((قلت الأسامي))
قلت الأسامي ترا يابنت ماهي شعار= الـرجـل يعــرف بطيبـــه عــود وألا ولـــد
كم واحدٍ عفتي إسمه لو فعوله خيار= وكم واحد إسمه فهــد لكن ماهــو فهــد
وأنا سواتي كذا بالغصب دون اختيار= كله على شـان مايــدري بالأســرار أحــد
لني هويت الهنوف اللي هواها دمار= عشقتها عشق صادق واخلفت فالوعــــد
لو إن ابه غيرها دورت في كل دار= لكــن مـافـالــبلــــد ياكود هــذا الولــــد
وأقفت وأنا مالي ألا الصبر والانتظار=ماوالله أعشق ســواها لو يطول الأمــد
وأخذت مدة وجاني علم تالي النهار= قالوا عشــيقتــك من حامد تروح لحمـد
قلت الله الله على جور البني الصغار= تحبك الســبت وتخونــك نهــار الأحـــد
وأنا رجل وأعرف اليمنى وأعرف اليسار= ماحسب حساب الضعيف إن قام وألا قعد
ربعي لهم في سنام المجد عرش و و قار=من يلتجي في حماهم عاش عيش السعــد
(حايل) و (عايل) بقبضتهم شملها الدمار= يابنت كلٍ لماضـــين الفعـــايل شهــــد
من غير زودٍ عن الشجعان فنحا الديار= ما يخفي النـور غار اللي بقلبه حســــد
عبدت ربي عليم صغارها والكبار=الواحد اللي له المســـلم ركع ثم سجـــد
واساله العتق من نارٍ حطبها الحجار=ياربي اجعــل لنا منـها وعنها مصـــد
ابنت هاذي تراها قصتي بختصار= فهمتي الشرح وألا أعيدها (بالعدد)
((ياعيني اللي))
ياعيني اللي كل بادي ليل مو ذيها السهر=و ياقلبي اللي من وراء الحدب الحنايا يصطفق
من قلة الحيلة وعمس الراي وأعوان الدهر= وكثر الهموم اللي على قلبي مثل ضرب التفق
ليا بغيت أسج لوهي نصف ساعة في الشهر= جاني بلاي وقمت أشوف الموت في عرض الأفق
ما والله أستأنس بفرقا الضيم كله والقهر=وآرد على النـهـر الـمـصـفـى عـقـب ميـراد الخفق
وأقطف زماليق النفل والورد وأنواع الزهر= الا لـيامـنـه تـولـى الـسالـفـة حـضـرة ’’شـفـــــق’’
وأعلن بها من عقب ما هي خافية تصبح جهر= وإن سكــــرت كــل الدروب أبـو هـنا مثــل النفق
يابو هنا عندي علوم ن في ضميري تدهر=سـوالــف ن يـــامســـنـدي والله عليــهـا ينـشفق
ماقلتها والله يابن عاصي على شان أشتهر= ألا بعــد مـا غــابــت الأنــوار بغيــاب الــشــفـق
بنت الهلالي لو خطبناها وقدمنا المهر= فـي تالـي الـمشوار تـنحــاس العــلوم وتـنـصفق
سبة عيال البطن مدري سبة عيال الظهر=مـدري تبا اللي صــفقتــه تعــرف لـيا منــه صفق
هاذي حقيقة ياوسيع المعرفة لا تنبهر=لـــكـن أمـانـتـك الــــبـنـيـة دمـــهـــا لا يتنـدفـق
واخذ من القذافي الحكمة عشاء والا ظهر=يابـو هـنـا لا نـتفـق علـى انـــــنــــا لا نـــــتـفـق
((ماعاد بيني وبينك))
ما عاد بيني وبينك يا أريش العين= من ما مضى ما يسر العين والبال
إن كان قلبك وسيع يشيل شخصين= قلبي يشيل الهموم ألوان وأشكال
وإن كان زينك ما مثله في العرب زين=العين ما تنخدع في شوف الأزوال
السدر ياصاحبي ما يشبه التين=لو كان فيه الحكم تضرب والأمثال
لا صار ما بك حيا لا أخلاق لا دين= ترى جمالك مغر صورة وتمثال
روّح وتلقى بدلنا ناس( ثانين)=تلقى مع الناس لك عم ن ولك خال
الحب ماهو بلعبوبة وراعين= ولا هو بسلعة يباع بقرش وريال
الحب معروف في سلم الثقلين= نقش بحجر لو يطول الوقت ما نزال
ويجري مع الدم وعروق الشرايين= وفي ثومة القلب له ماكر ومنزال
كم مرةٍ نزّل أرقاب السلاطين= وكم مرةٍ حد طراده على الجال
وأنته تحسب إن حبك سور برلين= حبك يامغرور مثل الفي لا مال
مجنون واللي يحبونك مجانين=والجاهل اللي يوالف ناس جهال
مع السلامة ترانا اليوم ماشين= وأقول كرّمكم الله فالك عقال
قفلت صفحتك وأعلنها من الحين= ماعاد لك عندنا ممسا ومقيال
ماعاد أبا منك لا زينٍ ولاشين= حتى سلام’ عليكم كيف الأحوال
((قبل مبدا الكلام اذكر ولي العباد))
قبل مبدا الكلام أذكر ولي العباد=خالق الآدمي من نطفةٍ من علق
المعز .. المذل .. الهادي الى الرشاد=جاعل الليل ساتر فاضحه بالفلق
وطالبه يغفر ذنوبي بيوم المعاد=وعايذٍ به يكافيني غثا ماخلق
والسوالف جديده والليالي جداد=وكل عمرٍ يبيد .. وللفنا ينطلق
وكل نارٍ ليا شبّت تعوّد رماد=غار نار الحسد طول الزمان اتعلق
علةٍ مالها دكتور من عصر عاد=لا بقفل القفول .. ولا بكسر الحلق
صلّط الله على اهل الحسد علمٍ وكاد=شلّةٍ ماجنت غار التعب والقلق
دايماً بالحكي تنقل سيوفٍ حداد=ودايماً تسلك الدرب العسير الزلق
عن دروب المعزه كن فيها قياد=وتنفلت للردا مثل انفلات السلق
((قال من شاف الهوايل))
قال من شاف الهوايل فـ الزمان التالي= عقب مازاغت عقول العالم المتـّزنه
كل مايلحظ كثير الفرق فـ الأجيالي= يصفق كفوفه على الماضي ويعلن حزنه
ليت كلٍّ يحفظ الأولاد حفظ المالي= ماحدٍ شانيه لو ايحطهم فـ الخزنه
جوّد الذريّه اللي كل منهم غالي=وقل لـ صيبك لا أتـّزن خلك على هالوزنه
لا تفكّه ثم تذوق المر عقب الحالي= مايفيدك كثر قول الله يرحم مزنه
جعل من جنّب عن أهل الدين ماله والي=لو تثاقل جثّته عندي خفيفٍ وزنه
((فات لي وقت عسى الله مايعوده))
فات لي وقتٍ عسى الله مايعوده=حيث ماحصّلت منه الا النقايد
كنت جاهل فالزمن بيضه وسوده=منخدع فالامن يوم الامن سايد
نيتي دايم على الطيب امعقوده=وامتمسّك بالسلوم وبالعوايد
احسب إن كل الرياجيل امعدوده=واضحك من اللي يقول النعم كايد
واثر الأنفس كلها خلقت جحوده=مابقي لأهل الوفاء الصادق شرايد
كود من يقدح على الطاله زنوده=وإن وعد تلقاه وافٍ فالوعايد
لاتعاين فالرخاء نقصه وزوده=مايبين الصاحب الا فالشدايد
والجمل يمشي وجمّاله يقوده=والقياده ماتليق لكل قايد
والرخامه والضعافه والبروده=ميزةٍ تعرف بها وجيه الرفايد
الوجيه اللي عن الطيب امحدوده=جعلها فدوة وسيعين البنايد
لايظن العبد في دايم وجوده=كل شئٍ غير وجه الله بايد
من بغا الدنيا فقط ياقل فوده=لاتخيّرها كذا ماهوب فايد
مايفيده فعل اباه ولا جدوده=كان مايخشى بها حر الوقايد
ومن حفظ الاسلام واستوفى بنوده=واخلص لمولاه يبشر بالفوايد
انصح اللي عنك مايعلن صدوده=لاتقف فالمجتمع موقف محايد
وقل لراع البيت لايطرح عموده=ثم يضيعن البناجر والقلايد
لايخليها خروج بدون عوده=يفرح الله .. كان عبده جاه عايد
---------------------------
لي رده اخرى لما تبقا لقصايد شاعرنا عبدربه
واتمنى التثبيت من الاداره