قصيدة قيلت في مخيم قبيلة الحبصان من ذوي ثبيت ..
ولها معاني كثيرة
بسم العزيز الحكيـم المعطـي المنـان
منزل تبارك وفاطـر والحديـد وهـود
لا شفت خلقه وبدعه قلـت ياسبحـان
سبحان من سخر المحمـود للمحمـود
نبدى بذكره عبيـد ونلعـن الشيطـان
ويالله رحماك لا صـار القبـر ملحـود
من بعدهـا يانديبـي سـم بالرحمـان
عقب الفجر لا قضينا واجـب المعبـود
تسرح من الطايف المانوس ياكحيـلان
يمم لنجـد العذيـة والـدروب سهـود
اركب على اللي حديده صنعـة اليابـان
يالله ياجعـل صنّاعـه مـع النمـرود
لكزس وكاله ولونـه يارفيـع الشـان
وجه الفتى اللي حياته مابهـا منقـود
لادق سلفه تقـول انّ العـرب صمـان
واليا انتهض نهضته زي نهضة المحدود
واليا مشى وابتدا الـلازم ودربـه زان
كن الثوانـي تعانـي حسبـة المعـدود
واليا وصلت البلاد اللي عـن البلـدان
تفرق باهلها غديت من العرب محسود
قول الثبيتـي ندبنـي وانشـد القيفـان
قـافٍ بنـاه الثبيتـي والعبـاد رقـود
سـلام رديـة مـن ثبيـت للثبـتـان
سلام يبقى على طول الزمـن كالطـود
لا ضاق صدري وجوي ياصحيبي شان
والضيق حبله غدا في خاطري ممـدود
اذكر ربوعي عفاريـن معـا حبصـان
ربعي هل الطيب والنومـاس والبـارود
ربعي خوال النبـي يامرجـع العتبـان
قوم هوت عالمراجل هويـة الجلمـود
قومٍ تزبـن دخيـل وتكـرم الضيفـان
اهل الكرم والعطا واهل الثنـا والفـود
من فعلها ياصحيبـي تبصـر العميـان
لا ثار عج الرمك في طـارد ومطـرود
وانتم وحنا سـوات النـار فالضلعـان
وحدودنا فالديـر حـد العيـون حـدود
هناك شيخان شيخان وهنـا شيخـان
في كل موقع لنا موطى فخر مشهـود
واختام قولي مـع التقديـر والعرفـان
والعذر يالربع يسبق قافـي المنشـود
ياربعنا اهل الوفا جتكـم مـن الجـدان
رسالة حبرها حبـر الوفـا المعهـود
مضمونها ياسـلام الله علـى الثبتـان
من ربعكم من ثبيت اهل الوفا والجـود
وصلوا على صفوة العجمان والعربـان
احمد شفيع البشر في يومنا الموعـود