيوره صايرٍ سيفهم مثلوم
وأنا خابرٍ فيهم ثمانين خيّالي
عبدالله العير
ترا الليلة الظلماء مافيها قمر ونجوم
ليا روّح الأول وش يدور التالي
ترانا رجال ورمحنا فالعرب ملحوم
علامك تذكرني كلامٍ على بالي
سفر الدغيلبي
ليا طاح ولد الحر أخذها وليد البوم
وجمّع عليها طيورٍ ألوان وأشكالي
أشوفك تصيح وتبكي الميت المرحوم
غدت من يدك لو ترفع الصوت وتلالي
عبدالله العير
ترا اللي قنص بالحر جاب الحباري كوم
تعشى وعشّى عيال ابو زيد وعيالي
انا ابكي على فالمواقيف يجلا اللوم
لو إني ولد عبّاد وأجاهد لحالي
سفر الدغيلبي
ماني قاضيٍ للناس يالمسلم المظلوم
تنص القضاه وحط حجه ومعدالي