[محمد البرقاوي .]

يالله ياللـي لطاعتـك الشهـر صمتـه
صمته وعنـدي خبربالشهروافضالـه

يـوم احتسـبتـه وبالأيمـان تمـّمـتـه
اطلب رضا خالقي وارجيـه واسآلـه

يغـفــر لعبـدٍ لحــود القبـر خــاتمـتـه
قدام يبعث وتكشـف صفحـة اعمالـه

مالـه رجــا غيـر مغـفـرتـه ومكرمتـه
وتوفيقه اللي جميع الناس تسعـى لـه

يقـولـه اللـي سنيـن العمــر عـلّمـتـه
وعاش التجارب وشاف الوقت واحواله

انـّه ولا شـي لوطـالـت مداومـتـه
يبقى على وضعه ويبقى علـى حالـه

شيٍ مـع الوقـت والخبـره تفـهّمتـه
وعشته مثل عيشة الطرقـي ومقيالـه

والشعرفالسـوق لابعتـه ولاسمـتـه
لوكان غيري يسوم ويرخـص ريالـه

الشعـر وهبه وتصـويره وترجـمته
تفـرض على الشاعـر يْصـونه ويشقى لـه

وانا قصيدي رفعت اسمـه وحشّمتـه
عـن هرجـةٍ بيـن شمّاتـه وعذّالـه

وقــدّام تقييـمـة النـقّـاد قيّمـتـه
وحدّدت نهجـه ومخراجـه ومدخالـه

من بين الابواب والاغـراض قسّمتـه
ولكل باب وغـرض طرقـه وموالـه

بـاب الفخـر فـأول الأبواب قدّمتـه
افخر بديني ونهـج المصطفـى وآلـه

وفي سكة النصح والارشـاد حكّمتـه
ما يطلـع الا معـه توجيـه ورسالـه

وان مر باب الغـزل سقتـه ونعّمتـه
لين يتسـاوى بـه المشتـاق والدالـه

وفالسـب والشتـم قيّدتـه وحجّمتـه
السـب والشتـم فـال الله ولافـالـه

والمدح له باب كـل النـاس فاهمتـه
مايمـدح الرجـل ليـن تبيّـن افعالـه

والرجل معروف من هرجه ومن صمتـه
هـرجه وصمته يحـدد ويـن منزالـه

والطيّب اللـي معـه خـيرٍ توسّمـته
اخـترته انمـوذج التوصيـف للحـالـة

تفـرح بهرجـه ليـا منـك تعلّمـتـه
الصـدق والمـعـرفة وزنه ومـكيالــه

عـلم وثقـافـة واساليبٍ مـلازمتـه
وتاصيل شرعـي واسـانيدٍ مـع اقوالـه

وتفرح بصمته لاشفت الثقل في سمتـه
اللـه عطـاه الوقـار وميّـز اشكـالـه

عقلـه و ثقلـة مـابين الناس خـادمته
واخـلاقـه الطـيّبـه وايضـا سعـة بالـه

هـذا هـو اللـي لياشفتـه تغانمـتـه
فـي مجلـسٍ فايـحٍ عـوده وفنجالـه

وان شاش شعري وجاب المدح مالمته
المـدح مطلـوب فـي هـذا وفامثالـه

محمد البرقاوي

آخر تعديل محمد البرقاوي . يوم 28-Sep-2012 في 12:37 AM.