[@ـايل]

يامل قلب(ن) كل ماجرهد الليل =قام يتوقد مثل حام المليله
من كثرة الأحزان ذاق البهاذيل =واهني من حلو الكرى يستويله
ومع السهر وابل عيوني هماليل =مالي سوا رب العباد اشتكيله
مابكي على الدنيا ولا خوفة الميل =فقدت سيف(ن) من سيوف القبيله
فقدت نايف راعي البن و الهيل =والمنسف اللي جودنا ينتميله
فقدت ليث الجود و الجاه حلحيل =حلحيل شيخ يحلحل المستحيله
أرسى من الأوتاد و اعذب من النيل =للعاني أعذب من رشاش المخيله
في ساعة الموقف دليلة دواليل =تنسب له الشيخه و عقله دليله
أقفى سليلة متعب الجيش و الخيل =سليلة(ن) ياطيبها من سليله
لا قالوا ابن حميد يرجح له الكيل =من روس ربعي محتمين الدبيله
رجال ترجع له عقول الرياجيل =الفعل صارم و النبا سلسبيله
كم قاد فوج أهل الكرم ذابح الحيل =وكم فك مرهون الزمن من عميله
طلق الحجاج مسهل الصعب تسهيل =الطيب فرضه و التواضع نفيله
محشوم عن مسرح هل القال و القيل =حر مكانه فوق راس الطويله
أقفى من الدنيا زبون المعاميل =الضيف نادر و المضيف كفيله
ضيف الكريم اللي هزم زمرة الفيل =ماخاب من عند الكرب يلتجيله
ويقطعك يادنيا الشقا والغرابيل =كم فرق بين الخليل وخليله
صفو السعاده يقتفيها عراقيل =ونكباتها مابين يوم(ن) وليله
ويالله يامن تدفع الجيل بالجيل =تجعل مقره فالجنان الظليله
وأجعل عوضنا فالرجال المشاكيل =اخوان نايف طيبين الحصيله
وعيال نايف نايفين المناهيل =أهل المكارم والدروب الجميله
وصلاة ربي عد ماينبت السيل =على الرسول المصطفي والفضيله

الله يرحمه ويسكنه فسيح جناته ...وصح لسان الشاعر حمود السليس ..ويستاهل كل علم طيب الشيخ نايف ابن عبدالمحسن ابن حميد الله يرحمه ..
ولاهنت يابن حميد على النقل والله يعطيك العافيه ...

التوقيع

شكر خآص للأخ العزيز (سمي جدي) ,,, للتواصل,,, hail-osaimi@hotmail.com الفيس بوك : هايل العصيمي انستقرام : hailosaimi تويتر : AlHooL@