اخواني الله يسعد جميع اوقاتكم بكل خير وتقبل الله صيامكم واقيامكم
هذا قصيدة ومجارات لها من شاعرين كبيرين لهم باع طويل بالشعر وحبيت ان النقلها لكم
ارجو ان تحوز على رضاكم عني ودمتم طيبين
ليتك تضر وتنفع اللي فالمواقف ينتخيك=لكن ما بك نفع لاشتدت ولا يخشى ضرر
يا كثر ما لمّحت لك قم للوفا وازريت فيك=كم لي وانا انفخ في رمادك مير يا بعد الجمر
كم هقوةٍ تزمي وانا في ظلها كنت احتريك=لكنها غابت وغبت وهاجس الشاعر حضر
يا شيخ جاملتك كثير وقلت للضيق احتسيك=ومرار ضاقت وانت تدري ثم تجاهلت الخبر
يمكن تبيني مثل غيري يا اكوع الكف اجتديك=واصير وسط المحتضر عندك مثل زيد وعمر
ناسٍ تلبسك المدايح والمواجيب تهجيك=والمدح يصبح قدح لاغابت براهين الظفر
و يحزّ في نفسك شموخي رغم ما تملك يديك=الا ويكسرك التسامي وانت محني الظهر
كم مرةٍ حاول زمانٍ لو ضحك لك يزدريك=يكسر شموخي مير يرسلها وتنزي عن صخر
و كم معضلة قامت تخايلني وتوعد, فيك فيك=حتى انتحت عني وهي بين التقهقر والقهر
صادمت صكات الدهر تصير لك والا عليك=حتى استكانت لي وصافتني وصافيت الدهر
و اللي يذم الوقت اقول الذم كله يغتشيك=الوقت عون اللي سما والوقت عثر المنعثر
اليتم مع جور الجماعة بين هذيه وذيك=والعبرة اللي وبلها في متقى الضلع انهمر
ما زعزعت عزم اليتيم بعون من لا له شريك=واليتم فقد أهل الوفا، واليتم يتمك فالكبر
وحدة وغربة فكر، مع شمت المعافى بالدريك=واقفاية اصحاب الرخا ومجابه سهوم الغدر
والجود بذله فالقريب اللي تجيه ولا يجيك=حتى يراها عادة تاجب ولا فيها فخر
ان رحت يمّه يا هلا وان غبت عن عينه نسيك=واليا عدو معهم عدا وانحاز لأنذال البشر
و الشعر وانته تمنحه نبضك وناره تعتريك=والمطلع اللايذ تخطى له على جمر السهر
تعتَنّ صلفات الهواجس والمساري تشتكيك=وانته ورى شرد المعاني لين تصخرها صخر
حتى تجلّت لك هنوفٍ بالمفاتن تستبيك=تمشي بطر ما تلتفت في ربة الطرف الحور
تلبس ثياب النور تستمطر سنا الفجر الوشيك=فرعا القصيد اللي تبختر بالجواهر والدرر
حتى ليا نادوا هل المحفل وقالوا ننتخيك=لقيت شعار المهازل سادة اهل المحتضر
و الشعر مكسور المهابة كنّه العبد المليك=ينخى ودمّه من هوانه فآخر الحفلة هدر
وأقفيت وأنته ياحليف النادرة تنفض يديك=من شوف شيخان التسول تمدح شيوخ الغفر
عبد الله بن متعب السميح
هذه القصيدة قالها الشاعر ماجد بن عبود بن مغيرق
تفاعلاً مع قصيدة براهين الظفرللشاعر عبدالله بن متعب السميح
هيضني اللي تو ماعلق على على الشعر الركيك=واهل التسول والمدح والقدح وشيوخ الغفر
واقول صح لسانك ونقول لك تسلم يديك=افصحت عن كوامنك وابديت لك وجهة نظر
انته نجم ساطع وشيخان الغفر ما تحتويك=ما نته بدميه في يدين اهل المشالح والغتر
واخذ الوصية من نظم شاعر تهيض من ذويك=ما له مطامع ياخوي الجنب في صحف النشر
شعر التسول يالسميح ماتبيه ولايبيك=نفسك عزيزه والقناعة كنز مثل المتجر
انا اخبرك ماتنخدع مع راي مبروك وبريك=مقتنعن برايك وتنحت يا السميح من صخر
ما يلحقك لوم وملامه لو بعضهم منتويك=متسولين وهمهم جمع الدراهم فالكمر
الله من النكبات والآفات يالشيخ يحميك=يكفيك شر مقرد الاوباش واشرار القشر
اتحفتنا يامن عيون الشعر دايم تهتويك=لك صفحة بيضا في الشعر المدون والنثر
انته جبل شامخ تحدى من يحاول يحتديك=بضربات يوجع وقعها فالراس ولا فالنحر
استهجن الي با لتويتر والمهايط يقتفيك=وكثر الحذر بالحيل قالوا مايفك من القدر
وانا تراني درعك الواقي وزندك واحتميك=الوي ذراع معارضك واضع له خطوطن حمر
واحييت مايكمن بصدر الشاعر الي يحتريك=وانته علم في جيلك وبالشعر شاعر معتبر
مالك لزوم بفزعتي وانا ماني لك بشريك=لكن اؤيد كل مابينت لازلام الهذر
ما اعاتب الناقد لو انه قال في وقال فيك=حنا على نياتنا والله ومرنا بالصبر
وانته بعيد الشوح عن شيخ يحاول يشتريك=وانا بعد يا بعدني عن هقوة الوجه الغبر
واللقب ياشيخ الغفر لاتبتليه ويبتليك=من لقبك بالشيخ وانته مانت من ضمن الجبر
اظن كلمة شيخ عند اهل الشبح واهل البويك=وتطلق على راع المجاهيم وهل البوش العفر
اليوم صارت دارجه مع قوم هيك وقوم هِيك=وكلن يقول انا كبير القوم واكرم من يسر
ولو تنتحل شيخه ماهيب الك كلن ضحك عليك=بالمجتمع مالك مكان وذكر جدك ماشتهر
القاب مختلقة على افواه المهبل وتعنيك=ماينفعك تطبيل من صفق الك بيوم الحشر
واللي تمادوا فالتسول والشعر لو من ذويك=لابد مايوضع قيود الهم وتحجيم وحظر
هاذي نصيحة والنصيحة تنقبل من دون شيك=وان دق بك عصر الجهل مالك منير ولامفر
الشيخه اللي مالها فيما مضى عرك وعريك=بروس الرماح وبالسيوف وضرب عجلات القطر
ماتصلح الشيخه لكرعان القبايل والحكيك=وحتيش لو بانوا في المحفل وبان الهم صور
لاتدعي بالمشيخة واقرب قريب الك يعصيك=مانته لها لو شجعك مرشدك وابليس العور
ما نته بوارث شيختك من جدك وعمك وابيك=كم واحدن قبلك طمع فيها ولا افلح وانثبر
خلك مواطن عادي وريح قبل تصبح هليك=والمشيخة صارت لذاك وذاك ورعاة البقر
لو شجعك من شجعك فالحفلة وكثر الدبيك=ماتستطيع القفز لنجوم الثريا والقمر
يعصاني لساني ليا قلت الك شيخ و قلت بيك =حكم ضميرك وانتبه للواردات وللصدر
ونصيحتي للشيخ اقول الله يثيبك ويهديك=الدين يا الشيخ النصيحة قالها خير البشر